Bukanaku kabaanom kâynenaku
11
Kâynenaku, koo malhegenumaayamu mata wahaw wa ukobaalem di wo, di kûyisolaal poop di malhegen di kaan wahaw wajukutim ubaje. 2 Mata kâynenaku kokakiimom ma Emitay êririgenummi di bukanaku kapiyaaku.3 Kâynenaku kokakiimom nunamulenumaal di kaan, Emitay di hurimahu hata yo, êcookoorummi etaamay. Moo, wahaw wajukeyim, di waawu wâjukoriitim ucookoorumim.
4 Kâynenaku kokakiimom Abel nâwulum Emitay opherta yahammi majak yata Kâyiŋ. Momakiimom ma Emitay esalumoom ma yêenul oo anaw acolum, mata ma êririgemmi di opherta yatawool. Kâynenaku kukiimom poop, palimo na akeem ya alob.
5 Kâynenaku kukiimom poop Enooki naŋari be hatiya di emitay baketut; ña ajukuti mata ma Emitay eŋaroom. Be bala eŋarool, dêyis kaan yoo êririgene d'oo. 6 Mata an aaliit aga Emitay êririgen d'oo oo bâynent yo, mata anaw âkin jaa akay be baabu di yo, mbi âynen kaan yoo ebaje, nâynen poop kaan ya egal bukanaku kapaameyom.
7 Kâynenaku kugam Nowe na Emitay enamulenoom mata wahaw wa ajukorutum, ña nâynen ma acookoor ebaarukay ma amellhen bukanaku kata yanŋool. Momakiimom âmbasuk peh di kulo no di buhiiraabu, be oo Emitay di esohool non anaw acolum mata kâynenaku katawool.
8 Kâynenaku poop kugam Abrawoŋ, na Emitay êwooloom najam di yo ma âcaalh di êsukay yatawool, ma akay be di etaamay yaayu ya âmirutum ya yeenoom mbi ewulool. 9 Mata kâynenaku kokakiimom Abrawoŋ nalako di etaama'uyu non amaasoora ya Emitay yemmi mbi ewulool, ma ya akin bo di ûngungaw; di Isaki, di poop Jako kayaam poop hurimahu ha Emitay yemmi mbi ega ampayiil Abrawoŋ. 10 Mata Abrawoŋ nakookoom êsukay ya Emitay êyisoom ya eŋiicum, ban di eteep yo di hutandahu haaliitum hukañowrer.
11 Kâynenaku kugam ma Abrawoŋ abaj aŋilaw di bahallenerabu, ban poop apañoorool Saara, oo baaliit ban abaj aŋil, be aharet ma âcaalhul di aŋilaw di bahalhenerabu; mata ma âynemmi kaan anaw aanoom mbi awulool aŋilaw, oo anaw âynenaayaw. 12 Moo, di anaw umu anoraw ahallemmi ahuutum kaket, di câalhumuu'dô êbajoorumay yamemmi non bootabu bammi hatiya di emitay, di emeeŋ poop non hulhuusahu hata hubeereeraahu haaliitum hupini.
13 Bukana'uke peh, kukeekeem di kâynenaku bayabut wahaw wa Emitay yemmi mbi ewuliil; be di kuŋanden wo, ña di kûririgen mata wo, ban kulooloom salh di kaan buko emaasooraay yata di etaama'uye. 14 Moo, bukanaku kalobem ume, kûyise kaan kokapaamem di hukin haahu be batayiil. 15 Mata malhegen gaween jaa non koku ma kunongooreenem mata tiŋatu ta kûcaalhumulom, keeliyeene kulaañ be bo. 16 Be mata ma kunongoorum mata hukin haahu hahammi majak, haamom hata hatiya di emitay, momakiimom ma Emitay êpuñowutummi ma yeeni yoo egam Emitay yatayiil, ña di ebandoor hukinahu be batayiil.
17 Kâynenaku kugam Abrawoŋ, na Emitay elasuwoom, ña naŋar añoolool Isaki awul ma awaasenumi. Ban Emitay elobooloboom kaan, mbi ewulool êbajoorumay yamemmi noon, be palimo moo, nâwaayen ma aŋar añoolool umu anoraw, awul ma awaasenummi. 18 Mata Emitay ebiim bi yeenool, “Di añooli umu Isaki, mbi êbajoorumay yatayi êcaalhumul.” 19 Mata Abrawoŋ nâmire kaan Emitay ebaje sembaasu ma êlhaalenul añoolool di eketay. Moo, gawe poop non ma Emitay elaañelloom añoolool, di eketay nalhaalowulom.
