Bugoroorabu bata Pawlu di bukanaku kagawutum jûdew
3
Momakiimom înje Pawlu jammi ma ikulhim mata Kristu Jesus hurim ma îkinuum, înje malhawem di Emitay mata miwuul jagawutum jûdew. 2 Malhegen jeeli jijam kaan mata kañankiitaku kata Emitay, mo ma ewulumommi bugoroora'ube be bata kâsuumaayaku katawuul, 3 ma êyisom huhaanaahu hata yo hâñoorim ma egawom îmii'ho. Ban niŋiiceenuu'ban ma ilobuul jinŋet mata wahaw uwu. 4 Moo, na mbi jipisen wahaw wa iŋiiculuum, mbi jîmir maama înje inamulemmi mata huhaanaahu hata Kristu. 5 Malhegen kâtiyaar huhaanaa'uhu hûyisuti bukanaku kata no, be mowme Emitay egawe ma Buynumabu bata yo bûyis ho kumakaaku kata Jesus kanapaaku, di poop buñaaŋenaabu bata kûboñaku kata yo. 6 Huhaanaa'uhu hoo hûyisum kaan, mata elobay yâsuumaay momakiimom ma bukanaku kagawutum jûdew, di kêemi di hûpiiraahu ha Emitay ewuum bukanaku kagam jûdew, ma egawiil bukanaku kagam eniilay yanoray, ka mbi kêemi di wahaw wa Emitay emmi mbi ewul mata Kristu Jesus.7 Moo, mata kañankiitaku kata yo, di poop mâsuumamu mata yo, momakiimom ma ewulumommi bugoroora'ube bata jañaaŋenaju jata elobay yâsuumaay, mata sembaasu sa ewulommi. 8 Palimo ma igam anaw ahammi mâtiiti di bukanaku peh kanapaaku, be Emitay di ewulom kañankiitaku ma iñaaŋen bukanaku kagawutum jûdew elobay yâsuumaay, yaakum husaanumahu hahahum noon hata Kristu. 9 Nîyis poop bukanaku peh maama huhaanaa'uhu hata Emitay hâñoorim huloom. Mata Emitay yâwwemmi wahaw peh, êñoorum huhaanaa'uhu nownu napiyaanu. 10 Ma mbi uynumaw wajakutaaw, di yahaanay yata wo ammi hatiya di emitay, ujuk grîsiya, di umanj mâmiilankenamu mata Emitay mahahum noon. 11 Wahaw uwu Emitay ega wo mata Kristu Jesus aamom Ata Emit atoolaal, ma ga non ma yoo ênongaalim kata kaŋ niŋanu wah bâwworut. 12 Mata, mata kasohooraku katoolaal di Kristu, ma ûynena aloom, momakiimom nurumenaal ma ujuumaal kayooŋ di Emitay bâkoliit. 13 Moo, înje malhawem di miwuul ma aatuba jibeño mata hûlaamahu ha emmi di ho matawuul, mata hoo hugam kasalaku katawuul.
Pawlu nalhaw joon be bata bukanaku kata Emitay
14 Momakiimom ya îtiigen kayooŋ Ampawolaal, ma ilhawool, 15 aamom a sîbajoorumasu peh, sata hatiya di emitay, di sata etaamay, sêemuntom, 16 ma eenool awuluul di husaanumahu hata di kâyyaku katawool, sembaasu sa mbi sigawuul ma kâynenaku katawuul kûnik, hurim Buynumabu batawool. 17 Nilhawool poop ma Kristu akin di sîsigirasu satawuul, mata ma jîynenoom, ma mbi kâkinooraku katawuul keeli kubaj kuhaar, di kujuum; 18 ma miwuul, di poop kutiyolaal kata di buruŋabu, mbi jeeli jinamulen mata mawuŋamu, di mabalhamu, di mâraagiyaamu, di poop mâlahaamu mata kâkinaku kata Kristu. 19 Moo, nîkine ma jîmir kâkinaku katawool, palimo ma kanamulenaku katawool kuhammi katoolaal, be nîkine ma jeen huc hunoonahu hata Emitay.