Galatas 3

Kâynenaku kahikulem ajamaat

Miwuul jata Galaasiya, jînuutuwe! Kama ay abuntenuum? Kama inamulentuul maama Jesus Kristu ariiŋim di êkrusay? 2 Moo, jiñaaŋenom: Kama Buynum Bunapaabu ba jiyaam, jîyabum bo mata jagawaju jata non ma kûboñaku kata Emitay kuloom, be mante mata kâynenaku ka jîynemmi di elobay yâsuumaay ya jijammi? 3 Kama jînuuto? Miwuul jâcukummi di Buynum Bunapaabu, moo mowme jîkine jîwuñenum di sembaasu satawuul? 4 Kama humuntenahu ha jimuntemmi di wahaw wameeŋe, jimunten ho ebeebel? Be mumulet bi hugaween ebeebel. 5 Kama Emitay yawuluum Buynumabu bata yo, di ega poop miñamu mata sembaasu sata yo di tutaru tatawuul, soŋo pîya yoo egam wahaw uwu mata ma jigam non ma kûboñaku kata Emitay kuloom, be mante mata ma jîynemmi elobay yata yo ya jijammi?

6 Jiwolho mata Abrawoŋ; Abrawoŋ oo âynemmi Emitay, momakiimom ma yeenumoom oo anaw acolum. 7 Moo, jake ma jîmir kaan bukanaku kâynenyom ko kagam kuñool Abrawoŋ. 8 Mata Baŋiicerabu Bâñoyyaabu, bûlobaaliye kaan Emitay mbi ega bukanaku kagawutum jûdew ma kuga bukanaku kacolum di yo mata ma kûynenyom, non ma eñaaŋemmi Abrawoŋ elobay yâsuumaay ma yeenool: “Âmbasuk peh mbi kubaj hûpiiraahu matayi.” 9 Moo, bukanaku kâynenyom, mbi kubaj hûpiiraahu non Abrawoŋ mata kâynenaku katayiil.

10 Be bukanaku peh kâynemmi mata jagawaju jata non ma kûboñaku kata Emitay kuloom, bukana'uku koku di kapaawaaku, mata dôdu ma ŋiicim di kaytaku kaan: “Anaw agawutum wahaw peh wammi di kaytaku kata kûboñaku kata Emitay, mbi kapaawaaku kûlowumool.” 11 Malhegen an aaliit agawi ma aga anaw acolum di Emitay mata jagawaju jata non ma kûboñaku kata yo kuloom. Mata Baŋiicerabu beene: “Anaw acolum, ya aroŋum mata kâynenaku.” 12 Mata kûboñaku kata Emitay, kusohoorut tiŋ takeel di kâynenaku, non ma Baŋiicerabu buloom kaan: “Bukanaku kagawem non ma kûboñaku kata Emitay kuloom, mata ko mbi kûroŋum.”

13 Be Kristu nalaañ aga non anaw ammi di kapaawaaku, ma aali amellhenolaal di kapaawaaku ka kûboñaku kata Emitay kuŋallolaam, mata dôdu ma ŋiicim kaan: “An kaŋ peh arendenim di êkrusay, omu di kapaawaaku.” 14 Momakiimom ma Kristu âgawummom, ma hûpiiraahu ha Emitay yemmi mbi ewul Abrawoŋ, mbi heeli huwuli be bata bukanaku kagawutum jûdew mata Jesus Kristu, ma ulaal poop mbi uyabaal Buynumabu bata Emitay mata ma ûynenaam.

