KAYTAKU KAŊIICIM BE BATA
ÊBREWWI
Emitay di êbaahulolaal
1
Noo niŋanu, di uyaas wameeŋe, di poop bagawer bameeŋe, Emitay êlobulobummi simpawolaal sihaan di buñaaŋenaabu bata kûboñaku kata yo. 2 Be mowme di hûbanumahu, di elobumolaal di Añool yo, aamom a yoo êwwenummi etaamay, ban di egawool ma akil wahaw peh. 3 Mata oo agam ehikitenumay yata majaaŋaamu mata Emitay, naga haanaahu halhegenumaayahu hata yo; oo asoom poop wahaw peh wata etaamay di sembaasu sata elobay yatawool. Ban, na awuum humuumahu hatawool ma apas kûbajumiñaku kata ejamaatay,a nakay ki aleeho di kaŋen kûrir kata Âyyaw âmakaaw hatiya di emitay.b 4 Momakiimom ma Emitay êgawumoom ahaŋ kumalaakaku, ban di ewulool kañaaŋakuc kahammi katayiil.Añool Emitay nahaŋe kumalaakaku
5 Mata Emitay yeenut amalaak akeel:
“Aw Añoolom; moo, jaat înje ibajim.”
Yeenut poop amalaak akeel:
“Înje mbi iga ampayi, aw nuga Añoolom.”
6 Ban na ebollom Añool yo âtiyaaraw be di etaamay, di yêenul:
“Kumalaakaku peh kata Emitay kûbinkenool.”
7 Ban di elob mata kumalaakaku ma yêenul:
“Înje igam kumalaakaku kûmbaam ma kuga ehentelaay,
niga poop bugorooraabu bûmbaam ma kuga ûlelempaw wata sambunasu.”
8 Be di elob mata Añool yo ma yêenul:
“Aw Emitaye, hulhikahu hatayi mbi hulako to be nanoonan;
mata mbi uga âyyaw a mbi asoh êsukay yatawool di malhegenumaayamu.
9 Mata nûkine malhegenumaayamu, ma ulat majakutaamu.
Momakiimom ma Emitay, yagam Emitay yatayi, êŋarummi mûkiramu mata êsuumaay êyyenumi,
ban di egawi uhaŋ kupaali.”
10 Ban di yêenuu'joon:
“Di hûcukumahu aw Ata Emit ujuumemmi etaamay,
ban poop uŋenaw watayi, ucookoom hatiya di emitay.
11 Ban hatiya di emitay, di poop etaamay mbi êbuyo,
be aw mbi ulako to be nanoonan, mata wahaw uwu peh, mbi uhalhen non wañ.
12 Mata wahaw peh mbi ubooñi non humanta; di utiinoori poop non an atiinoore wañ.
Be aw, mbi ôomi di manoramu; ootubi ûbuyowurer.”
13 Emitay elobut poop di amalaak akeel ma yeenool:
“Uleeho ute di kaŋenom kûrir,
be na mbi iga kûsuumutaaku katayi,
ma kuga non kapenk da mbi ujuumen ûkandumaw watayi.”
14 Kama ntuwa kumalaakaku koo kugam uynumaw wammi ma ugoroorem be bata Emitay ka eboñem ma kupooy bukanaku ka mbi kêemi di kapakaku?