Grîsiya eniilay yata Kristu
4
Momakiimom înje jammi ma ikulhim hurim Ata Emit, înje malhawem di miwuul ma jirees jak di buruŋabu ba Emitay êwolluum di bo. 2 Moo, aatuba jigawooro, di jiga bukanaku kahepum, di jiga bukanaku kasohoorom, di jiga poop bukanaku kaalim kumuntenoor, di kâkinooraku dilo. 3 Di jiga poop di sembe ma kasohooraku kata kâsuumaayaku, ka Buynum Bunapaabu bawulem kulako di miwuul. 4 Mata eniilay yanor keb ebaam, Buynum banor poop keb bubaam, non poop non ma baam wah wanor keb wa jikobem di wo, wa Emitay êwooluum be bata wo. 5 Ata Emit anor keb abaam, kâynenaku kanor keb kubaam, kâbatisumaku poop kanor keb kubaam. 6 Emitay yanor keb ebaam, yagam Ampaw an peh, yahammi an peh, yagoroorem di an peh, ban poop di yêemmi di an peh.7 Be anoowan ata d'ulaal, nabaje mâseeliyaamu ma Buynum Bunapaabu buwulem wa Kristu awuloom ma ajommi di mo. 8 Momakiimom ma baŋiicerabu bâñoyyaabu bêenummi:
Naŋoole be hatiya,
ma aŋarnen emiikeelay,
ban nâgiiter bukanaku mâseeliyaamu ma Buynum Bunapaabu buwulem.
9 Kama waywoom waaneyim oo aŋoom? Yîse kaan, oo awalom be dîŋadu dahammi mâlah dâada di etaamay. 10 Moo, anaw awalom be dâada di etaamay, oomu poop kaŋ aŋoom be hatiya di emitay, ma mbi oo aali âmiri tiŋ peh. 11 Oomu poop kaŋ awuum bukanaku mâseeliyaamu ma Buynum Bunapaabu buwulem, ma kaaku kuga kumakaaku kata Jesus, bukaaku di kuga buñaaŋenaabu bata kûboñaku kata Emitay, bukaaku buñaaŋenaabu bata elobay yâsuumaay, bukaaku di kuga yahaanay yata grîsiya, di poop bulhikitenaabu bata elobay yata yo. 12 Emitay ega mo, ma yeeli ebandoor bukanaku kata yo kanapaaku, ma mbi kugoroor be bata yo, ma eniilay yata Kristu yeeli ejuumeni. 13 Ma mbi ulaal peh ooliyaal ûriiŋaal di kasohooraku kakayumulom mata kâynenaku ka ookaam, nûmiraal poop Añool Emit. Ma mbi ugawaal bukanaku kankum di kâyneneku, poopii nutookaal maama Kristu aanom; 14 ma ootunki ugawaal non balaabu kayiiloorem di waajeelaaw, kaŋareyiim non êruntoora di balhikiterabu bata mûcalamu bata ejamaatay kabuntenem bukanaku ma kugawiil kurees di uruŋaw wajakutaaw. 15 Be mbi usoolhenaal malhegenumaayamu mata jâkinooraju, ma mbi ooliyaal ukoobenaal di wah peh, poopii nutookaal hunoonahu hata Kristu, agam hûkuwahu. 16 Mata Kristu agawem ma ujimaw wata eniilaya peh ulheb, di ugawi poop ma usohoor, ma kajimoojim kulako tiŋatu tata ko. Ma mbi kajimoojim kuga jaa bugoroorabu bata ko, eniilay di êrus ma ekooben di jâkinooraju dilo.
Eroŋay yunkulay di Kristu
17 Moo, nîkine iwasiyenooruul di kañaaŋaku kata Ata Emit, ma eenuul, atunki jîreesikoorb non ma bukanaku kâmirutum Emitay kûreesikoorem, ka banongerabu batayiil bujakutum. 18 Mata ûyegetaw watayiil wowu di emuucenay, momakiimom ma kêeliitummi kêemi di eroŋay ya Emitay ewulem, ban poop kunamulent makeel, mata ûyegetaw watayiil wowu ma wankum. 19 Ban poop ma epuño eleem di buko, momakiimom ma kûŋarummi siniilasu satayiil kuga di wâgawikooraw, ma ya kuga wah peh wâgiipunenim.
20 Be miwuul ntuwa mo ma jilhikitenim mata Kristu. 21 Malhegen miwuul jijame matawool, di jilhikiteni poop jak ma jîmir malhegenumaayamu mammi d'oo. 22 Moo, neenuul jîjupulo bagawerabu bapiyaabu, ma jiwalen hunoonahu hajakutaahu, habuntenem ajamaat ma hugawool âgawikoor. 23 Di jiwaa'bo poo ûyegetaw watawuul utiinoori, 24 ma jîjupo hunoonahu hunkulahu hâcaalhumulom di Emitay, hagawem ajamaat aga anaw alhegenumaayaw, alhebum, ban nanap.
25 Momakiimom neenuul, jiwaa'bo macalamu, ma ya jilob malhegen, mata anoowan ata d'ulaal, kajimaku kata eniilay yanoray.
26 Moo, jibirik jaa, aatuba jiwaa'bo ma hubirika'uhu hutahuul di kûbajumiñaku. Aatuba jilako di hubirikahu be na mbi jaley alo dô. 27 Aatuba jiwaa'bo diyaabu ma ebaj buruŋ di miwuul.
28 Anaw âkuutem, nawalh êkuutay, ma asoh bugoroorabu bajakum di uŋenaw watawool, ma aali abaj wah be batawool, naali poop aanen kûsukateenaku.
29 Baloberabu bajakutaabu, mumulet bi bûcaalhumul di utumaw watawuul, be mbi ya jilob elobay yâsummi yaalim ecookoor, di yeenen bukanaku ka mbi kujam yo. 30 Aatuba jiga Buynumabu bata Emitay ma buga ñânkiiteni, mata bo ba jîbikumim be nata hukahu na mbi Emitay ehikul bukanaku. 31 Di jiwaa'bo poop malesamu, di mâhaahamu, di hubrikahu, di jahimbenooraju, di jâgelikooraju, di poop wah peh wajakutaaw wammi tutaru tatawuul. 32 Ma jiga bukanaku kajakum ûyeget kaanenoorem, di jibomketoor, di jiñankiitoor, non ma Emitay poop eñankiituum di Kristu.