KAYTAKU KA PAWLU AŊIICUM BE BATA
PHILEMOŊ
1
Înje Pawlu jammi ma ikulhim mata Kristu Jesus, ûli di atiyolaal Timootiw uŋiiculom kayta'uke be baabu d'aw Philemoŋ, jagam âpaaloli a uboolaatum a ubomaam bugoroor, 2 di âliinolaal Aphiya, di âtiyolaal Arkipu agam apaalolaal a ommi di hûlaamahu, di poop grîsiya yammi yanŋi. 3 Moo, nîkine ma Emitay yagam Ampawolaal, di Ata Emit aamom Jesus Kristu awuluul kañankiitaku, di kâsuumaayaku.Kâynenaku di mâsuumamu mata Philemoŋ
4 Atiyom Philemoŋ, nanoonan na ilhawem Emitay, ya iwollho ma isal yo matayi, 5 mata nijame ma uboolaatum bukanaku peh kata Emitay, di poop ma ûynemmi Ata Emit aamom Jesus Kristu. 6 Ya ilhaw yo ma egawi ma kâynenaku katayi kuhaŋ mabaj sembe, di egawi poop ma unamulen wahaw peh wajakaaw wammi d'ulaal, mata kasohooraku katoolaal di Kristu. 7 Atiyom, jaboolaataju ja uboolaatum ajamaat, jigawom îririgen noon, di jigawom poop îwaayen, mata nugawe ûyegetaw wata bukanaku kata Emitay ma ûtik.
Pawlu nalhaw be bata Oneesimu
8 Moo, palimo ma îmiim kaan nibaje sembe d'aw, ma îyisi maama mbi uga mata ma igam atiyi ata di Kristu, 9 be mata ma iboolaatim, nîkine ma uñankiit ma ugawom wahaw wa mbi ilhawi, palimo ma igam Pawlu ahallemmi ban ume, ammi di ekullhay mata Kristu Jesus. 10 Moo, nîkine ilhawi mata añoolom Oneesimu, a ibaam ûde di ekullhay. 11 Malhegen agawent an ajake be baabu d'aw, be mowme nagawe anaw ajakaaw be baabu d'aw, d'înje poop. 12 Ma ilaañeliwool, be êsigiray yûmbaam yoyu d'oo. 13 Mata nîkine ma ulakuween ube d'oo ma aŋareen hiŋahu hatayi, ma acookoorom ûde da emmi di ekullhay mata elobay yâsuumaay. 14 Moo, îkint igawi di sembe aw bâkint. Be nîkine ma uga mo an bañuusuti, ma leetubi ga non înje igawem d'aw di sembe. 15 Mata deeliye ga oo ârangiyeenim nownu, ma mbi ooli ookool jaat be nanoonan. 16 Moo, mowme agawut ban amiikeel, be nahaŋe amiikeel, mata nagawe ban atiyolaal a înje iboolaatum; ban nîynene kaan aw nuhaŋ maboolaatool, mata palimo noo oo bagawut âynena, nuboolaatoboolaatoom; benkiteemo mowme na agam ban anaw atayi, di poop atiyi ata di Ata Emit. 17 Moo, usohom jaa non apaali ata di bugoroorabu, nuyabool noon înje. 18 Ga jaa non nagawi wah wakeel wâkojiye, be mante nayaareri wah, nuga wo di hiŋahu hûmbaam. 19 Malhegen înje Pawlu iŋiiculom ume di uŋenaw ûmbaam: Înje mbi incaami. Be aatuba ôonul înje iwolhenem d'aw di kaan aw ma uyaarerommi eroŋay yatayi. 20 Moo, atii uñankiitom, di kañaaŋaku kata Ata Emit, ugawom ma êsigiray yûmbaam êwaayen mata ma ugam atiyom ata di Kristu.
21 Malhegen ma iŋiiculim ume, nîynene di kaan mbi ugawom wahaw wa ilhawim. Ban nîynene poop kaan mbi ugawom waawu wahammi wa ilhawim. 22 Nîkine poop ilhawi ma ubandoorom êwaanaat, mata nîynene kaan Emitay mbi ejam kalhawaku katawuul, ma ebollom be baabu di miwuul.
Pawlu nalob hurimahu hûbanumahu
23 Epaaphras a ommi ûde di ekullhay mata Kristu Jesus, nasaapuli. 24 Di poop Markus, di Aristarku, di Demas, di Lukas, kagam kupaalom kata di bugoroorabu.
25 Moo, kañankiitaku kata Ata Emit aamom Jesus Kristu, kulako di miwuul. Amiin.