Pawlu nalob di kutiyool ma kujamoor
4
Kutiyom ka iboolaatum, sûumom noon ma ijukuul. Mata miwuul jigam kâsuumaayaku kûmbaam, di poop îñambiyaay yata bûgaalumabu bûmbaam. Moo, jake ma jenken ma jijuum tir di buruŋabu bata Ata Emit.2 Aw Ebodiya, miwuul di Sintiki, nilhawuul ma jiga di sembe ma jijamoor, mata ma jigam batiyaayabu babomum kâynen. 3 Aw poop jagam apaalom âynenaayaw ata bugoroorabu, nilhawi ma oonen batiyaaya'ubu egabaay, mata ûli nugoroore noon di buko bata jañaaŋenaju jata Elobay Yâsuumaay, di Klementi, be di bukan kaaku poop ka ugam bugoroora'ubu ka uñaaŋaw watayiil wemmi di kaytaku kata eroŋay.
4 Moo, nilhawuul ma êsuumaay elako di miwuul nanoonan mata kasohooraku katawuul di Ata Emit. Ma ilancenuul mo joon: jibaj êsuumaay. 5 Jiga ma bukanaku peh kujuk mahepaamu matawuul. Mata Ata Emit, nare kâriiŋul. 6 Aatuba jinongoor makeel, be wahaw peh wa jîkimmi, di jilhaw wo Emitay. Be na mbi jilako di jilhaw yo, di jeen yo poop jêrejep. 7 Moo, kâsuumaayaku kata Emitay kahammi kanamulen peh, mbi kupooy sîsigirasu satawuul, di poop ûyegetaw watawuul, mata kasohooraku katawuul di Kristu Jesus.
8 Kutiyom, ma îwuñen, neenuul jiga ûyegetaw watawuul ma ween huc wahaw peh walhegenumaayaw, di waawu wajakaaw, di waawu wanapaaw, di waawu wacolaaw, di waawu wâsummi kajam, di waawu wa an peh âririgenem, di waawu wa an peh âkinem, di poop waawu wa an peh asalem. Moo, wahaw uwu mbi jinongoor mata wo. 9 Di jiga poop wahaw peh wa ilhikitenuum, di poop waawu wa jijuum wa igam. Moo, Emitay yawulem an kâsuumaayaku, elako di miwuul.
Pawlu nasal kutiyool mata opherta
10 Înje sûumom noon di Ata Emit matawuul, mata ma jilammi joon jiwolhuwom ma jeenenom. Malhegen nîmire kaan ya jinongoor mûmbaam, be miwuul jibajentum buruŋ ma jeenenom momakiimom. 11 Be ma iloom ume, ntuwa neene ma ibajutum makeel, mata ibaj, ibajut, nîwaayen poop. 12 Mata neeliye ilako to babajut makeel, neeliye poop ilako to înje babajer wahaw lhay. Moo, neeliye iyetoor di wah kaŋ peh. Mata nilhikitene kalako to di bacaar, non poop non înje babajer wah wata huri. 13 Moo, neeliye iyetoor di wahaw kaŋ peh, mata Kristu awulewommi Sembaasu. 14 Be jigawe jak ma jeenenommi di hûlaamahu hûmbaam.
15 Miwuul jata Philipus, jîmire jak kaan, na îcukum jañaaŋenaju jata elobay yâsuumaay, înje ma îcaalhumulom di bantaabu bata Masedoniya, grîsiya yakeel yeenentom di makeel, be miwuul keb jeenenommi. 16 Ban na ilakom Tesaloonika, ntuwa hanor keb jeenenommi, be jeenenom ñeemo ñagaba. 17 Be ntuwa mata jaanenaju jûmbaam keb nîkimmi, be nîkine poop ma Emitay mbi ebaŋen bugalabu batawuul. 18 Moo, niyabe wahaw wa jibollommi, be uyeje noon poopii di uhaŋ non ma îkinemmi. Mata na Epaphroditu ârillom, nawulom wahaw wa jibollom bi awulom. Moo, wahaw uwe wa jibollommi, wowu ma ugam poop non muheeñamu yaputem sûum di Emitay, di uga poop non wahaw wawulim be bata yo, wa yoo êkinem. 19 Moo, hurim Jesus Kristu, Emitay yûmbaam yakiim husaanumahu hâmakaahu, mbi ewuluul wah peh wa jîkimmi. 20 Emitay yaamom Ampawolaal, di esali be nanoonan. Amiin!
Jasaapaju jîwuñenumaju
21 Moo, nisaape bukanaku peh kata Emitay, kammi ma kusohoorum di Jesus Kristu. Kutiyom poop kammi ute d'înje, kusaapuluul poop. 22 Bukanaku poop peh kata Emitay kammi ube, kusaapuluul poop. Be kata di eluupay yata âyyaw Sesar, kuhaŋ masaapuluul.
23 Moo, kañankiitaku kata Ata Emit aamom Jesus Kristu, di kulako di miwuul poopuul. Amiin!