KAYTAKU KA PAWLU AŊIICUM BE BATA GRÎSIYA YATA
EPHESU
Hûcukumahu hata kayta'uke
Uytaw wapiyaaw wata kayta'uke ubajut kañaaŋa'uke “be bata Ephesu” di versikulu êtiyaaray. Moo deeli kaan di kuwaa'to êwaaŋay ta oolim uŋiic kañaaŋooñaañ kata grîsiya. Moo ûkin jaa uboñ ko be bata grîsiya yata êsuk yakeel, nuŋiic to kañaaŋaku kata yo. Moo, keeliye kuga poop non kaytaku kaŋiiculim be bata bukanaku kata Emitay kammi Gine-Bisaw. Pawlu oo aŋiicum kayta'uke di manor di kata Kolosu, di kata Philemoŋ (Eph 6:21; Kol 4:7-9; Phim 10-12), sitaŋa'usu oo di ekullhay bo Rooma, moo, deeli ga na ujaañaw ûrimmi bukanaku êhaaji, di ugaba, be mante na ûrimmi bukanaku êhaaji, di ubakiir (62, 64) na aŋiicukom.
Ban nalhikiten dô wahaw lhay wajakum noon wata mata kasohooraku, kaamom kasohooraku kata di Jesus di poop katoolaal kagam non Humuumahu hata Kristu. Nalobolaal poop, ma ooliyaal ugaal di sembe ma usohooraal di kâsuumaayaku, ma ooliyaal usohaal jak kasohooraku ka Buynum Bunapaabu buwulem (Eph 4:3).
Moo, grîsiya yo egam poop non eluup da Kristu Jesus agam poop non huwaaliisahu hata kâjajaku kata yo hasooyom (Eph 2:19-20); di ega poop non âbutuwa ata Kristu (Eph 5:21-33).