20 Kâynenaku kugam Isaki ma añaan Jako, koo di Êsawu, ma alobiil wahaw wa mbi ugawiil.
21 Kâynenaku kugam Jako na ahuutum kaket, ña nañaan kuŋilaku kata Jose ma mbi kubaj hûpiiraahu, oo ma âjuumummi huginkumahu hatawool ma ya âbinken Emitay.
22 Kâynenaku kugam Jose na agam ma aket, ña nalob mata jâcaalhaju jata êsukay yata Israyel Ejiptu, ban nalobiil maama mbi kuga woolaw watawool.
23 Kâynenaku kugam kubajaaku kata Moyses ma kûñoorool kulheeŋaku kûhaaji bâkoliit hurimahu ha âyyaw aloom, mata ma kujuum kaan añooliil najake.
24 Kâynenaku kugam Moyses, na agam natooke ânniinaaw, nalat ma keenool oo añool aŋilaw aaraaw ata Pharawo. 25 Ma sûumool ma alesi di manor di bukanaku kata êsukay yata Emitay, ma aatuba alako di mâsuumaamu di kûbajumiñaku di etaŋay yayejutum. 26 Momakiimom nâanul haŋ majak ma kurembeelool mata Kristu, mata nahaŋe husaanumahu peh hata Ejiptu; mata ma agam bûyegetabu batawool di bugalabu bata Emitay bâreesewuum. 27 Kâynenaku kugawoom ma âcaalh Ejiptu bâkoliit hubirikahu hata âyyaw, ma ajuum tir non an ammi ma ajukem di Emitay yâjukoriitim. 28 Kâynenaku kugawoom poop ma aga kâlundaayaku kata Paaskuwa ma asaas hûsimahu di sîtingaasu sata siluupasu sata bukanaku kata Israyel, ma amalaakaw ata eketay aatuba mbi abuj kuŋilaku kûtiyaaraku katayiil.
29 Kâynenaku kugam ma êsukay yata Israyel kûtip Hulhuwahu Hâyemaahu ma kurees dô non tiŋ talhaalhe. Be bukanaku kata Ejiptu di kûkin poop kuga mo, di kûkee'dô.
30 Kâynenaku kugam ma hukalahu hata êsukay yata Jeriko hulo na bukanaku kata Israyel kuŋomooruhom kukaku hutok di kugaba. 31 Kâynenaku kugam ma Rabi aamom anñaakanaw agam êkusumay, aketut di manor di bukanaku katawool kalatum kajam di Emitay, mata ma awalemmi yanŋool di kâsuumaayaku bukanaku kakayum ki kulaso êsukay yatayiil.
32 Ña bu neelim ilob? Mata ibajut etaŋ ma ilob mata Jidiyoŋ, di Baraaki, di Sansoŋ, di Jephte, di David, di Samuwel, di poop buñaaŋenaabu bata kûboñaku kata Emitay. 33 Kâynenaku kugam ma bukana'uke kuhaat ûyyaw, di kuga wahaw wacolum, di kuyab wahaw wa Emitay yemmi mbi ewuliil, di kukumb utumaw wata sîŋaŋasu, 34 di kuhok sambunasu sâlum di sembe, di kumellh di eketay ya mbi kûketeenum di ujaasiyaaw, di bañemberabu batayiil, be di kubaj sembaasu; di kubaj sembaasu di hutiikahu ma kucah di esellooraay yata sîsuk saasu. 35 Kâynenaku kugam ma yaaraay kuyab bukaniil kalhaalellim di kuketaaku; bukan kaaku poop di kulesi be na kukeem, di kulat ma kumelheni mata kûkimmi ma mbi kulhaalelli di kuketaaku ma kubaj eroŋay yahammi majak.
36 Kaaku di kugeliil, ban di kûnaguliil; kaaku di kugenkumiil kuseelaku, ban di kukullhiil di sikullhasu. 37 Kaaku di kumabiil kuwaaliisaku, kaaku di kugaagiil di tutaru, kaaku di kubujumiil ujaasiyaaw; bukana'uke ya kûjupo ubaŋaw wata sîgaraniinaasu, di wata sijaameenasu, ma ya kureesoor mata ma kûsukateenom, di poop mata ma êsukay ya êlaameniim ma ya kûgawikooriil. 38 Moo, bukana'uke, êsukay yata di etaama'uye keeliit keekeniil, momakiimom ma kureesoorumem di ekinkay, di poop kurimbiliŋaku ma ya kûñooro di ûgoboŋaw, di poop usunaw wata di kuwaaliisaku.