KAYTAKU KA PAWLU AŊIICUM BE BATA GRÎSIYA YATA
GALAASIYA
Pawlu nasaap grîsiya yata Galaasiya
1
Înje Pawlu jagam âmakaaw ata Jesus Kristu, înje iŋiiculuum kayta'uke. Be igawut âmakaaw ata Jesus mata ejamaat, igawutoo'poop mata an akeel, be igawool mata Jesus Kristu, di poop mata Emitay yaamom Ampawool, yalhaalellom Jesus di kuketaaku. 2 Ûli di kutiyaay kammi ute d'înje, ûli uŋiiculom kayta'uke ma usaap sîgrisiyaasu sata bantaabu bata Galaasiya. 3 Nîkine ma Emitay yaamom Ampawolaal, di Ata Emit aamom Jesus Kristu, awuluul kañankiitaku, di kâsuumaayaku; 4 aamom awuum humuumahu hatawool mata kûbajumiñaku katoolaal, ma ahikulolaal di etaama'uye yajakutum ya oomaan di yo, non ma Emitay yaamom Ampawolaal êkimmi, 5 ma mbi yoo esali be nanoonan. Amiin.Elobay yâsuumaay yeemo yanor
6 Be înje nîjanaŋene ma jigalom ume hilij cab, ma jibet anaw âwolluum mata kañankiitaku kata Kristu, ma jisoh elob yaayu. 7 Ban malhegen eloba'uyu, ntuwa elobay yâsuumaay. Be nîmire kaan bukan kaaku kemmi ma kûlaamenem di miwuul, ma kûkin kûtiiw elobay yâsuumaay yata Kristu. 8 Be palimo ûli, be mante amalaak âcaalhumulo hatiya di emitay, ma alobuul elob yaayu yâbutim di yaayu ya ulobuum, anaw umu Emitay mbi egawool kapaawaaku. 9 Ma ilancenuu'mo joon non ma ilobuum eenuul: Anaw a mbi añaaŋenuul elob yaayu yâbutim di elobay yâsuumaay ya jîynemmi ban, anaw umu Emitay mbi egawool kapaawaaku.
10 Kama soŋo pîya înje ilobem di mo ma mbi bukanaku kusalom? Be mante ma mbi Emitay esalom? Be ga jaa înje ilobem di mo ma mbi bukanaku kusalom, ña kama înje igawut agorooraaw ata Kristu.
Emitay egam Pawlu âmakaaw ata Jesus
11 Moo kutiyaay, nîkine ma jîmir kaan elobay yâsuumaay ya iñaaŋenem, êcaalhumuloot di ajamaat, 12 mata ntuwa di ajamaat niyabumuloyom, ntuwa poop ajamaat alhikitenonyom. Be Jesus Kristu ômayiisonyom.
13 Miwuul jijame mûmbaam, maama ya igam napiyaanu înje di buruŋabu bata jûdewwi, non ma îlaamemmi di sembe grîsiya yata Emitay, ma îkin îbuyeen yo. 14 Mata di buruŋabu bâtooli bata jûdewwi, di kupaalom peh ka uwoogum buya, înje ihammi masoo'bo lit, ma ya iga non ma mûndeemaanamu mata sîmpawoli sihaan muloom.
15 Be mata kañankiitaku kata Emitay, di êwojulom ma êwoolom înje babajoruti, 16 ma êyisom Añool yo, ma mbi eeli iñaaŋen bukanaku kagawutum jûdew elobay yata yo. Be irinkut an akeel, 17 ilaañut poop be Jerusaleŋ baabu kaaku kasingommi kuga kumakaaku kata Jesus, be nijaŋen be Arabiya, ban inkit nîlaañul be Damaasku.
18 Be na ujaañaw ûhaaji ugam ubawe, nikay be Jerusaleŋ ma nki ûjukoorul di Pedru, ban nilako bo kukaku kunŋen di hutok. 19 Be ijukut kumakaaku kaaku kata Jesus, ma ijuk keb Tiyaagu aamom atii Ata Emit.
20 Moo, wahaw wa iŋiiculuum, ntuwa mûcal. Emitay êmire kaan malhegen.
21 Ban nikay be di bantaabu bata Siiriya, di bata Siliisiya. 22 Be nownu grîsiya yata Kristu yammi di bantaabu bata Jûdeya, koo bâmirorutom; 23 ma kujam keb maama bukanaku ya kuloom mûmbaam di kaan, anaw a ya âlaameniim mata buruŋabu bata Jesus, maame omañaaŋenem di bukanaku mata buruŋa'ubu ba âkinemmi âbuyeen. 24 Ña ya kusal Emitay mata wahaw wa egawommi.