Jesus amaaŋenaaw âmakaaw ata Emitay
8
Moo, wahaw wahammi peh wa ulobaam mata wo, malhegen nubajaale annahaanaw âmakaaw ata bumaaŋenaabu bata Emitay, ammi ma aleehom kaŋen kûrir di hulhikahu hata Âyyaw hatiya di emitay, 2 da ammi ma agawem di bugoroorabu di tiŋatu tâñoyyaatu di Bûngungabu balhegenumaayabu ba ajamaat acookoortum, be Ata Emit acookoobom.3 Mata an peh agam amaaŋenaaw âmakaaw ata Emitay, ya ajoti ma mbi ya awul opherta be bata Emitay, di poop uncaamaw wawaasenumeyim, momakiimom ma amaaŋenaaw ume atoolaal âmakaaw, mbi âbajum poop wahaw wa mbi awuu'yo. 4 Moo, non omuyeen ute di etaamay, aatubi agaween amaaŋeen ata Emitay, mata baje ban kaaku kagawiim kawulem opherta be bata Emitay non ma kûboñaku kata yo kuloom. 5 Mata bugoroorabu ba bumaaŋenaa'ubu bata Emitay kugawem, bugawut bugoroor balhegenumaayabu non baabu bagaweyim hatiya di emitay, be buga poop non bâynaataabu bata wahaw wammi hatiya di emitay. Ma ga non ma Moyses agam na Emitay eloom d'oo maama mbi acookoor Bûngungabu ma yeenool: “Mbi ujaamo ma uga wahaw peh non ma îyisim di hurimbiliŋahu.” 6 Malhegen Jesus oo awulim bugoroorabu bata humaaŋenawutaahu bahammi bata bumaaŋeen baabu bata Emitay. Mata oo agam Apankaaw ata yaŋaayay yahammi ya egam di êsukay yata yo, ban di egawi mata wahaw wajakaaw wa yoo yemmi mbi ewul.
7 Mata yaŋaayay yâtiyaaray egaween jaa non êyijeenut, joonent ma yakeel egabutay egaweeni. 8 Be Emitay di ewatateniil ma yeeniil:
“Ata Emit naane, hukahu mbi hûriiŋ
na mbi iga yaŋaayay yunkulay di êsukay yata Israyel,
di poop Judaa.
9 Yaŋaaya'uyu yeetubi enaamoor di yaayu yahaanay
ya igam di simpayiil sihaan na isohiim di kaŋen
ma îcaalhelliil di êsukay yata Ejiptu;
be ban kugawut non ma ilobiim mata yaŋaaya'uyu ya igam di buko,
momakiimom ma êenummi yeetubi ejegiil.”
10 Ban nâanul joon:
“Na mbi iga yaŋaaya'uyu di êsukay yata Israyel ban,
mbi iga kûboñaku kûmbaam di ûyegetaw watayiil,
niŋiic ko poop di sîsigirasu satayiil;
niga Emitay yatayiil, buko poop di kuga êsukay yûmbaam.
11 An aatubi alhikiten joon makeel apaalool,
be mante atiyool ma aanool:
Ûmir Ata Emit;
mata an peh mbi âmirom,
cûkumul di bukanaku kinŋetaaku, be kaŋ di kaaku kâmakaaku.
12 Mata mbi iñankiitiil ma ipas kûbajumiñaku katayiil;
ban eetunki iwollhowurer joon malesamu matayiil.”
13 Mata non ma Emitay eloom mata yaŋaayay yunkulay, ña yaayu yâtiyaaray, mbi yeeni yoo yahaanay. Mata, wahaw wagam uhaanaw na mbi uhalhen, weetubi upiyo di ûbuyo.