Jâcaalhulaju jata di eketay be di eroŋay
2
Noo napiyaanu, miwuul jiketeketemmi mata majakutaamu matawuul, di poop kûbajumiñaku katawuul. 2 Mata nownu, ya jireeseen di buruŋabu bajakutaabu bata etaama'uye, ma ya jiga non ma annahaanaw ata uynumaw wajakutaaw wammi hatiya, wammi jaat ma ulhopemmi bukanaku kalatum Emitay. 3 Malhegen ulaal poop nownu mo ma ya ugaweenaam non buko. Mata ya ugaweenaal non ma eniil ajamaat êkinem, ma ya ugawaal wahaw wa siniilasu, di ûyegetaw watoolaal ûkimmi. Mata ulaa'poop hurim bagawer ajamaat, Emitay ebirikebirikemmi d'ulaal non ma emmi poop ma ebirikum di buko.4 Be mata ma kañankiitaku kata yo kuhahum, ban poop ma êkinolaam noon, 5 momakiimom ulaal baroŋ ma uketaam mata kûbajumiñaku katoolaal, di egawolaal ma uroŋaal di manor di Kristu. Moo, mata kañankiitaku kata yo, kokakiimom ma jîpakummi. 6 Ban poop mata kasohooraku katoolaal di Kristu, Emitay di egawolaal ma ulhaalowulaal di kuketaaku ma egawolaal uleehuwaal tanor d'oo hatiya di emitay. 7 Emitay ega mo, ma mbi eeli êyisolaal di kukaku kâreesewuum, kañankiitaku kata yo kahahum noon ka eñankiitolaam mata Kristu Jesus. 8 Mata, mata kañankiita'uku kata yo, kokakiimom ma jîpakummi, mata ma jîynemmi. Moo, ûdu ntuwa koo kukayumulom di miwuul, be Emitay ewulukom. 9 Ntuwa poop, wah wa an agoroore, ma an aatuba mbi asalooro. 10 Mata Emitay egawolaam bukanaku ka ugawaam jaat, yoo poop êwwenolaam ma mbi ooliyaal ugawaal wahaw wajakaaw, wa yoo êbandooraalim be batoolaal, mata kasohooraku katoolaal di Kristu Jesus.
Kajamooraku mata Kristu
11 Moo, jake ma jiwolho kaan miwuul jagawutum jûdew, jâgaworiitum huhaanaahu hata yîinaay, jûdewwi kaanem buko kugam bukanaku kakiihom, ya kêenul miwuul bukanaku kâmiituhom. 12 Mata nownu, miwuul basohoorut di Kristu, jigawent bukanaku kata di êsukay yata Israyel; jileteen poop di yaŋaayay yata Emitay, di poop wahaw wa yemmi mbi ewul bukanaku kata yo. Ban poop miwumuyeen di etaamay bâseekumut wahaw wa jîynemmi kaan mbi jiyab kajom, bâmirut poop Emitay. 13 Be jaat, mata kasohooraku katawuul di Kristu Jesus, miwuul jalakuwemmi râagi, di egawuul ma jîreeken yo, mata eketay yatawool di êkrusay. 14 Mata oo aŋallolaam kajamooraku, ma aga jûdewwi, di bukanaku kagawutum jûdew, kuga bukanaku kanoraku, ma atah hukalahu hata kajamoorutaku halakuwemmi di tutaru tatayiil; 15 ma âbuy kûboñaku kata Emitay, di mûndeemaanamu mata jûdewwi, ma agawiil di bukanaku kagawutum jûdew, ma kuga êsukay yanoray kasohoorum d'oo, ma agawiil kujamoor; 16 ma aali agawiil kuga bukanaku kanoraku, nagawiil poop ma kujamoor di Emitay, ma âbuy kajamoorutaku kalakom di buko, mata eketay yatawool di êkrusay.
17 Mata Kristu, oo akaylom bi añaaŋenuul elobay yâsuumaay yata kâsuumaayaku, ma miwuul jagawutum jûdew, jammi râagi Emitay, di poop jûdewwi kareekenyom; 18 mbi ulaal peh, Buynum banorabu beenenolaal ma ûriiŋaal taatu Ampawolaal, mata Kristu.
19 Moo, jigawut ban emaasoora, jigawut poop bûkanikoor, be jaat jigawe ban bukanaku kata yo kanapaaku, kata di eluupay yata yo, 20 kammi ma kujuumenim di hutandahu hata kumakaaku kata Jesus, di poop buñaaŋenaabu bata kûboñaku kata Emitay. Ma Kristu Jesus aga huwaaliisahu hata di kâjajaku hasoom eluupay. 21 Mata oo agam anaw dâ eluupay emmi ma ejuumenim, ma aga yo ekooben, di ejuum lîb, ma mbi êwojuli be bata Ata Emit. 22 Moo, miwuul poop, mata kasohooraku katawuul di Kristu, mbi jiteepi di manor di bukaaku kâynemmi, ma jiga eluupay da mbi Buynumabu bata Emitay bulako.