Ugawutaa'ban emiikeel be kuŋilaku kata Kristu
4
Nîkine eenuul joon, na mbi aŋilaw a mbi aŋar wahaw wata ampawool aga naroŋ di aŋil, palimo ma akiim wahaw peh wata ampawool, ya asohi non amiikeel. 2 Mata ma arommi di aŋil, ya alako di uŋenaw wata bukanaku kaakoom, ban poop keeken wahaw watawool, ii be na mbi hukahu hûriiŋ ha ampawool aliikum. 3 Moomu poop kaŋ ma ulaal ugawaam. Mata nownu na kâynenaku katoolaal kankutum, nugawaagawaanom non emiikeelay kugenkim di mûndeemaanamu mata di etaama'uye. 4 Be na hukahu hûrimmi ha Emitay epimmi, ña di êboñul Añool yo ma añakanaw abajool, ban nakooben di kûboñaku kata Emitay, 5 ma ahikul bukanaku kammi ma kugenkoorom di kûboña'uku kapiyaaku, ma mbi ooliyaal ulaañaal ugawaal kuñool yo.6 Moo, ma jigam kuñool Emitay, momakiimom ma eboñumulom Buynumabu bata Añool yo di sîsigirasu satoolaal, bâwooleyom ma been yo: “Aba,” daamom Ampoom. 7 Mowme jigawut ban emiikeel, be kuñool Emitay. Moo, ma jigam ban kuñool yo, mbi ewuluul wahaw peh wa yemmi mbi ewul kuñool yo.
Pawlu nanongoor mata bukanaku kata Galaasiya
8 Mata nownu ma jîmirutunom Emitay, momakiimom ma jîgawunom emiikeelay yata simitasu sagawutum salhegenumaayasu. 9 Be mowme ma Emitay egawuum ma jîmii'yo, ban yoo êmiraaliwuul, moo mata wa ma jîkimmi jilaañ joon be bata kûboñaku kapiyaaku kabajutum sembe, ma jîkin joon jiga emiikeelay yata ko? 10 Mata wa ma jisohumem kuk kaaku, di kulheeŋ kaaku, di sitaŋ saasu, di poop ujaañ waawu? 11 Înje nîkoliyuul ka mbi bugoroorabu ba igoroorum bugawi ebeebel.
12 Moo, kutiyaay, nîkine ma jeeno non înje, mata înje poop neenuseenuwemmi non miwuul. Ban jigawutom makeel makojuwe. 13 Miwuul jîmire kaan, kâjuutaku kasohommi kokagawommi ma îkayil bi iñaaŋenuul elobay yâsuumaay kâtiyaar. 14 Be palimo ma kâjuutaku kûmbaam kûlaamenuum, jilatutom, jirembeelutom poop, be di jiyaañuwom non amalaak ata Emitay, non kaŋ non înje Jesus Kristu. 15 Kama hûririgenahu ha jîririgemmi hôohey? Mata înje nîynene kaan, miwuul jeeliyeene, mbi jîlhoŋuleen kûkilaku katawuul ma jiwulom ko. 16 Ña kama mowme nilaañe iga âsuumutaaw atawuul, mata ma ilobuum malhegen?
17 Jijaa, bukana'uku kammi ma kugawem di miwuul non kuboolaatuul, kuboolaatutuul, be kûkine kuwaasolaal ma mbi kûtiiw ûyegetaw watawuul be baabu di buko. 18 Moo, jake ma jiga ûyegetaw di wahaw wajakaaw, be aatuba jiga mo keb na mbi jijukom. 19 Kuñoolom, malhegen înje nilaañe joon îlaam matawuul non anñaakan âkuloore, be mbi enken di miwuul be kaŋ na mbi Kristu ajuumeni jak di miwuul. 20 Moo, nîkine îkayil be ta jemmi mowme, ma mbi eeli ilobuul di balober baabu. Mata mulaañom noon matawuul.
Saara koo di Agaar
21 Moo, miwuul jâkimmi jisoh kûboñaku kata Emitay, jiñaaŋenom: kama jijamut maama kûboña'uku kapiyaaku kuloom? 22 Mata dôdu ma ŋiicim kaan: Abrawoŋ kuŋilaku egaba nabaam, aahu ata añakanaw agam amiikeelaw, aahu ata apañoorool. 23 Añool umu agam amiikeelaw, oo abajim non ma aŋil peh abajeyim, be aahu ata umu agawutum amiikeel, nabaji non ma Emitay ebiim bi elob Abrawoŋ. 24 Moo, wahaw uwe uga kaliikumaku. Yaaraa'uyu egabaay, koo kugam poop non saŋaayasu sigaba. Yaŋaayay yagawim di hurimbiliŋahu haaneyim Sinaay, yoo egam Agaar. Kuŋilaku kabajim mata yo, buko emiikeelay. 25 Malhegen Agaar oo agam poop non hurimbiliŋahu hata Sinaay, hammi di êsukay yata Arabiya, haliikumim Jerusaleŋ yata jaat, yammi di humiikeelowutaahu, di poop bukanaku peh kândom. 26 Be Jerusaleŋ yata hatiya di emitay, yoyu ma êwaayemmi, moo yoo egam iñaawolaal. 27 Mata dôdu ma ŋiicim kaan:
Aw jajamutum huhaana, ûririgen;
aw jâkuloorutum, ûŋaaŋulo ma ûsuumaay.
Mata anñaakanaw arembeelim,
mbi ahaŋ mabaj
kuŋil kayeje
aahu aakum ânniinaaw.
28 Kutiyaay, miwuul kuŋilaku kabajim non Isaki, kabajim non ma Emitay eloom. 29 Mata nownu aŋilaw abajim non ma aŋil peh abajeyim, nâlaamenlaamemmi aahu abajim di sembaasu sata Buynum Bunapaabu. Moomu poop kaŋ ma gaweyim di mo jaat. 30 Kama Baŋiicerabu bu buloom? Beene: “Ûcaalhen anñaakanaw agam amiikeelaw, koo di añoolool, mata mumulet bi añoolool kûgiitoor wahaw wata ampayiil koo di añool anñaakanaw agawutum amiikeel.” 31 Moo, kutiyaay, ulaal ugawutaal kuñool umu agam amiikeelaw, be ulaal kuŋilaku kata aahu agawutum amiikeel.