10
Mata kûboñaku kata Emitay, koo bâynaataabu bata wahaw wajakaaw wâreesewuum, bugawut buhow bajaaŋum bata wahaw. Mata palimo bukanaku kâhugem Emitay mata keenaayaku ka kubujem uncaamaw ujaañaw peh, be keenaaya'uku keeliit kugawiil ma kunap be nanoonan. 2 Mo nokooren jaa non kûboñaku kata Emitay, keeliyeene kuga bukana'uku kagawem keenaaya'uku ma kunap be nanoonan, ûyegetaw watayiil weetubi ûyiseeniil joon kaan kubaje kûbajumiñ, ban poop keenaaya'uku ketukalaañeen joon kugawi. 3 Be keenaaya'uku kagaweyim ujaañaw peh, ya kugawi ma bukanaku kuwolho kûbajumiñaku katayiil. 4 Mata hûsimahu hata sîmuunaasu, di hata sîjikelasu heeliit hupas kûbajumiñ kata an.5 Momakiimom na Kristu agam ma âkayil be di etaamay, nâanul:
“Emitaye, aw ûkint uncaamaw wata keenaayaku, di poop opherta;
be nugawom ibaj eniilay.
6 Sûmoriiti uncaamaw wata keenaayaku wareemeneyim di Altar;
palimo poop waawu wata keenaayaku kagaweyim ma kûbajumiñaku kupasi.”
7 Ña înje nêenul: “Emitaye, înje ume!
Înje ikaylom ma iga non ma aw ûkimmi, non ma ŋiicim mûmbaam.”
8 Kâtiyaar nâanul: “Aw ûkint uncaamaw wata keenaayaku, palimo hûsiika, palimo uncaamaw wata keenaayaku wareemenim, palimo poop uncaamaw wawaasenumim be japasaju jata kûbajumiñaku; mata sûmoriiti wahaw uwu.” Oo aloom umu, palimo ma keenaayaku kugawumim uncaamaw, non ma kûboñaku Kapiyaaku kuloom. 9 Ban nâanul joon: “Emitaye, înje ume ma iga non ma ûkimmi.” Ña Emitay di êbuy keenaayaku kagawumeyim uncaamaw, ma ega to heenaayahu ha Kristu agam di eketay yatawool. 10 Moo, mata ma Jesus Kristu agam non ma Emitay êkimmi, momakiimom ma ulaal upasumaalim kûbajumiñaku katoolaal, mata ma awuum humuumahu hatawool ma aket hanor be nanoonan.
11 Mata bumaaŋenaabu peh bata kûboñaku kata Emitay, na mbi kuga bugoroorabu bâñoyyaabu, ya kuga keenaayaku ma kubuj uncaamaw kukaku pooko kaaliitum kupas kûbajumiñ. 12 Be Jesus Kristu, nawul humuumahu hatawool ma aket hanor keb ma apas kûbajumiñaku katoolaal, ban nakay ki aleeho kaŋen kûrir kata Emitay, 13 ta ammi ma akobem be na mbi ega bûsuumutaabu batawool ma kûhunen di ûkandumaw watawool. 14 Mata di heenaayahu uhu hanorahu, nâpasummi kûbajumiñaku be nanoonan kata bukanaku ka agam ma kunap.
15 Ban poop Buynum Bunapaabu, di busallhenolaal mata wahaw uwu na bemmi:
16 “Ata Emit naane: ‘Ûde yaŋaayay ya mbi iga di buko, na mbi kuka'uku kûriiŋ,
mbi iga kûboñaku kûmbaam di sîsigirasu satayiil,
niŋiic ko poop di ûyegetaw watayiil.’ ”
17 Ban naanu joon:
Eetubi iwollhowurer joon kûbajumiñaku katayiil,
di poop malesamu matayiil.
