Kapakaku kâmakaaku
2
Momakiimom ma mbi ûgawumaa'to ûyegetaw watoolaal, ma usohaal lit malhegenumaayamu ma ujamaam, ma aatuba mbi ûcaalhureraal di mo. 2 Mata elobay ya kumalaakaku kuloom, ebaa'jaa sembe ma an peh ahuusuuyom ma alo di kûbajumiñaku nalesi, 3 bu mbi urembeelaal kapakaku karem ume, numellhaal? Mata Ata Emit aamom Jesus, oo aloom kâtiyaar mata kapaka'uku; ban bukanaku kajammi mata ko, di kûyisolaal kaan, koo wahaw walhegenumaayaw. 4 Ban Emitay di êyis kaan elobay ya kuñaaŋenem malhegen, mo ma egawumiim ma kuga sîmanjumasu, di poop miñamu mata sembaasu sata yo, di êgiiterii'poop mâseeliyaamu ma Buynum Bunapaabu buwulem non ma bûkimmi.Kristu nawulolaal kapakaku
5 Malhegen, Emitay ntuwa kumalaakaku ewuum sembaasu ma mbi kuga yahaanay yata etaamay yunkulay yâreesewuum, yaamom ya ulobem mata di yo. 6 Be di kareb kaaku, baŋiicerabu bâñoyyaabu di bêenul:
“Kama ajamaataw, oo aymoom a mbi uwollho?
Añool ajamaataw, oo aymoom a mbi unongoor matawool?
7 Ban nugawool ahaŋ mâtiiti jinŋet kumalaakaku,
nuwulool kasalaku kâamak, di poop êriibiinaay.
8 Nuga poop wahaw peh ma ulako di uŋenaw watawool.”
Malhegen wahaw peh egam di uŋenaw watawool, ewalhut bo wah wakeel. Be, be jaat wahaw peh ulakuworut di uŋenaw watawool.
9 Moo, nujukaale Jesus agawim ma ahaŋ mâtiiti kumalaakaku, be mata ma âlaamum ma aket be bata êsukay peh, momakiimom ma Emitay ewulumoom kasalaku kâamak, di êriibiinaay mata kañankiitaku kata yo. 10 Mata Emitay yagam âwwenaaw, yakiim ma wahaw peh ûwu, egam Jesus âyyaw ata kapakaku, ban di egawool ma aga anaw acolum mata hûlaamahu hatawool, ma mbi âŋarul kuŋilaku lhay be di majaaŋaamu.
11 Mata anaw agawem bukanaku ma kunap, di bukanaku kagawim ma kunap, buko peh kûcaalhumul di ampawaayaw anoraw. Momakiimom ma Jesus âpuñowumoriitum kaaniil kutiyool, 12 ma aan Emitay:
“Mbi iñaaŋen kutiyom mata kañaaŋaku katayi;
mbi iyeeŋ ma isali di tutaru tata kâmebooraku katayiil.”
13 Ban nâanul joon:
“Înje mbi iga kâynenaku kûmbaam di Emitay.”
Nâanul joon: “Înje ume di kuŋilaku ka ewulommi.”
14 Moo, ma kuñoolool kugam bukanaku kaakum kumuumaku, di hûsimahu, momakiimom poop ma oo âanowummi non buko, ma mbi eketay yatawool ega ma ahaat Diyaabu yaakum sembaasu sata eketay, 15 ma mbi aali ahikul bukanaku peh kagam emiikeelay yata bûkolaabu bata eketay be nanoonan. 16 Mata malhegen, akayloot bi aanen kumalaakaku, be âkayil bi aanen kuñool Abrawoŋ. 17 Momakiimom ma agawumim ma anaamoor di kutiyool di wah peh, ma bi aali aga annahaanaw âmakaaw ata bumaaŋenaabu bata Emitay, añankiitem, agam anaw âynenaayaw di Emitay, a mbi apas kûbajumiñaku kata ejamaatay. 18 Moo, ma amuntemmi di kabuntenaku, mo ma âaliyummi poop aanen bukanaku kalom di kabuntenaku.