Kuŋilaku koo di simpayiil
6
Miwuul kuŋilake, mbi ya jijam di simpawuul, mata mo majakum ma jiga, mata miwuul jata Ata Emit. 2 Mata kûboñaku kûtiyaaraku kaakum wahaw wa Emitay yemmi mbi ewul, keene: “Ujam di ampayi koo di iñaayi, 3 ma mbi ooli ubaj kâsuumaayaku, nooli poop upiyo di etaamay.”4 Miwuul jabaam kuŋilaku, aatuba jiga kuñooluul kubirik, be mbi jiyariil di buruŋabu bata Ata Emit, ma keeli kubaj bayarer bajake.
Emiikeelay koo di bukanaku kakiliim
5 Miwuul emiikeelay, jijam di bukanaku kakiluum ute di etaamay. Jijam di buko di bûkolaabu dilo, di poop ûyeget wasete, ma jigoroor be batayiil non be bata Kristu jigawem di mo. 6 Aatuba jigoroor keb na bukanaku kakiluum kujuumuum ma mbi kûririgen di miwuul, be mbi ya jiga wah peh di ûyeget wasete, mata miwuul emiikeelay yata Kristu, ma mbi Emitay êririgen di miwuul. 7 Jiga ugorooraw watawuul jak di ûyeget wasete non poop noon bata Ata Emit, be untuwa be bata ajamaat keb. 8 Jake ma jiwolho kaan, anoowan agam jak, Ata Emit mbi ancaamool, palimo agawe amiikeel, palimo oo agawutool.
9 Miwuul jakiliim, jicookooriil jak, aatuba jîhimbeniil. Jiwolho kaan miwuu'ma jibomum di buko Ata Emit anoraw ammi hatiya di emitay âgaworiitum aahe di aahe.
Wañaw utiikumaayaw wata Emitay
10 Ma îwuñen, neenuul jake ma jipaam ma jihaŋ mabaj sembe di kaŋenaku kata Ata Emit, hurim sembaasu sâmakaasu satawool. 11 Jîjupo wañaw peh utiikumaayaw wa Emitay ewuluum, ma mbi jeeli jijuum jak ma jitiik di diyaabu yammi ma eŋaakoorem di miwuul. 12 Mata hutiikahu hatoolaal ntuwa di ejamaatay, be di uynumaw wajakutaaw, di yahaanay yata wo waakum etaama'uwe yammi di emuucenay, di poop sembaasu sata majakutaamu sammi ûdu hatiya. 13 Moo, jîjupo wañaw peh utiikumaayaw wata Emitay, ma mbi hukahu hajakutaahu hûriiŋul, di jeeli jijuum tir ma heetukahaatuul be na mbi hubawo.
14 Moo, jijuum jak ma jiŋar malhegenumaayamu ma muga non ubaŋaw wa jîkokowumem; bagawerabu batawuul bacolum, di buga non bûjupaabu bata muhaañaayamu babaahenem êsigir. 15 Di jibandoor ma jiñaaŋen elobay yâsuumaay yata kâsuumaayaku, ma ega non sikatabasu sa jikatabom. 16 Di wahaw uwu peh, jiŋar kâynenaku katawuul ma kuga non ebangalay mbi jîmindenum simeeraasu sata sambunasu sa Esatanaay mbi eyaluul. 17 Di jiŋar kapakaku ma kuga non ênkuuhaay yata muhaañaayamu; di jiŋar poop elobay yata Emitay ma ega non kajaasiyaaku ka Buynum Bunapaabu buwulem. 18 Di jiga ûyegetaw watawuul di kalhawaku kata Emitay; di jilhaw yo poop di sembaasu sata Buynum Bunapaabu. Di jijaamo poop ma jenken di kalhawaku kata yo be bata bukanaku peh kanapaaku bahelekent. 19 Di jilhaw poop Emitay be bata înje, ma mbi een ilob, nilob elobay yacolum bâkoliit, ma eeli iga bukanaku kûmir huhaanaahu hata elobay yâsuumaay yata Emitay. 20 Mata Emitay ejotommi ma iga añaaŋenaaw ata elobay yâsuumaay, momakiimom ma êemummi jaat di ekullhay. Moo, jilhaw yo be bata înje, ma eeli iloo'yo non ma mbi elobi, bâkoliit.
Pawlu nasaapiil
21 Moo, Tikiku aamom atiyolaal a uboolaataam, agam agorooraaw alhegenumaayaw ata Ata Emit, oo mbi añaaŋenuul peh mata înje, ma mbi jeeli jîmir maama ommi ube, di jîmir poop wahaw wa igawem di wo. 22 Momakiimom nibolluwool ma mbi jîmir mâtooli, naali poop agawuul jînik.