2
Mata nîkine ma jîmir maama înje îkuum matawuul, di kata Lawodiseeya, di poop kaaku kajukutum buulabu bûmbaam, 2 ma ûyegetaw watayiil weeli ûtik, di keeli kusohoor ma kûkinoor, di keeli poop kubaj kanamulen peh kata wahaw wâñoorim wata Emitay. Wahaw uwu wâñoorim, woo weemom Kristu, 3 mata d'oo husaanumahu hata majaalhaamu, di poop kanamulenaku kata Emitay, kemmi ma kûñoorim. 4 Moo, ma ilobuul wahaw uwu, ma an aatuba mbi abuntenumuul di elob yakeel yagawutum yalhegenumaayay, palimo poop yoo êsuume. 5 Mata palimo înje di humuumahu hûmbaam akayloot be ta jemmi, be înje umu to di miwuul di bûyegetabu bûmbaam. Moo, sûumom noon ma îmiim kaan miwumu ma jijamoorum, ban poop kâynenaku katawuul koku ma kujummi jak di Kristu.Kasohooraku kata di Kristu
6 Moo, ma jiyaam ban Kristu Jesus ma aga Ata Emit atawuul, mbi jenken ma jisohoor d'oo. 7 Ma jiga kuhaaraku katawuul d'oo, di jijuumen poop eroŋay yatawuul d'oo, ban di jenken poop ma jihaŋ mâtiken kâynenaku katawuul ma jiga non ma kulhikitenuum, di jenken poop ma ya jisal Emitay.
8 Di jijaamo poop ma an aatuba agenkuul di hunongahu hatawool hajakutum, hata mûndeemaanamu mata ejamaatay, haamom hata di etaama'uye, hagawutum hunongahu hata Kristu. 9 Mata maama Emitay yeenom, wahaw uwu peh wowu di humuumahu hata Kristu. 10 Moo, ma jemmi ma jisohoorum di Kristu, miwumu poop ma jeekum ban baanuwera'ubu, mata oo aakum sembaasu sahammi wah peh wata sembaasu, di poop waawu wammi di kulhikaku hatiya di emitay.
11 Moo, di kasohooraku katawuul poop di Kristu, jîgawumim huhaanaahu hata yîinaay. Huhaanaa'uhu, ntuwa hagaweyim di uŋen ajamaat, be hagawim mata Kristu, haamom ha ahikulumolaam di wahaw wagawem eniil ajamaat egenkooro di kûbajumiñaku. 12 Mata na jîbatisim, di jihokoori di manor d'oo; ban di jilhaalelli poop di manor d'oo di kuketaaku, mata ma jîynemmi di sembaasu sata Emitay yalhaalelloom di kuketaaku. 13 Mata nownu, jigaweene bukanaku kakeem mata kûbajumiñaku, ban poop jîmirut no huhaanaahu hata yîinaay, be Emitay di elhaalelluul di manor di Kristu, ma epas kûbajumiñaku peh katoolaal, 14 ma eruusul kaytaku dâ kûbajumiñaku katoolaal kuŋiicim, di mûndeemaanamu ma ya mâlaamenolaam, ma êbuy wahaw uwu peh, ban di eŋaa'wo eriiŋ di êkrusay. 15 Di êkrusa'uyu poop, ehaatum sembaasu sata uynumaw wajakutaaw wammi ûdu hatiya, di yahaanay yata wo, ma aga wo buraayaabu kayooŋ di êsukay.
16 Moo, aatuba jiwaa'bo ma an aanuul jibaje kûbajumiñ mata wah wata huri, di mata wah wata basiben, palimo mata huk hâñoyye, di huk hata hulheeŋ, palimo poop mata huk hata hîyyaay. 17 Mata wahaw uwe peh, woo ugam bâynaataabu bata wahaw wâreesewuum. Moo, humuumahu hata bo, hoo heemom Kristu. 18 Aatuba jiwaa'bo poop ma bukanaku kâhooloorem ma ya kuga non bukan kahepum bukan, ma kuwatatenuul. Mata ya kûbinken kumalaakaku, ma ya kêenul koo kûbaahulim ma kujuk wahaw. Be bukana'uku ûyegetaw watayiil wowu ma wemmi huc banongerabu bata ejamaatay. 19 Mata kulee'ma kusohoorum di Kristu agam hûkuwahu, aamom da humuumahu hugiitum; âwwenhom ma huroŋ, naga ho poop ma husohoor, ma heeli hukooben non ma Emitay êkimmi.
Uket di Kristu, ma nuroŋ poop d'oo
20 Mata nokoor jaa non miwuul jikete ban di Kristu, ma jîcaalh di balhikitenerabu bata ube di etaamay bata kumalaku, moo, mata wa ma jilaañumem jiga joon non bukanaku kata di etaamay. Aatuba jiga non ma kulobem. Mata ya keen bukanaku: 21 “Aatuba ugor wahaw uwu, aatuba ujamben wahaw uwe, aatuba usoh wahaw uwu.” 22 Wahaw uwu peh wa kulobem, ûkaymul di hunong ajamaat. Mata miña'umu ma kulobem mata mo, na mbi mugoroorumi, ban mbi mukaaño. 23 Malhegen bagawera'ubu ujuu'bo jaa, di buga non wah wata majaalho. Mata ya kuga wahaw non ma bukan kasoolhenem buruŋ kugawem, di kûhooloor poop ma ya kuga non bukan kâgaworuworiitum, ban poop ya kuga di sembe ma kuga non bukan kasoom siniilasu satayiil. Be wahaw uwu peh, ûgaworiit an ma âcaalh di kâgawikooraku.