6
Moo, uwalhaa'bo balhikitenerabu bûtiyaarabu baloom mata Kristu, ma onkenaal ki usohaal baabu bagawem an ma ahaŋ mak di kâynenaku, ma aatinki ulaañaal be di balhikitenerabu baloom mata wahaw wâtiyaaraw waamom noon: jawatatenooruwaaju jata wahaw wajakutaaw wagawem an aket, di kâynenaku ka ûynenaam di Emitay, 2 di mata balhikitenerabu baloom mata jâbatisaju, di bata jagawaju jata uŋenaw di anaw, di bata jalhaalaaju jata di kuketaaku, di poop bata batalenabu baatumbi bubawowurer. 3 Moo, Emitay êkin jaa, mo ma mbi ya ugawaal.4 Mata bukanaku kayaam majaaŋaamu mata Emitay, kajammi ban mâsuumaamu mata wahaw wata hatiya wa ewulolaam, kayaam ban Buynum Bunapaabu; 5 kajammi mâsuumaamu mata elobay yata Emitay, di kûmir poop mata sembaasu sata etaamay ya mbi êkayil; 6 be ban di kubet kâynenaku katayiil, bukana'uku keeliit kugawi joon ma kuwatatenooro, mata buko koku ma kuriiŋem joon di Añool Emitay di êkrusay, ma ya kuga êsukay kurembeelool.
7 Mata etaamay yayabem mumelamu ma Emitay êlubewuum, ega jaa bukanaku kagoroorem ma kujal, di ebaj hûpiiraahu di yo. 8 Be etaamay yata ûlhantumaw, di kuyawaaku ejakut makeel. Etaama'uyu Emitay mbi ega yo di kapaawaaku, ban di ereemen yo.
9 Moo, kutiyaay ka uboolaatum, palimo ma ulobuum ume, be nûynene di kaan mbi jiga wahaw wajakaaw wâŋarewuum kapakaku. 10 Mata Emitay yoo untuwa anaw acolutum, aalim âwuken bugoroorabu ba jigam, di poop jâkinaju ja jîkinyom, mata ma jeenemmi bukanaku kanapaaku, non ma jemmi ma jigawem di mo be jaat. 11 Momakiimom ma ûli ûkinummi ma anoowan ata di miwuul, nanken ma asoh tir ma akob wahaw wa jikobem di wo, ii be di hûbanumahu. 12 Mata ûli ûkint ma jiga bukanaku kâŋekim, be nûkine ma jisoollhen bagawerabu bata bûynenaabu kasoom lit, ka mbi kuyab wahaw wa Emitay yemmi mbi ewul, mata ma kubaam kâynenaku, di poop humuntenahu.
Emitay ya ega non ma eloom
13 Mata na Emitay emmi Abrawoŋ mbi ewulool wahaw wa yemmi mbi ewul, be ma ebajutum anaw ahanyom a mbi enuurum, ña di enuurooro 14 ma yeenool: “Mânooman mbi iwuli hûpiiraahu, ban mbi iga êbajoorumay yatayi ma emeeŋ.” 15 Moo, ma Abrawoŋ amuntemmi ma akob, ña mo ma âyabummi wahaw wa Emitay yemmi mbi ewulool. 16 Mata anaw na mbi aan anuur, mbi ânuurum anaw ahaŋoom, mata januuraju jibanem bûñakoor peh. 17 Malhegen na Emitay êkimmi êyis jak bukanaku ka yemmi mbi kuyab wahaw wa mbi ewul, ban di êyisiil di kaan yoo mumulet bi egawut wahaw wa eloom mata wo, momakiimom ma êlobummi, ban di enuur. 18 Mata baje wahaw ugaba wa Emitay eeliitum bi egawut, waamom wa yoo eeliitum poop ecal mata wo. Wahaw uwu ulaal jaamaam di uŋenaw wata yo, woo ugawewolaam ma ûlhiŋaal, ma ooliyaal ukobaal wahaw wa eloom di kaan mbi ewul. 19 Moo, ûynenaal ma kakobaku ka ukobaalem di ko, kusoh sâaroorasu satoolaal non ma hulankaar husohem ebaarukay. Kakoba'uku kubaje sembe ma kunebej dâada di hûridaahu hata di Eluupay yata Emitay; 20 daamom da Jesus anebeem kâtiyaar be bata ulaal, ma Emitay egawool ma aga annahaanaw ata bumaaŋenaabu bata Emitay be nanoonan non ma Melkisedeeki agam.