KAYTAKU KA PAWLU AŊIICUM BE BATA GRÎSIYA YATA
PHILIPUS
Pawlu nasaap grîsiya yata Philipus
1
Înje Pawlu, di Timootiw, jagam kugorooraaku kata Kristu Jesus, ûli uŋiiculom kayta'uke be bata bukanaku peh kanapaaku kata êsukay yata Philipus, di bîspuyi, di poop diyaakunuyi kata bo. 2 Moo, Emitay yaamom Ampawolaal, di Ata Emit aamom Jesus Kristu, awuluul kañankiitaku, di poop kâsuumaayaku.Pawlu nalhaw Emitay be bata bukanaku kata Philipus
3 Înje hukoohuk na iwolhuwuum, ya isal Emitay matawuul. 4 Ban poop hukoohuk na ilhawem Emitay be batawuul, ya ilhaw yo di êsuumaay, 5 mata ma jeenenommi di bugoroorabu bata jañaaŋenaju jata elobay yâsuumaay kata kaŋ hukahu hûtiyaarahu, be jaat. 6 Moo, înje nîmire jak kaan, anaw âcukum bugoroorabu bajakaabu di miwuul, mbi anken di bo be kaŋ di hukahu hata Kristu Jesus. 7 Malhegen înje ma igawuum di êsigiray yûmbaam, momakiimom ma inongoorumem matawuul, mata miwuul peh ya jisoh lit di bugoroorabu ba Emitay ewulommi, ma jeenenom înje di ekullhay, di poop na ijummi ma ijuumen malhegenumaayamu mata elobay yâsuumaay. 8 Emitay êmiim maama înje îkinuum deeno miwuul peh; mata bâkinerabu ba îkinuum, bûkayumul di êsigiray yata Kristu Jesus.
9 Moo, înje malhawem di Emitay ma ebaŋenuul jâkinooraju, di jâmirlankenaju, di poop kanamulenaku, 10 ma mbi jeeli jijot wahaw wahammi majak, ma mbi hukahu hata Kristu hûriiŋ, natookuul miwuul ma jisetum baakut kûbajumiñ. 11 Natookuu'poop miwuul ma jemmi huc wahaw ajakaaw wakayumulom di Jesus Kristu, ma mbi Emitay esali.
Kristu agam eroŋay
12 Kutiyaay, nîkine ma jîmir kaan wahaw wagawommi, woo weenemmi ma elobay yâsuumaay ehaŋ mawaasoor. 13 Mata bakullherabu ba ikulhim, bobakiimom ma bupooyaabu bata kâyyaku, di poop bukan kaaku peh, kûmirummi kaan înje ikulhim mata Kristu. 14 Be kutiyolaal kameeŋe kata di Kristu, na kûmiim kaan înje umu di ekullhay, ña di kuhaŋ marumen ma kulob elobay yata Emitay di sembe bâkoliit.
15 Malhegen bukan kaaku ya kulob mata Kristu mata ma kûsiibuwikoorum ma ya kuga kugabaaku. Be bukaaku ya kulob matawool di buynum bajake. 16 Bukana'uku ya kuga mo mata kâkinaku, mata kûmire kaan Emitay êwoolommi ma ijuum mata elobay yâsuumaay. 17 Be bukan kaaku kûñaaŋenoriit mata Kristu di hunongoor hajake, be ya kuga mo mata kangoŋaaku. Ya kuga mo, mata ma kûkimmi kubaŋen hûlaamahu hûmbaam di ekullhay.
18 Be înje makeel mulaañutom. Kuñaaŋen jaa mata Kristu di hunongoor hajakut, be mante di hunongoor hajake, sambare, kulob keb mata Kristu. Momakiimom ma sûumumommi, ban mbi sûumom kaŋ be niŋanu. 19 Mata nîmire kaan kalhawaku ka jemmi ma jilhawem di Emitay mata înje, di poop Buynumabu bata Jesus Kristu, mbi bugawom îcaalhul ûde di ekullhay. 20 Moo, di hunongahu hûmbaam, nîkine ma aatuba mbi itilimbenurer ka mbi ipuño, be nîkine ma ijuum tir mowme be nanoonan, ma sembaasu sata Kristu mbi seeli sijuki d'înje, palimo ma iroŋ, palimo ma iket. 21 Mata, non mata înje, eroŋay yoo egam Kristu, eketay poop d'înje, husaanumahu. 22 Be iroŋ jaa, mbi iga wahaw wajakum di bugoroorabu bûmbaam. Moo, îmirut waawu wa mbi ijotum. 23 Be înje magawem hamihami di kunongooraku kugabaaku, mata malhegen sûumom noon ma îcaalh ute, ma ikay ki îtoo'dô Kristu, mata haŋ majak. 24 Be mata ma îkinuum, ninonge kaan, haŋ majak ma ilako to para. 25 Be nîmire kaan, mbi ilako to para, ma eenenuul miwuul peh, ma mbi jîwaayen di jikooben di kâynenaku. 26 Moo, na mbi îlaañul joon ma ujukooraal, hûwaayenahu ha jibaam di Kristu Jesus, mbi huhaŋ mabaj sembe mata înje.
Pawlu nalob mata jasohaju jata lit
27 Moo, wahaw wahammi majak, jirees jak non ma elobay yâsuumaay eloom, ma mbi palimo înje ikaylom bi ijukuul, be mante akayloot, be jake ma ijam kaan, miwumu ma jisoom lit ma jijamoor, di jitiik di manor mata kâynenaku kata elobay yâsuumaay, di hunongoorahu hanorahu. 28 Moo, aatuba jîkoli bukanaku kâsuumutuum, mata wahaw uwu mbi uga êmanjumay yâyisum kaan mbi kunep. Be di miwuul, mbi ga êmanjumay yata kapakaku ka Emitay mbi ewuluul. 29 Mata miwuul hûpiiraahu jibaam di Emitay, ntuwa mata ma jîynemmi keb Kristu, be poop ma mbi jeeli jîlaam matawool. 30 Moo, înje di miwuul, ulaal oomaam di hutiikahu hanorahu, haamom ha jijukommi di ho, hoohu poop kaan ha jijammi ha emmi di ho be jaat.