5
Mata annahaan peh âmakaaw agam amaaŋenaaw ata Emitay, ya ajoti di tutaru tata bukanaku ma agoroor be bata Emitay mata êsukay, ma mbi ya aŋar opherta be bata Emitay, di poop keenaayaku kagaweyim mata kûbajumiñaku kata êsukay. 2 Moo, ma agam anaw abajutum sembe, mo ma âaliyummi poop amunten di bukanaku kanamulentum makeel, di poop kaaku katilem. 3 Momakiimom ma mbi âgawum heenaayahu hata kûbajumiñaku kata êsukay, di poop katawool. 4 Mata an âjotooruworiit be bata hiŋa'uhu mata ma hujakum, be Emitay ejotewoom non ma ejotum Aroŋ.5 Moomu poop kaŋ ma Kristu agawoorowtum ma aŋar hiŋa'uhu, ma aga annahaanaw âmakaaw ata bumaaŋenaabu bata Emitay, be Emitay ewuloohom ma yeenool:
“Aw Añoolom, jaat înje ibajim.”
6 Ban di yêenul tiŋ taatu joon:
“Aw ugam annahaanaw âmakaaw ata bumaaŋenaabu bata Emitay be nanoonan, non ma Melkisedeeki agam.”
7 Malhegen Jesus oo ube di etaama'uye, nâŋaaŋuloŋaaŋulom di mukulamu dilo ma alhaw Emitay yaalim ehikulool di eketay, ña di ejamool, mata oo ya ajam di yo. 8 Moo, palimo ma agam Aŋilaw ata Emitay, be hûlaamahu ha âlaamum hûyise kaan oo ya ajam di yo. 9 Momakiimom na wahaw peh ûwuñenim matawool, ña naga anaw akiim kapakaku kaatumbi kubawurer be bata bukanaku peh kajamem d'oo. 10 Ña Emitay di egawool aga annahaanaw âmakaaw ata bumaaŋenaabu bata Emitay non ma Melkisedeeki agam.
Ujaamo ma aatuba ubet kâynenaku
11 Malhegen nubaje wahaw lhay wa mbi ulobaal mata wahaw uwe, be gîitiye ma mbi unamulenuu'wo, mata jînamulenaaliyoriit. 12 Mata nownu ii be jaat, jeeliyeene jigaween bulhikitenaabu, be mowme jijoone ma anaw alhikitenuul elobay yata Emitay êtiyaaray. Moo, jake ma anaw awuluul miilhamu jiraah, be ntuwa siŋaaŋ sanke. 13 Mata anaw arommi ma araahem, anaw umu âmirutum maame di maame, mata naroŋ di aŋilaw. 14 Be siŋaaŋasu sankaasu, soo be bata bukanaku kagam yahaanay kanamulemmi ban, kâmiim maame di maame.