KAYTAKU KA PAWLU AŊIICUM BE BATA GRÎSIYA YATA
EPHESU
Pawlu nasaap grîsiya yata Ephesu
1
Înje Pawlu jagam âmakaaw ata Jesus Kristu non ma Emitay êkimmi, înje iŋiiculom kayta'uke be bata bukanaku kanapaaku kammi Ephesu, kaamom kâynemmi Kristu Jesus. 2 Moo, nîkine ma Emitay yaamom Ampawolaal di Ata Emit aamom Jesus Kristu awuluul kabonketaku, di kâsuumaayaku.Hûpiiraahu ha ubajaam di Jesus Kristu
3 Usalaal Emitay yagam Ampaw Ata Emit aamom Jesus Kristu, yaamom yawulolaam hûpiira peh hata hatiya di emitay mata Kristu. 4 Mata yoo ejotolaam ma mbi ugawaal kuñool yo bala etaamay êwweni mata Kristu, ma ugawaal bukanaku kaakutum kûbajumiñ ka yoo yeetubi ewaŋurer, mata kâkinaku kata yo. 5 Yoo êjotaaliyolaam ma egawolaal kuñool yo, mata Jesus Kristu, mata mo ma sûnyom, ban poop di êkin mo. 6 Moo, usalaal Emitay mata kañankiitaku kata yo kahahum noon, ka ewulolaam bancaamut mata Añool yo a eboolaatum. 7 Mata, mata hûsimahu hatawool, ho ha uhikulumaalim ma kûbajumiñaku katoolaal kupasi, mata kañankiitaku kata yo kahahum noon, 8 ma egawolaal oonaal huc majaalhaamu, di poop kanamulenaku.
9 Ban di egawolaal ûmiraal huhaanaahu hata hunongahu ha enongum bi ega di Kristu. 10 Hunonga'uhu, na mbi tiga tîriiŋe, di êmeb wahaw peh wammi hatiya di emitay, di poop etaamay ma ega wo ma Kristu aga annahaanaw ata wo.
11 Mata Emitay egawem wahaw peh non ma enongum, di poop maama êkimmi. Momakiimom di êjotaaliyolaal ma ugawaal bukanaku kata yo mata kasohooraku katoolaal di Kristu non ma ênongaalim. 12 Ma mbi êriibiinaay yata yo esali matoolool jagawaam bukanaku kâtiyaaraku jaamaam ma ukobaalem di Kristu.
13 Malhegen oo akiim ma jîjamummi elobay yalhegenumaayay yaamom elobay yâsuumaay yaŋalluum kapakaku mata ma jîynenoom, ban di jîbikummi Buynum Bunapaabu, ba Emitay yemmi mbi ewul. 14 Mata Buynuma'ubu Bunapaabu, bobagawolaam ma ûynenaal kaan Emitay mbi ewulolaal wahaw wa yemmi mbi ewul kuñool yo. Moo, wahaw uwu, woo ûyisum kaan Emitay mbi ewul kahepulenaku bukanaku kata yo, ma mbi êriibiinaay yata yo esali.
Kalhawaku kata Pawlu
15 Momakiimom na ijammi mata kâynenaku katawuul di Ata Emit aamom Jesus, di poop maama jîkimmi bukanaku peh kanapaaku, 16 igaylowut jasalaju jata Emitay. Ban poop di kalhawaku ka ilhaweyom, îwukenoriit matawuul. 17 Ya ilhaw Emitay yagam Ampaw Ata Emit aamom Jesus Kristu yakiim êriibiina peh, ma mbi ewuluul buynumabu bata mâmiilankenamu, di poop majaalhaamu, ma mbi jeeli jîmii'yo. 18 Nilhaw yo poop ma ehikiten ûyegetaw watawuul ma mbi jeeli jinamulen mata wahaw wa jikobem di wo wa êwolluum be bata wo, di jeeli jîmir poop wahaw wa yemmi mbi ewul bukanaku kata yo. 19 Di jeeli poop jimanj hâmakawutaahu hata sembaasu sata yo sammi d'ulaal jâynenaayom. Semba'usu sammi d'ulaal, so sa 20 Emitay elhaalenumulom Kristu di kuketaaku, ban di egawool di kaŋen kûrir kata yo hatiya di emitay, 21 ma egawool aga annahaanaw ahammi wahaw peh wammi hatiya di emitay, di sembe sata wah peh, di poop yahaan peh. Di egawool poop aga annahaanaw ahammi annahaan peh âwoolim ute di etaama'uye, di poop yaayu yâreesewuum. 22 Malhegen Emitay yoo egam Kristu ma aga annahaanaw ata wahaw peh, ban di egawool aga hûkuwahu hata grîsiya ma aga annahaanaw ata yo. 23 Ma grîsiya ega poop humuumahu hata Kristu, ban di een huc hunoonahu hatawool, aamom ammi huc wah peh, di poop tiŋ peh.