3
Be miwuul, miwuul jilhaalellim di manor di Kristu di kuketaaku. Moo, jiga ûyegetaw watawuul di wahaw wammi hatiya di emitay, daamom da Kristu ammi ma aleehom di kaŋen kûrir kata Emitay. 2 Moo, jenken ma jinongoor mata wahaw wammi hatiya di emitay, ma jiwaa'bo wata di etaamay; 3 mata miwuul jikete ban; moo, eroŋay yatawuul yoyu ma êñoorim di Kristu ammi di Emitay. 4 Mata Kristu oo agam eroŋay yatoolaal yalhegenumaayay, momakiimom na mbi âraŋul, mbi jiraŋoor di manor d'oo, ma mbi jêemi di majaaŋaamu matawool.
Bagawerabu buhaanabu di baabu bunkulabu
5 Moo, jibuj hunoonahu hammi di miwuul wata ube di etaamay, haamom: kâmooraaku, kâgawikooraku, di mâsuumaamu ma eniil ajamaat âkinem, di kânongikooraku, di poop êwulaataay yagam poop non keenaayaku kata ûkiinaw. 6 Moo, mata wahaw uwu, mbi uwuu'mo hubirikahu hata Emitay, di hûlowum bukanaku kâjamoriituyom. 7 Be malhegen miwuul poop kâtiyaar, di bagawera'ubu jilakuwemmi di bo.
8 Moo, mowme jiwalen bagawera'ubu peh, bagam non hubirikahu, mâlhapitamu, di majakutaamu, di kûgelaku, di poop jâlobikooraju jâcaalhumewuum di utumaw watawuul. 9 Aatuba ya jical jiwul kupaaluul, mata jîjupuluwe ban hunoonahu hatawuul hapiyaahu, di poop bagawerabu bata ho. 10 Moo, mowme jîjupuwe ban hunoon haahu hunkulahu, jigawe ban poop bukanaku kammi ma kugaweyim di buko hukoohuk, ma kuga bukanaku kunkulaku, ma mbi jeeli jîmir Emitay yâwwenuum. 11 Moo, mowme bajut ban kâwojuloor, ma jiga ume greegu, ume jûdew, ume nagawi huhaanaahu hata yîinaay, ume agawuti ho, ume ata di bujalabu, ume ata di prasaay, ume amiikeelaw, ume agawut amiikeel; mata Kristu oo agam wah peh, ban nâami poop di wah peh.
12 Mata miwuul bukanaku kata Emitay, ka yoo êkimmi; di ejotuul ma jiga bukanaku kanapaaku; momakiimom mbi jiga bukanaku kañankiitem, kajakum ûyeget, di kuhep bukan, di kubeb bukan, ban di keeli poop humunten. 13 Moo, mbi ya jimuntenoor, di jiñankiitoor; an atil jaa di apaalool, nañankiitool, mata mo ma Ata Emit añankiitewolaam; moo mbi ya jiga mo poop.
14 Be di wahaw uwu peh wa iloom, jiga jâkinooraju ma jihaŋ to, mata jâkinooraju jigawem ma baj kasohooraku kalhegenumaayaku. 15 Moo, kâsuumaayaku kata Kristu kulako di sembe di sîsigirasu satawuul, mata mo ma Emitay êwoolumuum, ma mbi jêemi di kâsuumaaya'uku, di jiga poop bukanaku kammi di humuumahu hanorahu; moo, jisal Emitay. 16 Moo, elobay yata Kristu di elako di sîsigirasu satawuul di sembe; di jilhikitenoor, di jicecenoor poop di majaalhaamu. Di jiyeeŋ poop uñaaŋaw wata jasalaju jata Emitay, di iinus, di uñaaŋ waawu wa Buynum Bunapaabu buwulem ma jisal yo. 17 Momakiimom wahaw peh wa mbi jiga, mante elob, be mante bugoroor, di jiga bo di kañaaŋaku ka Ata Emit aamom Jesus, ma jeen Emitay yagam Ampawolaal jêrejep matawool.
Bukanaku kammi di eluup yanor
18 Miwuul yaaraay, mbi ya jijam di kupañooruul non ma anaw agam ata Ata Emit agawem.
19 Miwuul yîinaay, mbi ya jibooroor kupañooruul, aatuba jiga bukanaku kâhaahum di buko.
20 Miwuul balaabu, mbi ya jijam di kubajawuul mata wahaw uwu wo wa Ata Emit âkimmi.
21 Miwuul kubajaaku, aatuba jilaah kuñooluul, ma jigawiil kubirik di miwuul, ma aatuba mbi jigawiil ma gawiil helek.
22 Miwuul poop jagam emiikeelay, mbi ya jijam di bukanaku kakiluum ube di etaamay di wahaw peh. Aatuba mbi ya jijam di buko keb na mbi kulako to di miwuul, ma mbi keeli kûririgen di miwuul. Be jiga wah peh di ûyeget wasete be bata Ata Emit, wa mbi ugawool âririgen di miwuul. 23 Moo, wahaw peh wa mbi jiga, di jiga wo di ûyegetaw watawuul di malhegenumaayamu, ma jiga wo non miwumu magawem di wo be bata Ata Emit; be ntuwa be bata ajamaat. 24 Mata jake ma jiwolho di kaan, Ata Emit mbi awuluul bugalabu ba agatom be bata bukanaku katawool, mata Kristu oo agam annahaanaw a jigoroorem be batawool. 25 Moo, anoowan agam kôji, mbi ayab bugalabu batawool bata ma agam kôji, mata Emitay êgaworiit ejuu'di buul di bukanaku.