4
Miwuul poop jakiim emiikeelay, mbi ya jiga wahaw wacolum be batayiil, mata jîmire kaan jibaje poop anaw akiluum agam Ata Emit atawuul, ammi hatiya di emitay.Kurimaku kata kûcecenaku
2 Jenken ma ya jilhaw Emitay, di jiga to poop ûyegetaw watawuul ma ya jipooy, ban di jeen yo jêrejep. 3 Di jilhaw poop Emitay be bâtooli, ma yeeli êbabul êtingaay ma ooli uñaaŋen elobay yata yo, ma mbi huhaanaahu hata Kristu heeli hûmiri, mata momakiimom ma êemummi di ekullhay. 4 Di jilhaw yo poop ma huhaanaa'uhu mbi heeli huñaaŋeni jak, non ma mbi huñaaŋeni.
5 Bukanaku kagawutum bûynenaabu, mbi jijaalho di buko, ma ya jiga jak, miwuul balakuwer tanor di buko. 6 Baloberabu batawuul poop, di bûsuum non miñ masisim, ma mbi jîmir maama mbi jeeli jilaañen anoowan jak.
Tikiku koo di Oneesimu
7 Atiyolaal Tikiku a iboolaatum, agam agorooraaw alhegenumaayaw, a ommi tanor ma ugoroorem be bata Ata Emit,a oo mbi añaaŋenuul maama înje emmi ube. 8 Momakiimom ma îboñumuluwool, ma mbi jeeli jîmir maama ûli ommi ube, nagawuul poop jîwaayen. 9 Be mbi kûreboorul di Oneesimu a iboolaatum, agam atiyolaal alhegenumaayaw, agam poop anaw ata di miwuul, ma mbi kuñaaŋenuul wahaw peh wagam ube.
10 Aristarku a ommi di ekullhay, najaalheluul. Markus poop a kugawoorum di Barnabe, a iñaaŋenuum ban matawool, na mbi âriiŋul baabu di miwuul, di jiyaañuwool sûum. 11 Jesus poop a keenem Justu, najaalheluul. Moo, buke keb kagam bûynenaabu kagam jûdew, ka ugoroorem, kaanenewommi noon di bugoroorabu bata kâyyaku kata Emitay.
12 Epaaphras agam agorooraaw ata Kristu ata di kaasaaku katawuul, oo poop najaalheluul. Oo anaw ajummi tir di kalhawaku kata Emitay hukoohuk be batawuul, ma mbi jeeli jîlhiŋ, kâynenaku katawuul poop di kank, ma mbi jeeli jiga wahaw peh wa Emitay êkimmi. 13 Moo, înje neeliye ilob matawool, ma jeeli jîmir maama agoroorum di sembe be batawuul, di kata êsukay yata Lawodiseeya, di poop kata Iyerapolis. 14 Lukas agam abuunenaaw a înje iboolaatum, di poop Demas, kujaalhelluul.
15 Di jijaalhenom kutiyolaal kammi Lawodiseeya, non Ninpha a grîsiya êmeboorem yanŋool. 16 Moo, na mbi kayta'uke kupiseni ta jemmi, ban di jiga poop ma kupiseni di grîsiya yata Lawodiseeya. Ban miwuul poop di jipisen kaaku kâcaalhumulobom. 17 Di jeen Arkipu agoroor jak bugoroorabu ba Ata Emit awuloom, ma aali ahempeleŋ bo.
18 Înje Pawlu, înje iŋiiculom ume di uŋenaw wûmbaam ma ijaalhenuul. Be jiwolho kaan, inja umu di ekullhay.
Moo, kâsuumaayaku kata Emitay, kulako di miwuul. Amiin.