Yaŋaayay yunkulay
9
Mata yaŋaayay yahaanay ebaje kûboñaku kaloom maama mbi uga ma ûbinken Emitay, di baa'poop bûngungabu bata yo bacookoorim ute di etaamay. 2 Bûngunga'ubu, bobu ma bûgiitim urebaw ugaba. Karebaku kûtiyaaraku, ya keeni Tiŋatu Tâñoyyaatu, dôo da ehikitenumay yemmi, di emeesaay, di poop kûmburuwaaku kâñoyyaaku. 3 Kujeŋandaaku kata hûridaahu hugabutahu, ya teeni Tiŋatu Tahammi Mâñoyyi. 4 Di kareba'uku, dô da Altar yata ûuru yemmi da kuyabenem ebaaliinay; dô da ekeesay poop yata yaŋaayay yemmi yacookoorumim utaaguwaaw, ban di ekopenumi ûuru. Dôo di ekeesay uyu, di kuga dô jaaru yacookoorumim ûuru da manaa yemmi, di huginkumahu hata Aroŋ hârumpemmi, di poop utaaguwaaw wata yaŋaayay. 5 Ban hatiya di ekeesay uyu, di kucookoor dô kumalaakaku kagam kêrubiŋi, kâyisum majaaŋaamu mata Emitay; ban ugeŋaw watayiil di ûnaagen tiŋatu ta kûbajumiñaku kupaseyim. Moo, ntuwa mowme mbi ulobaal mata wahaw uwe peh.6 Mata na wahaw uwu peh ubandoorim, ña bumaaŋenaabu bata Emitay, ya kunebej kukaku pooko di karebaku kûtiyaaraku kata bûngunga'ubu ma ya kuga bugoroorabu batayiil. 7 Be di karebaku kugabutaku kata bûngungabu kahammi mâñoyyi, annahaanaw âmakaaw ata bumaaŋenaabu bata Emitay oo keb ânebejedom hanor keb kajaañoojaañ. Ban poop mumulet bi ânebee'dô oo baŋarut hûsimahu hata encaamay ha nki âwaasenum kûbajumiñaku katawool, di kaaka êsukay kugam banamulent. 8 Moo, di wahaw uwe peh, Buynumabu Bunapaabu bûkine bûyisolaal di kaan, buruŋabu bata ma unebejaal Tiŋatu Tahammi Mâñoyyi, mumulet bi bûbabuli karebaku kâtiyaaraku kâñoyyaaku kata bûngungabu koo baroŋ to. 9 Moo, wahaw uwe ugam êmanjumay ma yâyisolaam di etaŋa'uye di kaan, opherta, di poop keenaayaku kagaweyim keeliit kuga bukana'uku kagawekom ma kûwaayen di kaan kûbajumiñaku katayiil kupasi ban. 10 Mata keenaaya'uku ya kugawi keb di wahaw wata huriyahu, di wata bajakenabu, di poop keenaayaku kata jâbuyooraju di Emitay. Moo, wahaw uwe peh wata ube di eniilay wagawim, ya ugawi keb be na mbi Emitay etiinoor wo ma ega waawu wunkulaw.
