4
Mata Emitay yeenolaam mbi unebejaal tiŋatu tata kahepulenaku, moo jake ma ujaamuwaal ka mbi an akeel ata di miwuul âpuul ma atukanebee'dô. 2 Malhegen ulaal peh nujamaajamaam elobay yâsuumaay non ma buko kujayom; be eloba'uyu ya kujammi egawut majake di buko, mata kuyabut yo di kâynen. 3 Moo, ulaal jâynenaam, mbi unebejaal tiŋatu tata kahepulenaku ta Emitay eloom mata to, na yemmi:“Înje ibirikum ninuur ma êenul, bukana'uke keetubi kunebejurer tiŋatu tata kahepulenaku.”
Emitay yoo eloomom, palimo ma ehepulemmi bugoroorabu bata yo noo niŋanu na êwwemmi etaamay. 4 Mata baŋiicerabu bâñoyyaabu mo ma buloom tiŋ taatu mata hukaku hagakom hutok di kugaba, ma bêenul: “Di hukahu hagakom hutok di kugaba, Emitay di ehepulen bugoroorabu peh ba egam.” 5 Di bulob joon tiŋ taatu ma bêenul: “Buko keetubi kunebejurer tiŋatu tûmbaam tata kahepulenaku.” 6 Mata bukanaku kâtiyaaraku kajammi elobay yâsuumaay, kunebejut di tiŋatu tata kahepulenaku kata Emitay, mata ma kulatum kajam di yo. Be mbi baj bukan kaaku ka mbi kûnebee'dô. 7 Momakiimom ma Emitay eñuurummi huk haahu ha eloom mata ho niŋanu di butumabu bata David ma yêenul: “Jaat, jijam jaa hurimahu hata Emitay, aatuba jenk ûyeget.”
8 Malhegen non Josuwe nawuleene êsukay tiŋatu tata kahepulenaku, Emitay yetunki elobeen joon mata huk haahu hata kahepulenaku. 9 Momakiimom hukahu huroŋ bo ha êsukay yata Emitay mbi kuhepulen, non ma Emitay ehepulemmi nagam kukaku hutok di kugaba. 10 Mata anaw anebeem tiŋatu tata kahepulenaku ka Emitay eloom mata ko, mbi ahepulen bugoroor peh, non ma yoo ehepulemmi poop bugoroor peh. 11 Moo, ugawaal di sembe ma mbi unebejaal tiŋa'utu tata kahepulenaku, ma aatuba mbi an akeel alako tîyaŋ non ma buku kugam kalatum kajam di Emitay nownu.
12 Mata elobay yata Emitay yoyu ma erommi, ban di ebaj sembe. Ehaŋe mayab elaam yanawim urebaw poowo. Ya enebej be dâada di ajamaataw di tutaru tata yâarooray, di bûyegetabu batawool, di poop tutaru tata sîjulhakasu, di mûlhooramu; ban ya êhikul bûyegetabu, di êsigiray yata ajamaat. 13 Moo, bajut wah wakeel wâwwenim wammi ma ûñoorom kayooŋ di Emitay. Mata wahaw peh wa êwwemmi wowu ma ugam way di kûkilaku kata yo, yaamom ya ulaal peh mbi ûyisaal wahaw wa ugawaam.
14 Moo, ujuumaal tir di kâynenaku ka ookaam, mata nubajaale annahaanaw âmakaaw ata bumaaŋenaabu bata Emitay aamom Jesus, agam aŋilaw ata Emitay, anebeem hatiya di emitay. 15 Mata annahaanaw atoolaal âmakaaw ata bumaaŋenaabu bata Emitay, oo anaw aalim amunten di bukanaku kahulutum kalo di kûbajumiñ. Mata oo nabuntenibuntenim di wahaw peh non ulaal, be alowut di kûbajumiñ. 16 Moo, ûhugaal kâynenaku di hulhikahu hata kabonketaku, ma mbi ooliyaal ubajaal kañankiitaku, di poop jaanenaju na mbi usoholuwaa'jo.