KAYTAKU KA PAWLU AŊIICUM BE BATA GRÎSIYA YATA
GALAASIYA
Hûcukumahu hata kayta'uke
Galaasiya yoo êsukay yata di bantaabu bata Aasiya yinŋetaay non ma deelim di juki di maapa. Moo, ûmirutaal jak praasas sândom di yo. Mata Pawlu, di bûkayabu batawool bûtiyaarabu bata jañaaŋenaju jata elobay yata Emitay, no na âcukum êgrisiyaay yata bo (Bag 13—14), ban di bûkayabu batawool bugabutabu, di poop baabu bûhaajutabu, nakay ki ayuugelliil (Bag 16:6; 18:23).
Mata nownu bukan kaaku, moo deeli ga jûdewwi ya kulhikiten êsukay di kaan, bukanaku kagawutum jûdew mbi kugawi huhaanaahu hata yîinaay, ban mbi ya kuga non ma Kûboñaku Kapiyaaku kuloom ma mbi keeli kubaj kapakaku. Ña bûynenaabu bata Galaasiya di kûkin ma mbi kuyab hurima'uhu. Ña Pawlu naŋiic kayta'uke ma agawiil kulaañ be di kâynenaku katayiil kûtiyaaraku. Mata Jesus Kristu alhikitemmi Pawlu Elobay Yâsuumaay (Gal 1:11-12). Nañaaŋeniil kaan kapakaku nooliyaale ubajaa'ko, ulaal bâynenaale di Ata Emit atoolaal aamom Jesus Kristu. Nâyis poop kaan, bukanaku kagawutum jûdew keeliye kuga kuñool Abroŋ buko basohoore di Kristu (Gal 3:29). Nâyis poop di kaan jagawaju jata non ma Kûboñaku Kapiyaaku kuloom jîgaworiit an ma abaj kapak. Ban nâyis di kaan Buynumabu bata Emitay bulako jaa d'ulaal, jake ma bagawerabu batoolaal bûyis kaan boo bobu d'ulaal (Gal 5:22-23).