KAYTAKU KA PAWLU AŊIICUM BE BATA GRÎSIYA YATA
KOLOSU
Pawlu nasaap grîsiya yata Kolosu
1
Înje Pawlu jagam amakaaw ata Kristu Jesus non ma Emitay êkimmi, di poop atiyolaal Timootiw, ûli uŋiiculom kayta'uke, 2 be bata kûtiyoli kanapaaku kata Kolosu kâynenaayaku kata Kristu. Kañankiitaku, di kâsuumaayaku kata Emitay yagam Ampawolaal, di Jesus Kristu agam Ata Emit atoolaal, di kulako di miwuul.Pawlu nasal Emitay
3 Malhegen nanoonan na mbi ûli ulhaw Emitay yagam Ampaw Ata Emit, aamom Jesus Kristu, ya oon yo jêrejep matawuul, 4 mata ma ujammi mata kâynenaku katawuul ka jîynemmi Kristu Jesus, di poop maama jîkimmi bukanaku peh kanapaaku. 5 Malhegen mata wahaw wa jikobem di wo, wammi ma uñakim hatiya di emitay, waamom wa jijammi mata wo na elobay yâsuumaay yata malhegen êrillom di miwuul, 6 di poop maama ewaasoorum di âmbasuk peh. Moomu poop kaŋ ma mbi ekooben tiŋ peh ma ebaj sembe, non ma egam di miwuul kata kaŋ na jijanyom, di jinamulen mata malhegenumaayamu mata kañankiitaku kata Emitay. 7 Mata Epaaphras aamom âpaaloli a uboolaatum ata di bugoroorabu, agam agorooraaw âynenaayaw ata Kristu, akaylom di hiŋahu hâtooli bi alhikitenuul mata kañankiita'uku, 8 oomu poop âñaaŋenolim mata jâkinaju ja Buynumabu bata Emitay buwuluum.
Pawlu nalhaw Emitay be bata bukanaku kata Kolosu
9 Momakiimom na ujammi matawuul, ugaylowut kalhaw Emitay be batawuul, ma ewuluul mâmiilankenamu mata yo non ma êkimmi, di majaalhaamu, di poop kanamulenaku ka Buynumabu bata yo buwulem. 10 Ma mbi jeeli jiga jak non ma Ata Emit âkimmi, di jigawool poop sûumool di miwuul di wahaw peh wa mbi jiga. Bagawerabu batawuul bata jak, di bubaj sembe, kanamulenaku poop ka Emitay ewuluum, di keeli kuhaŋ to. 11 Nulhaw yo poop ma egawuul jibaj sembaasu, saamom sakayumulom di sembaasu sata majaaŋaamu mata yo, ma mbi jeeli jimunten di ûyeget wahepe, di jîririgen poop di wah peh wa mbi ujontuluul. 12 Di jisal poop Ampawolaal mata ma añankiituum ma agawuul ma jêemmi di kâyyaku kata majaaŋaamu ka abandoorum be bata bukanaku kanapaaku. 13 Mata yoo ehikulolaam di sembaasu sata emuucenay, ma egawolaal di kâyyaku kata Añool yo a eboolaatum, 14 aamom apakenolaam ma kûbajumiñaku katoolaal kupasi.
Aymoom agam Kristu
15 Di Kristu nûmirumaam haanaahu hata Emitay yâjukoriitim, oo poop agam Añool yo âtiyaaraw, agam anaw ahammi wahaw peh wa êwwemmi. 16 Mata d'oo Emitay êwwenummi wahaw peh wammi hatiya di emitay, di wata di etaamay, di poop wahaw peh wajukeyim, di waawu wâjukoriitim. Di poop wahaw peh wammi hatiya di emitay di kulhikaku, di waawu wammi di ûyyaw, di waawu wata sembaasu. Wahaw uwu peh, di Jesus Emitay êwwenunwom, ban poop be batawool êwwenunwom. 17 Mata oo nâamaalito bala wahaw peh ûwweni, wahaw poop peh d'oo wêemuntom. 18 Oo poop agam hûkuwahu hata humuumahu haamom grîsiya, naga eroŋay, naga poop anaw anoraw âtiyaaraw alhaalellim di kuketaaku, ma aali poop aga anaw âtiyaaraw ata wahaw peh. 19 Mata Emitay mo ma êkimmi ma hunoonahu hata yo pooho hûyisi di Añool yo, 20 ma mbi yeeli ega ma kujamoor di wahaw peh wammi di etaamay, di poop waawu wammi hatiya di emitay, ma ubaj kâsuumaay di yo, mata hûsimahu hata Añool yo hâhipim di êkrusay.
21 Malhegen miwuul poop jîrangiyooreene di Emitay, ma jiga kûsuumoortaaku kata yo di banongerabu, di poop bagawerabu batawuul bajakutaabu. 22 Be mowme jijamoore ban di yo mata Kristu, akeem di êkrusay ma aŋalluul be ta ammi, ma jiga bukanaku kanapaaku, kabajutum batila, di poop bukan ka an aatumbi awatatenurer. 23 Moo, jenken ma jisoh kâynenaku katawuul, ma jijuum tir, ma aatuba jibet wahaw wa jikobem di wo, wa jijammi di elobay yâsuumaay ya yañaaŋeneyim di âmbasuk peh, makiim jaat înje Pawlu, nigawi añaaŋenaaw ata elobay yata Emitay.
Bugoroorabu bata Pawlu di hûlaamahu hatawool
24 Moo, nîririgene noon ma emmi di hûlaamahu matawuul. Mata hûlaama'uhe ha îlaamem di ho mata grîsiya yagam humuumahu hata Kristu, mbi heenen ma hûlaamahu ha âlaamum mata yo hûwuñeni. 25 Mata Emitay ejotommi ma iga agorooraaw ata grîsiya, ma iñaaŋenuul elobay yata yo, ma eeli iga bugoroorabu bata yo, 26 ma iñaaŋen huhaanaahu hata yo hammi ma hûñoorim kata kaŋ niŋanu bukanaku peh kammi di etaamay; be jaat hûyisi ban bukanaku kata yo. 27 Mata hunongahu hata Emitay, ma bukanaku kata yo kûmir kaan huhaanaa'uhu, husaanum hâamak di bukanaku kagawutum jûdew. Moo, huhaanaa'uhu hoo heemom uhe: Ma Kristu ammi di miwuul, jibaj kâynen kaan mbi jêemi di majaaŋaamu mata Emitay. 28 Malhegen ûli ya uñaaŋen elobay yâsuumaay yata Kristu be bata an peh. Ban nunamulenii'yo, nulhikitenii'yo di majaalhaamu, ma mbi ûyis ajamaat peh kayooŋ di Emitay, naga anaw a kasohooraku katawool di Kristu kankum. 29 Momakiimom ma îkuujumem ma igoroor di sembaasu sammi d'înje, sa Kristu awulommi.