Sembaasu sata Kristu
2
Moo, ma jemmi ma jisohoorum di Kristu, jibaje ban sembe, mata jâkinaju ja âkinuum ya jînikenuul, Buynumabu batawool poop ya buwuluul kasohooraku. Momakiimom ma jîboolaatoorumem di jiñankiitoor poop. 2 Moo, nilhawuul ma jijamoor, di jîkinoor, di jibaj bûyeget banor, di poop hunongoor hanor, ma êsuumaay yammi d'înje, mbi yeeli ehaŋ to. 3 Aatuba jiga wah wakeel mata kangoŋaaku, di poop ma mbi bukanaku kusaluul; anoowan aatuba agawooro non an âamak, be nasoh kupaalool non bukanaku kahaŋoom. 4 Aatuba mbi ya jinongoor keb matawuul, be mbi ya jinongoor poop mata bukan kaaku. 5 Di jinongoor poop hunongoorahu hanorahu non hata Kristu.6 Mata palimo ma agam Emitay,
be âkint âbotoor ma âyis kaan oo Emitay.
7 Be nagawooro non agawut an, ma aga non oo amiikeel,
ma alaañ aga non ejamaat.
8 Be na agam omu di humuumahu hata ajamaataw,
narembeelooro ma ajam di Emitay,
ii be na akeem eketay yata di êkrusay.
9 Momakiimom ma Emitay egawumoom tiŋatu tâtiyaaratu tahammi tiŋ peh,
ban di ewulool kañaaŋaku kahammi uñaaŋaw peh.
10 Ma ajamaat peh ammi hatiya di emitay, di etaamay, di poop dâada di etaamay, mbi âtiigen kayooŋ Jesus,
ma asal kañaaŋaku katawool;
11 ban an peh mbi asallhen kaan Jesus Kristu agam Ata Emit,
ma Emitay yaamom Ampawolaal mbi esali.
Ujaaŋ non ehikitenum di etaamay
12 Moo, kutiyaay, non ma ya jijammi d'înje ulaal tanor, mowme haŋ majak ma jihaŋ majam d'înje, palimo ma uletaam tanor. Di jiga to poop ûyegetaw watawuul di kapakaku ka Emitay ewuluum, di jîkoli yo poop. 13 Mata Emitay emmi ma eenenem di miwuul ma jeeli jinong jak, di jiga poop wahaw wa yoo êkimmi.
14 Moo, mbi ya jiga wah peh bâŋuŋunoorut, bañakoorut poop, 15 ma mbi jiga kuŋilaku kata Emitay kalhegenumaayaku, kaatumbi kuwaŋureri di wah wakeel, di jiga poop bukanaku kaatumbi kubajurer batila di tutaru tata bukanaku kâlhapitaaku. Di jiga poop di tutaru tatayiil jaŋaŋaŋ non bootabu bammi hatiya di emitay, 16 ma mbi jeeli jiwuliil elobay yata eroŋay. Moo, jiga mo jaa, di Hukahu hata Kristu, mbi îririgen noon matawuul, mata yîse kaan hûlaamahu ha îlaamum, di poop bugoroorabu ba igoroorum, igawut bo ebeebel.
17 Be nokoor jaa non, hûsimahu hûmbaam mbi hûhipi ma hubaŋen kâynenaku katawuul ma huga poop non heenaayahu ha mbi hugawi be bata Emitay, ña mbi sûumom ma ûririgenaal ulaal peh. 18 Ban poop miwuul mbi sûumuul ma ûririgenaal ulaal peh.
Pawlu nalob mata Timootiw koo di Epaphroditu
19 Be sûum jaa di Emit, lhetubi piyo niboñuluul Timootiw, ma mbi âlaañul nañaaŋenom matawuul, ma bûyegetabu bûmbaam mbi bûwaayen. 20 Mata ibajut an akeel a kurem abaam bûyeget non oo, anongoorem matawuul. 21 Mata bukaaku peh ya kunongoor keb mata wahaw watayiil, ma kuwaa'bo mata Jesus Kristu. 22 Miwuul jîmire jak maama bagawerabu batawool bûyisuum kaan oo anaw alhegenumaayaw, mata ûli ugam bugoroorabu bata jañaaŋenaju jata elobay yâsuumaay di manor d'oo, non aŋil koo di Ampawool. 23 Moo, oo ma îkimmi iboñuluul, be înje bâmirer maama mbi wahaw urees d'înje. 24 Be nîynene di Ata Emit kaan, lhetubi piyo înje humuumahu hûmbaam mbi îkayil.
25 Be nîkine poop ma iboñuluul atiyolaal aahu Epaphroditu, agam apaalom ata di bugoroorabu, di poop hûlaamahu, aamom a jiboñulom ma âkayil bi aanenom. 26 Mata oo nâkine noon ajukuul, ban poop nanongoornongoorum noon matawuul mata ma jijammi kaan oo âjuutemmi. 27 Malhegen nâjuutenjuutemmi, jinŋet naketeene. Be Emitay di eñankiitool; be ntuwa oo keb eñankiitum, be, be d'înje poop, ma aatuba mbi ibaj buhiiraabu baabu joon ibaŋenoor di baabu. 28 Momakiimom ma îkinummi ibolluwool cab, ma mbi jijukool joon, di jîririgen, înje poop nîwaayen deh. 29 Moo, mbi jiyaañuwool sûum non atiyuul ata di Ata Emit; be mbi ya jibooroor an peh agam non oo. 30 Mata oo nanuurunurum poopii naketeene mata bugorooraabu bata Kristu, be aga mo, ma aali aanenom di wahaw wa miwuul jeeliitum jeenenom di wo.