11 Be Kristu nakaylo ban bi aga Annahaanaw ata Bumaaŋenaabu bata Emitay, ata wahaw wajakaaw wagawim. Mata bûngungabu da anebeem buhaŋe, ban di buhaŋ poop majak, mata ntuwa ajamaat acookoorbom, ban poop ntuwa ube di etaama'uye buwoom. 12 Momakiimom na Kristu akaylom, nanebej di bûngungabu, ma akay be Tiŋatu Tahammi Mâñoyyi ma anebee'dô di hanor be nanoonan, be ntuwa di hûsim hata sîjikel, ntuwa poop hata sîmuuna; be nânebee'dô di hûsimahu hatawool ma awulolaal kapakaku kaatumbi kubawowrer. 13 Mata hûsimahu hata sîjikelasu, di hata sîmuunaasu, di poop kâgumpaku kata jibaaju jareemenim, kûliseni jaa bukanaku kammi di kûbajumiñaku, ña kûbajumiña'uku katayiil di kupasi ube tîyaŋ di siniilasu satayiil; 14 benkiteemo hûsimahu hata Kristu aakutum kûbajumiñ, ha awuum Emitay hurim Buynum Bunapaabu bantom be nanoonan, ma aali âbuy di ûyegetaw watoolaal mûndeemaanamu mâŋarewuum eketay, ma mbi ooliyaal ugorooraal be bata Emitay yaroŋaay. 15 Momakiimom ma Kristu âgawummi Apankaaw ata yaŋaayay yunkulay ya Emitay egam, mata ma akeem ma apas kûbajumiñaku ka bukanaku kulakom di ko nata yaŋaayay yahaanay, ma bukanaku ka êwoom mbi kuyab wahaw waatumbi ubawowurer wa yemmi mbi ewuliil matawool.
16 Mata na mbi yaŋaayay egawi, jake ma mîri di kaan anaw agam yaŋaaya'uyu nakete ban. 17 Mata yaŋaayay êjakoriit anaw agayom oo balakuwee'to di baroŋerabu, be ya ejak na mbi anaw umu aket. 18 Momakiimom ma yaŋaayay yâtiyaaray egawumutim bâhiput hûsim hata encaam. 19 Mata na Moyses añaaŋemmi êsukay kûboñaku kata Emitay ban, ña naŋar hûsimahu hata sibaasu, di hata sîjikelasu saŋaalim, di mumelamu, di ehulay yâyemaay, di poop maanamu mata buyaajabu baaneyim isoopu, ma âlisen kayta'uku kata kûboñaku kata yo, di poop êsukay. 20 Ma aaniil: “Hûsima'uhe, ho hûsimahu hata yaŋaayay yatoolaal di Emitay ya mbi jisoh.” 21 Ban poop di manoramu, naŋar hûsimahu ma âlisen bûngungabu, di poop wahaw peh wa kugawumem bugoroorabu be bata Emitay. 22 Moo, non ma kûboñaku kata Emitay kuloom, wahaw peh di hûsimahu ugaweyim ma unap; mata mumulet bi kûbajumiñaku kupasi hûsim bâhipowut.
Kûbajumiñaku katoolaal kupasi ban
23 Mata wahaw wagam êmanjumay yata wahaw wammi hatiya di emitay, ujoone ma ugawi ma unap di keenaaya'uku, be waawu wagam walhegenumaayaw wândom, ujoone di heenaayahu hahankom. 24 Mata Kristu anebejut tiŋatu tâñoyyaatu tagam êmanjumay yata wahaw walhegenumaayaw ta ejamaatay ecookoorum; be nanebej hatiya di emitay ma ajuum kayooŋ di Emitay ma alhaw yo matoolaal. 25 Malhegen annahaanaw âmakaaw ata bumaaŋenaabu bata Emitay, ya anebej hanor tiŋatu tahammi mâñoyyi kajaañoojaañ di hûsimahu hagawutum hatawool, be Kristu oo anebejut uyaas wameeŋe ma awul humuumahu hatawool. 26 Mata gaween mo jaa, mbi âlaameen uyaas wameeŋe kata kaŋ na etaamay ecookoorim. Be di hûbanuma'uhe, nâraŋul hanor ma awul humuumahu hatawool ma âbuy kûbajumiñaku katoolaal be nanoonan. 27 Mata an peh mbi aket hanor, ban nkit Emitay di egawool batalenabu. 28 Moomu poop kaŋ ma Kristu awuum humuumahu hatawool hanor ma âbuy kûbajumiñaku kata bukan kameeŋe. Moo, na mbi âlaañul hugabutahu, ntuwa ma âkayil bi apas kûbajumiñaku, be ma âkayil bi apaken bukanaku kammi ma kukobem d'oo.