KAYTAKU KA PAWLU AŊIICUM BE BATA GRÎSIYA YATA
KOLOSU
Hûcukumahu hata kayta'uke
Kolosu yoo êsukay yalakuwemmi di bantaabu bata Phriisiya di êsukay yata Aasiya; be bukan kaaku kata dô keeli kulako no Jerusaleŋ nata Pentekosti (Bag 2:10). Pawlu ñeemo ñagaba nakayum be Phriisiya (Bag 16:6; 18:23), be ga noon âmirut bûynenaabu peh bata Kolosu (Kol 2:1) Be ga non Epaaphras âcukum êgrisiyaay yata bo (Kol 1:7; 4:12-13). Kayta'uke kunaamore di kata Ephesu, kaŋiicim sitaŋa'usu na kayta'uke kuŋiicim, nownu Pawlu oo di ekullhay yata Rooma, be kayta'uke ya kuhaŋ malob mata Kristu di kaan oo agam hûkuwahu hata êgrisiyaay, naga anaw aakum haanaahu hata Emitay yâjukoriitim, naga poop aŋilaw ammi hatiya di wahaw peh wâwwenim (Kol 1:15-18). Be bukan kaaku di kûkin kuga êsukay ma kusoh kûboñaku kata Emitay, ma ya kêenul buko ya kûbaahuli ma ya kûbinken kumalaakaku (Kol 2:16-23), be kayta'uke di kûyis di kaan bûynenaabu ko kalhaalellim di kuketaaku ma kuroŋ di manor di Kristu, moo jake ma kuwalen ûyegetaw watayiil di wahaw wata hatiya di emitay, be ntuwa wahaw wata di etaama'uye (Kol 3:1-2). Di kûyis poop kaan jake ma bûynenaabu kûcaalh di kûbajumiñaku ma kûjupo haanaahu hunkulahu. Mata eroŋay yatayiil yunkulay mbi ejuki di bagawerabu batayiil di bukanaku kata saŋiil, di poop bugoroorabu ba kugoroorem.
Ban nâboñul Tikiku ma âŋarul kayta'uke ma kûreboorul di Oneesimu oo ma alaañem be baabu annahaanaw atawool aamom Philemoŋ ammi di êsukay yata Kolosu.