Bu nooli uga anaw alhegenumaayaw di Emitay
3
Moo kutiyaay, ma îwuñen elobay yûmbaam, nîkine ma jîririgen mata kasohooraku katawuul di Ata Emit. Be bata d'înje sônjiitom ma ilancenuul wahaw wanoraw wa iŋiiceluum ban, mata mbi weenenuul. 2 Be jijaamo silhokaasu, di jijaamo bukanaku kâgawikoorem, di poop kaaku kanongoorem keb mata huhaanaahu hata yîinaay. 3 Mata nkit ulaal uyabaam huhaanaahu hata yîinaay halhegenumaayahu, mata ya ûbinkenaal Emitay di Buynumabu bata yo. Mo ma sûumumolaam di eroŋay ya ookaam mata kasohooraku katoolaal di Kristu Jesus, mata ûynentaa'ban huhaanaahu hagaweyim di eniilay. 4 Malhegen înje poop neeliyeene îyneneen wahaw uwu. Moo, anaw âanuu'jaa oo nâynene di huhaanaa'uhu, înje nihaŋool mâynen, 5 mata na ibajim iga kukaku hutok di kûhaaji, nigawi huhaanaahu hata yîinaay. Înje anaw ata Israyel, ata di êbajoorumay yata Benjamiŋ, înje êbrew alhegenumaayaw, ban di kûboñaku kâtooli, înje phârisew nigawemmi. 6 Di mata jasohaju jata kûboñaku kâtooli, nisookosookom lit, poopii ya îlaamen bukanaku kata di grîsiya. Moo, di kûboñaku kâtooli, an aaliit awatatenom di makeel. 7 Moo, wahaw wabajemmi d'înje nownu ênjariŋ, maame ubajut ban ênjariŋ d'înje mata Kristu. 8 Ntuwa wahaw uwu keb, be wah kaŋ peh ubajut ênjariŋ d'înje, mata kanamulenaku ka inamulemmi jaat mata Kristu, agam Ata Emit ûmbaam. Momakiimom ma îbetummi wahaw uwu peh, ma ulaañ uga d'înje non hubet, ma mbi eeli ibaj hûpiiraahu di Kristu, 9 nusohoor poop d'oo. Moo, maame isohoorowut ban non an acole mata jagawaju jata non ma kûboñaku kata Emitay kuloom, be mata kâynenaku kûmbaam di Kristu kokakiimom Emitay di egawom anaw acolaaw. 10 Moo, nîkine îmir Kristu, di poop sembaasu salhaalelloom di kuketaaku, ma mbi êemi di hûlaamahu hatawool, ninaamoor poop d'oo di eketay yatawool, 11 ma mbi eeli îbajun to, ma îlhaalowul di kuketaaku.Eteyay yata bûynenaabu
12 Înje îkint êenul nisohe ban wahaw wa îkimmi, êtukaanul poop nigawe ban anaw acolum, be înje magawem di sembe ma nki îhug Kristu mata ma ajotommi, ma mbi eeli eeno non oo. 13 Moo Kutiyaay, înje eenut nisoo'wo ban, be wahaw wa îkimmi, nîkine îwuken wahaw peh wa ibeem ban kujeeŋandawom, ma iga di sembe be bata waawu wammi kayooŋ. 14 Momakiimom ma îgawumem di sembe ma itey be ba ikayem be, ma mbi eeli iyab bugalabu ba Emitay êwoolumommi be bata bo hatiya di emitay mata Kristu Jesus.
15 Moomu poop kaŋ ma ulaal peh ja kâynenaku kankum ban, mbi ya unongooraal. Be ga jaa non an aahu ata di miwuul anongum hunong haahu hâbutim, Emitay mbi êyisuu'ho. 16 Moo, ta ûriiŋaam ban ume, jake ma onkenaal maama ureesaalem di mo be kayooŋ.
17 Kutiyaay, mbi ya jiga non ma înje igawem, di jisoollhen poop bagawerabu bata bukan kaaku kagawem non ma ûyisuum. 18 Non ma ilobewuum uyaas wameeŋe, nîkine ma ilobuu'mo joon di mukulamu dilo, mata baje bukan kameeŋe ka bagawerabu batayiil bugawiim ma sûumutiil êkrusay yata Kristu. 19 Moo, bukana'uku kokareesem be di hûjimenahu hata Emitay. Mata siyongasu satayiil sigam emitay yatayiil, ban ya kûseekum wahaw wâpuñunenim, mata ya kunongoor keb mata wahaw wata ube di etaamay. 20 Be ulaal hukinahu hatoolaal, hatiya di emitay hemmi, momakiimom ma ukobumaalem di ehakenay Ata Emit agam Apakenaaw atoolaal, aamom Jesus Kristu na mbi âlaañul, 21 ma atiinoor siniilasu satoolaal saketem, ma aga so ma seeno non eniilay yatawool yata hatiya di emitay. Mata di sembaasu satawool, mbi ahaat wahaw peh.