18 Mata tiŋatu ta kûbajumiñaku kupasim ban, joonut joon ma encaam yakeel ebuji be bata japasaju jata kûbajumiñaku.
Nûhugaale ban Emitay
19 Moo, Kutiyaay hurim hûsimahu hata Jesus, mowme nooliyaale unebejaal tiŋatu tahammi mâñoyyi bâkoliit. 20 Mata, na aruusuum hûridaahu haamom eniilay yatawool, ña nâbabulolaal buruŋabu bunkulabu bata eroŋay. 21 Moo, magam nubajaale amaaŋenaaw âmakaaw ata Emitay agam annahaanaw ata Eluupay yata Emitay, 22 ña jake ma ûhugaa'yo di sîsigirasu sasetum, sakullhenim ban kunongooraku kajakutaaku, di kâynenaku kâlhiŋum, di siniilasu poop sakullhenim di mumelamu masetaamu. 23 Nonkenaal ma ulobaal mata wahaw wa ukobaalem di wo, mata Emitay yalobolaamom mata wo, yoo yâynenaayay. 24 Nunongooraa'poop mata kupaalolaal, ma ya onkunenooraal di ûyeget wata jâkinooraju, ma ya ugawaal wahaw wajakaaw. 25 Aatuba uwalhaa'bo jâmebooraju non ma upulenaam, non ma bukaaku kugawem; be mbi ya onkunenooraal nanoonan, mata nûmiraale kaan hukahu hata Ata Emit, hôhahugewuum.
26 Mata ûmiraa'jaa malhegenumaayamu, ban nûlembaa'mo ma onkenaal ma ya ugawaal kûbajumiñaku, bajut ban joon heenaay hakeel hata japas jata kûbajumiñ. 27 Moo, wahaw warombom, bûkolaabu bata batalenabu, di sambunasu sâkoliyenim noon sa mbi sîbuy bukanaku kâkintum Emitay. 28 Mata anaw ahuusuu'jaa kûboñaku Kapiyaaku, nabuji bañankituti, dôo bagawe bukan egaba, be mante êhaaji bâmirer ma kulob malhegen mata hûbajumiña'uhu. 29 Moo, jinongoor maama mbi bukanaku kulesi kayokosum Añool Emitay, ma kusemen hûsimahu ha ajuumenumim yaŋaayay ya egam d'ulaal, ma âlobikoor Buynum Bunapaabu? 30 Mata nûmiraale anaw ammi: “Înje Ata Emit ikiim kayab bugalen. Înje ilesem bukan.” Ban nâanul joon: “Ata Emit mbi aga batalenabu êsukay yatawool.” 31 Mata kôliyeniye ma anaw alo di kaŋenaku kata Emitay yaroŋaay.
32 Jiwolho kukaku kûtiyaaraku na Emitay ehikitenuum ma jinebej di buruŋabu bata yo. Mata jijunjummi tir ma jimunten di hûlaamahu harem noon ha jibaanom. 33 Mata naanu di kugeluul, di kûgawikooruul kayooŋ di êsukay; naanu poop di jêemiyoor bukaaku kagawim wahaw non uwe. 34 Ban poop ya jimunten di manor di bukanaku kakullhim. Na bukanaku kubotum wahaw watawuul, di jimuntem di hûririgenahu dilo, mata ma jîmiim kaan jibaje waawu wammi hatiya di emitay, wa mbi ulako to be nanoonan. 35 Moo, aatuba jibeño mata wahaw uwu, mata mbi jiyab bancaamabu bâamak miwuul bamuntener. 36 Moo, jake ma jenken ma jijuum tir, mata jiga jaa non ma Emitay êkimmi, mbi jiyab wahaw wa yemmi mbi ewul. 37 Mata baŋiicerabu bâñoyyaabu moo buloom bêenul:
“Leetubi piyo anaw âreesewuum nâriiŋul.
38 Be anaw acolum, mbi aroŋ mata kâynenaku katawool.
Be alaañ jaa kujeeŋanda, înje eetubi îririgen d'oo.”
39 Moo, ûli ugawut bukanaku kalaañem kujeeŋanda ma kunep, be ûli bukanaku kankemmi di kâynenaku ma kupak.