Melkisedeeki oo agam êmanjumay yata Kristu
7
Mata Melkisedeeki oo âyyaw ata Saleŋ, agam amaaŋenaaw ata Emitay Yahammi Wahaw Peh. Na Abrawoŋ alallom hutiikahu hata kîyyaku ka ahaatum, Melkisedeeki nakay ki kupam d'oo ma añaanool ma mbi abaj hûpiiraahu. 2 Ña Abrawoŋ nawulool dîisimu yata wahaw wa aŋallom bata hutiikahu. Moo, kañaaŋaku kata Melkisedeeki dôo deemom “Âyyaw acolaaw,” ban naga poop âyyaw ata Saleŋ daamom “Âyyaw ata kâsuumaayaku.” 3 Be an âmirut mata ampaw Melkisedeeki, di iñaawool, an âmirut poop mata êbajoorumay yatawool, ban poop an âmirut mata hûcukumahu, di hûbanumahu hatawool, ma aga non Añool Emit, agam amaaŋenaaw ata Emitay be nanoonan.4 Moo, jijuke non ma Melkisedeeki agam anaw âamak, mata ampawolaal ahaan aamom Abrawoŋ, oo nawuum dîisimu yata wahaw wajakaaw wa aŋallom bata hutiikahu. 5 Moomu poop kaŋ ma kûboñaku kata Emitay kuloom kaan, bukanaku kata di êbajoorumay yata Levi, kagam bumaaŋenaabu bata yo, mbi ya kuyab dîisimu yata bukanaku kagam kutiyiil kata Israyel, mata buko kuŋilaku kata êbajoorumay yata Abrawoŋ. 6 Moo, Melkisedeeki agawutum anaw ata di êbajoorumay yata Levi, be nayab dîisimu yata di wahaw wa Abrawoŋ aŋallom bata hutiikahu, ban Melkisedeeki nañaan Abrawoŋ ma mbi abaj hûpiiraahu, aamom a Emitay yemmi mbi ewul wahaw. 7 Malhegen jamantiir jilet ute, mata anaw añaanem an ma mbi abaj hûpiiraahu, nahaŋe sembe aahu ayabehom. 8 Be bumaaŋenaabu bata Emitay kayabem dîisimu ya kuket, be mata Melkisedeeki aamom ayaam dîisimu, Baŋiicerabu Bâñoyyaabu di bûyis kaan oo anaw ammi ma arommi. 9 Moo, malhegen nooliyaale oonaal Levi ayabem dîisimu, nancaamuncaamum poop Melkisedeeki dîisimu di humuumahu hata Abrawoŋ. 10 Mata nownu Levi oo babajorti, moo, nooliyaale oonaal oo baron di ampawool Abrawoŋ na kupammi di Melkisedeeki.
11 Mata bumaaŋenaabu bata Emitay kagam kata di êbajoorumay yata Levi, ka êsukay yata Israyel kuyabem kûboñaku kata Emitay di buko, kugaween jaa bukanaku kanapum, leetubi jooneen ma amaaŋeen aahu ata Emitay agam non Melkisedeeki agawutum ata di êbajoorumay yata Aroŋ âkayil. 12 Mata na mbi kagaanaku kata amaaŋenaaw ata Emitay kutiinoori be di êbajoorum yaayu, kûboñaku kata Emitay poop mbi kutiinoori. 13 Moo, Ata Emit atoolaal aamom Jesus Kristu a wahaw uwe uloom matawool, oo ata di êbajoorumay yaayu yaamom ya an akeel ata di buko agawutum bugoroor di Altar. 14 Mata bukanaku kûmire jak di kaan, Ata Emit atoolaal oo ata di êbajoorumay yata Judaa, moo Moyses na aloom mata bumaaŋenaabu bata Emitay, alobut makeel mata êbajooruma'uyu.
Kristu oo amaaŋenaaw ata Emitay be nanoonan
15 Moo, wahaw walobim ume, mowme uhaŋe maset, mata nubajaale amaaŋenaaw aahu ata Emitay agam poop non Melkisedeeki. 16 Mata oo ajotuti ma aga amaaŋenaaw ata Emitay non ma kûboñaku kata yo kuloom, ajotuti poop di bagawer ajamaat, be najoti mata sembaasu sata eroŋay yatawool yâbaworiitaay. 17 Mata Baŋiicerabu Bâñoyyaabu moo buloom bêenul: “Aw ugam amaaŋenaaw ata Emitay be nanoonan non ma Melkisedeeki agam.” 18 Momakiimom ma kûboñaku kata Emitay kapiyaaku kuwalhumibom, mata kubajut sembe, ban kubajut poop ênjariŋ. 19 Mata kûboña'uku kata Emitay kugawut wah wakeel ma ûrir, be mowme nuyabaale ban wahaw wahammi waamom wa ukobaalem di wo waalim ugawolaal ûriiŋaal ta Emitay yemmi.
20 Mata Emitay enuunuum na Kristu agawim amaaŋenaaw ata yo, be na kata di êbajoorumay yata Levi kugawim bumaaŋenaabu bata yo, enuurut. 21 Malhegen na Emitay egam Jesus ma aga amaaŋenaaw ata yo, di enuur ma yêenul:
“Înje Ata Emit ninuure, eetubi iwatatenooro:
‘Aw ugam amaaŋenaaw ûmbaam be nanoonan.’ ”
22 Momakiimom ma Jesus âgawummi anaw ajummi be bata yaŋaayay yahammi.
23 Mata, mata eketay, momakiimom ma bumaaŋenaabu bata Emitay kûmeeŋummi, mata eketay êwalhoriitiil ma kugoroor bo be nanoonan. 24 Be ma Jesus ammi ma arommi be nanoonan, mo ma humaaŋenawutaahu hatawool di Emitay, heetubi hutiinooreri. 25 Momakiimom ma âaliyummi apaken bukanaku kakayum be bata Emitay di kañaaŋaku katawool, mata oo anaw arommi be nanoonan a mbi ya alhaw yo be batayiil.
26 Moo, nusoholuwaale annahaanaw âmakaaw ata bumaaŋenaabu bata Emitay agam non ume, anapum, aakutum batila, aakutum kûbajumiñ, aakutum poop masema, âhugoriitum bukanaku kata kûbajumiñaku, ban nagawi tiŋatu tahammi tiŋ peh hatiya di emitay. 27 Mata oo agawut non yahaan yaayu yata bumaaŋenaabu bata Emitay, kagawem keenaayaku kukaku pooko be bata kûbajumiñaku katayiil, ban nkit di kuga kata êsukay, be oo naga heenaaya'uhu di hanor na awuum eniilay yatawool. 28 Mata di kûboñaku kata Emitay, bukanaku kaalim kulo di kûbajumiñ, kagaweyim yahaanay yata bumaaŋenaabu bata yo, be hurimahu hâyoolim ha Emitay enuurum, hugam ma Añool yo acolum, ajotim ma aga annahaanaw âmakaaw ata bumaaŋenaabu bata yo be nanoonan.