Eroŋay yajakum
5
Moo, ma jigam kuŋilaku ka Emitay êkimmi, mbi ya jiga non ma yoo egawem. 2 Mbi ya jiboolaatoor non ma Kristu poop aboolaatolaam, poopii nawul humuumahu hatawool be batoolaal, ma huga heenaayahu haputem sûum wawulim be bata Emitay.3 Moo, ma jigam ban kuŋilaku kata Emitay, kûbajumiñaku kata kâmooraaku, di wâgawikooraw, di poop jangooŋutenaju, mumulet bi nki ujami di miwuul. 4 Jeetuba mbi ya jilob balober bakojuwe, jeetuba jilob poop non bukan kânuutuwe, palimo poop balober bapute, be mbi ya jeen Emitay jêrejep. 5 Mata, jake ma jîmir kaan bukanaku kakayem kâmooraaku, di kaaku kâgawikoorem, di poop kaaku kagooŋutenem, dagam poop non jawaasen ûkiin, keetubi kêemi di kâyyaku kata Kristu di poop Emitay.
Eroŋay yata di majaaŋaamu
6 Aatuba jiwaa'bo ma an abuntenuul di hurim hagawutum halhegenumaayahu, mata, mata wahaw uwu, wo wa mbi ukiimo ma mbi hubirikahu hata Emitay hûlowum bukanaku kalatem kajam di yo. 7 Moo, aatuba jêemi di buko. 8 Mata nownu, di emuucenay jilakuwemmi, be jaat miwumu ban di majaaŋaamu mata Ata Emit. Moo, mbi ya jiga non ma bukanaku kammi di majaaŋaamu kugawem. 9 Mata majaaŋaamu ya muga an âsuum, di mugawool acol, di mugawool poop aga anaw alhegenumaayaw. 10 Moo, jake ma jiga sembe ma mbi jîmir wahaw wa Ata Emit âkimmi. 11 Aatuba jêemi di wahaw wajakutaaw wata di emuucenay, be mbi jitaawen wo ma mbi ulati. 12 Mata wahaw wa kûñooruwem ma kuga, palimo an alobi keb mata wo, nupuño. 13 Mata wah peh ugawi jaa di majaaŋaamu, di ûmiri maama weenom. Mata majaaŋaamu ya muhikiten wah peh ma umanji. 14 Momakiimom ma lobumim kaan:
“Utonko aw jammi ma uŋotum!
Ûlhaalowul aw jammi di kuketaaku,
ma Kristu mbi ahikiteni.”
15 Moo, jiga to ûyegetaw watawuul di maama mbi ya jiga. Aatuba mbi ya jiga non bukan kanamulentum makeel, be mbi ya jiga non bukanaku kajaalhom. 16 Di jiga poop di sembe ma ya jiga jak, mata kukaku ka oomaam di ko jaat, ntuwa kuk kajake. 17 Momakiimom aatuba mbi ya jiga non bukan kajalhowut, be mbi ya jipaam ma jinamulen wahaw wa Ata Emit âkimmi jiga.
18 Aatuba jîkali bunuk bakajenem an, be jeen huc Buynum Bunapaabu. 19 Mbi ya jiyeeŋ uñaaŋaw wata jasalaju jata Emitay, di poop uñaaŋ waawu wata Ata Emit, ma jînikenoor; di jiyeeŋ wo di ûyeget wajake be bata yo. 20 Mbi ya jeen Emitay jêrejep yagam Ampawolaal di wah peh, di kañaaŋaku kata Ata Emit aamom Jesus Kristu.
Yîinaay koo di kupañooriil
21 Mbi ya jiga anoowan, najam di apaalool, non ma jijamem di Kristu.
22 Miwuul yaaraay,a mbi ya jijam di kupañooruul non ma jijamem di Ata Emit. 23 Mata ânniinaaw, oo agam hûkuwahu hata apañoorool, non ma Kristu agam hûkuwahu hata grîsiya. Mata malhegen, Kristu oo akeem be bata grîsiya yagam humuumahu hatawool. 24 Mata non ma grîsiya ejamem di Kristu, moomu poop kaŋ ma añakanaw mbi ya ajam di apañoorool di wah peh.
25 Miwuul poop yîinaay, mbi ya jiboolaat kupañooruul non ma Kristu aboolaatum grîsiya, poopii nawul humuumahu hatawool be bata yo, 26 ma aga yo enap, ban nâkullhenun'yo mumelamu, di poop elobay yatawool. 27 Aga mo, ma mbi âyisooro yo, najuk ma egam grîsiya yabaam êriibiinaay, yaakutum tiŋ taseme, yahohoñoorutum, yaakutum tiŋ tâyije, ban di enap, ban poop eekut tiŋ ta an aalim âlobikoorum mata yo. 28 Moomu poop kaŋ ma mbi ânniine, aboolaat apañoorool, non ma aboolaatum eniilay yatawool. Mata ânniinaaw aboolaatum apañoorool, eniilay yatawool naboolaatum. 29 Mata an alet âkintum eniilay yatawool, be an peh ya âbooroor eniilay yatawool ma acookoo'yo, non ma Kristu poop agam grîsiya; 30 mata ulaal ugawaam ujimaw wata di eniilay yatawool. 31 Momakiimom ma ânniinaaw mbi âwalhum bo ampawool di iñaawool, ma kubomoor di apañoorool ma buko egabaay kuga eniilay yanoray. 32 Ûde wahaw wâamak walobim wammi ma ûñoorom di eloba'uye. Be înje malobem mata Kristu, di grîsiya. 33 Be neenuul poop, anoowan naboolaat apañoorool, non ma aboolaatoorom. Yaaraay poop, di kujam di kupañooriil.