Kûboñaku Kapiyaaku di wahaw wa Emitay yemmi mbi ewul

15 Kutiyaay, nîkine ilobuul wahaw wa ejamaatay egawem ma mbi jeeli jinamulen. Na mbi anaw aŋiic ma âanul mbi aga anaw wah uman, ban naŋiic dô kañaaŋaku katawool; mumulet bi an akeel apas wo, mumulee'poop bi an abaŋen dô wah wakeel. 16 Moomu poop kaŋ ma Emitay eloom Abrawoŋ ma yeenool mbi ewulool wahaw, koo di anaw a mbi âcaalhumul di êbajoorumay yatawool. Moo, Baŋiicerabu bulobut mata bukanaku kata sîbajoorumasu satawool, mata bulobut mata bukanaku lhay, be bulob keb mata anaw anor agam añoolool, aamom Kristu. 17 Moo, nîkine ilobuul eenuul, na Emitay egam yaŋaayay di Abrawoŋ, di yeenool wahaw wa eloboom, mbi egawoo'wo. Ban na ujaañaw uhulhum sîteemeerasu sibakiir, di anabawo di kunŋen (430), ña kûboñaku kata Emitay di kûriiŋul, be keeliit kupas yaŋaaya'uyu, keeliit poop kuga ma yeetukaga wahaw uwu wa eloboom di wo. 18 Moo, ga jaa non wahaw wa Emitay yemmi mbi ewul Abrawoŋ, yoo ewuloowom mata kûboñaku kata Emitay, ña kama ntuwa mata ma yeenoom mbi ewulool wahaw. Be malhegen, Emitay yoo ewuloowom, mata ma ebiim bi yeenoom mbi ewuloo'wo.

19 Kama kûboñaku kata Emitay, mata wa kuboñumulim? Malhegen kuboñumuli ma mbi keeli kûyisolaal wahaw wajakutaaw, ban di kulako to be na mbi anaw ata di êbajoorumay yata Abrawoŋ âkayil a Emitay yemmi mbi ewulolaal. Kûboña'uku di kubolli kumalaakaku bi kuwul âynaaw agam ajuumaaw ata êsukay di Emitay. 20 Moo, non ma joonutum ajuumaaw be bata an anor, moomu poop kaŋ ma Emitay egam, mata yoo yanor.

21 Kama soŋo pîya kûboñaku kata Emitay koku ma kulatum wahaw wa Emitay yemmi mbi ewul? Iyiy! Ntuwa moo! Mata gaween jaa non Kûboñ kakeel Kapiyaaku koku to kaali kuga ajamaat aroŋ, ña non kama ajamaat naaliye agaweeni poop anaw alhegenumaayaw mata ko. 22 Mata Baŋiicerabu mo ma buloom kaan, bukanaku peh koku di kûbajumiñaku, ma Emitay mbi yeeli ewul bûynenaabu wahaw wa yemmi mbi ewul bukanaku kâynemmi di Jesus Kristu.

23 Be bala kâynenaku kûriiŋul, kûboñaku kata Emitay koo ma kugenkolaam ma ukobaal hukahu na mbi kâynenaku kûriiŋul. 24 Moo, Kûboña'uku Kapiyaaku, koo kasoholaanom non kêeken be na Kristu akaylom, ma mbi ooliyaal ugawaal bukanaku kacolum di Emitay mata ma ûynenaam Kristu. 25 Be na Kristu ârillom ma ûynenaalool, ña uletaa'ban di kêekenaku kata Kûboña'uku Kapiyaaku.

26 Mata miwuul peh jigawe ban kuŋilaku kata Emitay, mata ma jîynemmi Jesus Kristu; 27 mata na jîbatisim, di jiga anaw anoraw d'oo, ban poop di jilhiimeni hunoonahu hatawool. 28 Moo, bajut ban maame ume jûdew, ume agawut jûdew; bajut ume amiikeelaw, ume agawut amiikeel; bajut poop ume ânniinaaw, ume añakanaw. Mata jaat miwuul peh, jigawe ban anaw anoraw di Kristu. 29 Ña ma jigam ban bukanaku kata Kristu, jaat miwuul jata di êbajoorumay yata Abrawoŋ ja mbi jiyab wahaw wa Emitay yemmi mbi ewul.