Jesus nahaŋe Moyses
3
Moo, kutiyaay ka Emitay êwoom, jagam bukanaku kata hatiya, jiga to ûyegetaw watawuul di Jesus agam Aboñaayaw ata Emitay, ban naga annahaanaw âmakaaw ata bumaaŋenaabu bata Emitay, akiim kâynenaku katoolool. 2 Mata oo anaw âynenaayaw be bata Emitay yabolloom bi aga bugoroorabu, non ma Moyses poop agam anaw âynenaayaw di eluupay yata yo. 3 Moomu poop kaŋ ma Jesus ahammi mabaj kasal Moyses, mata anaw acookoorum eluupay, nahaŋe mabaj êriibiina eluupa'uyu. 4 Mata eluupooluup ebaje anaw acookooryom, be Emitay yoo ecookoorum wahaw peh. 5 Malhegen Moyses nagagam agorooraaw âynenaayaw di eluupay yata Emitay, mata ya añaaŋen mata wahaw wâreesewuum wa Emitay mbi elob. 6 Be Kristu oo Aŋilaw âynenaayaw di eluupay yata Emitay. Moo, ulaal ugawaam eluupa'uyu yata Emitay, be ulaal basoheraal jak kâynenaku, ma ukobaal wahaw wa ukobaalem di wo ii be di hûbanumahu.Kahepulenaku kata bukanaku kata Emitay
7 Momakiimom ma buynumabu bunapaabu bêenummi:
“Jaat jijam jaa hurimahu hata Emitay,
8 aatuba ûyegetaw watawuul wank
non ma simpawuul sihaan sigam na kulatum Emitay di ekinkay, ma kulaso yo.
9 Malhegen simpawuul sihaan, palimo ma kujuum wahaw wa igawiim di ekinkay ujaañaw wârimmi bukanaku egaba,
be di kûhopom ma kulasuwom.
10 Momakiimom ma îbirikummi di buko,
ña nêenul: Buke ya kutilimben d'înje di sîsigirasu satayiil nanoonan,
mata kûkint kûmir buruŋabu bûmbaam.
11 Momakiimom ma înuurummi di hubirikahu hûmbaam ma êenul:
Bukana'uke, keetubi kunebejurer tiŋatu tûmbaam tata kahepulenaku.”
12 Moo, kutiyaay jiga to ûyegetaw watawuul ma an akeel ata di miwuul, aatuba abaj bûyeget bajakut, ma bugawool ma aatuba abaj kâynen poopii nârang Emitay yaroŋaay. 13 Be, mbi ya jicecenoor kuka'uke peh, kâwoollim “Jaat” ma an aatuba bûyegetabu batawool bank mata ma kûbajumiñaku kubuntenoom. 14 Mata ulaal nugawaale ban bukanaku kata Kristu, be ulaal bankeneraal ma ujuumaal tir di kâynenaku ka ûynenaam di hûcukumahu, ii be di hûbanumahu.
15 Mata baŋiicerabu bâñoyyaabu mo ma buloom bêenul: “Jaat jijam jaa hurimahu hatawool, aatuba jiwaa'bo ûyegetaw watawuul ma wank non ma simpawuul sihaan sigam na kulasuwommi.” 16 Kama yaymoom kajammi Emitay, ban di kuhuusuu'yo? Ntuwa bukanaku peh ka Moyses âcaalhellom di êsukay yata Ejiptu? 17 Kama yaymoom ka Emitay ebirikum di buko ujaañaw bukanaku egaba? Ntuwa bukanaku kaganom kûbajumiñaku di yo ka sihuluŋaayasu satayiil sitalim di ekinkay? 18 Kama yaymoom ka Emitay enuurum kaan, keetubi kunebejurer tiŋatu tata yo tata kahepulenaku? Ntuwa bukana'uku kahuusuuyom? 19 Moo, nujukaale ma kunebejutum tiŋatu tata kahepulenaku mata ma kûynentuyom.