Jisoh kayiihuluwaaku ka jeekum
5
Malhegen Kristu oo ahikulolaam ma mbi ooliyaal ûwaayenaal di malhegen. Moo, jisoh lit hûwaayenahu ha jeekum, ma aatuba jîkin jikokooro joon humiikeelowutaahu.2 Moo, jitallhen maama mbi ilobuul. Înje Pawlu neene, jiwaa'bo jaa ma kugawuul huhaanaahu hata yîinaay, ña di jîmir kaan Kristu a jîynemmi, jîynenool ebeebel. 3 Ma ilancenuu'mo joon, na mbi anaw âkin ma kugawool huhaanaahu hata yîinaay, ña manooman anaw umu poop mbi aga wahaw peh wa kûboñaku kata Emitay kuloom. 4 Miwuul jagawem non ma kûboñaku kata Emitay kuloom, ma mbi jeeli jiga bukanaku kalhegenumaayaku, kasohooraku katawuul di Kristu, kutiji ban, ban poop jilee'ban di kañankiitaku kata Emitay. 5 Be ûli hurim Buynum Bunapaabu, mata ma ûseekummi Emitay, momakiimom ma ukobumem ma mbi êgawoli bukanaku kacolum di yo. 6 Mata di Jesus Kristu, bajut ume nagawi huhaanaahu hata yîinaay, ume agawuti, be wahaw wahammi peh, kâynenaku kajukeyim di jâkin ajamaat.
7 Malhegen miwuul jisohensohemmi buruŋabu jak. Moo, aymoom agawuum mowme ma jiwalen malhegenumaayamu? 8 Jijaa, hunonga'uhu hûcaalhumuloot di Emitay yâwolluum! 9 Malhegen phermentu yinŋet ya ega ma baporabu bulaaw. 10 Be înje nîynene kaan kasohooraku katoolaal di Ata Emit, mbi kugawuul ma jîlaañul ma jisoh buruŋabu joon. Be anaw âlaamenem di miwuul, aga ma agawe, Emitay mbi elesool.
11 Moo, kutiyaay ga jaa non înje ma ilobem kaan jake ma bukanaku kugawi huhaanaahu hata yîinaay, moo mata wa ma bukanaku kûlaamenumewommi? Be ga jaa non mo ma ilobem di mo, ña kama elobay ya ilobem di yo mata êkrusay, eetubi ega an âlaam. 12 Be bukana'uku kâlaamenem di miwuul, haŋ majak ma kukeekuween!
13 Moo kutiyaay, miwuul, miwuul jîwoolim ma mbi jiyiihulo. Be aatuba jiŋar kayiihuluwaa'uku, ma ya jiga non ma siniilasu satawuul sîkimmi, be jeenenoor mata kâkinooraku. 14 Mata kûboñaku peh Kapiyaaku, koku ma kubomim di kûboña'uke kanoraku kammi: “Ûkin anaw a jîhugoorum non ma aw ûkinoorom.” 15 Be jirumoor jaa ma jicokoor, di jijaamo ma aatuba mbi jibujoor.
Wahaw wâcaalhumewuum di Buynumabu bata Emitay
16 Moo, neenuul: Jiwaa'bo ma Buynumabu bata Emitay bureesunenuul, ma aatuba jisoollhen wahaw wajakutaaw wa eniil ajamaat êkinem. 17 Mata wahaw wa eniil ajamaat êkinem, ûjamoororiit di waawu wa Buynumabu bata Emitay bûkinem. Waawu poop wa Buynumabu bata Emitay bûkinem, ûjamoororiit di waawu wa eniil ajamaat êkinem. Moo, wahaw uwu ugabaaw, ûjamoororiit. Momakiimom, ma jeeliitummi jiga wahaw wa miwuul jîkimmi. 18 Be ga jaa non Buynumabu bata Emitay bureesunenem di miwuul, di jîmir kaan, jilee'ban di jisoollhen kûboñaku kata Emitay.
19 Malhegen wahaw wâcaalhumewuum di eniil ajamaat, ya uga an aga anaw akayem kâmooraaku, anaw ânongikoorem, anaw âgawikoorem, 20 anaw akayem keenaayaku, anaw akayem musaayamu, anaw âŋarewuum kajamoorutaku, anaw âŋarewuum bûñoosoorabu, anaw abirikem, anaw angooŋutenem, anaw acecem, anaw âŋarewuum kawaasooraku, 21 anaw âsiibuwikoorem, anaw âkaliyem, anaw aŋaamum, di poop wah waawu wagam non we; ma ilobuul joon non ma ibiim bi ilobuul eenuul, bukanaku kagawem wahaw non uwe, keetubi kunebejurer di kâyyaku kata Emitay.
22 Be wahaw wâcaalhumewuum di Buynumabu bata Emitay, ya uga an aga anaw âkimmi ajamaat, anaw âsuumaayem, anaw ata kâsuumaayaku, anaw aalim humunten, anaw aboolaatem ajamaat, anaw âsuumaaw, anaw âynenaayaw, 23 anaw ahepum buynum, di poop anaw asohoorom. Di wahaw uwe peh, bajut wakeel wa kûboñaku kata Emitay kulatum. 24 Moo, bukanaku kata Kristu Jesus, wahaw wâcaalhumewuum di hunoon ajamaat, di waawu wa eniil ajamaat êkinem, di poop jâkinikooraju, uriiŋi ban di êkrusay. 25 Moo, ga jaa non Buynumabu bata Emitay buwulolaam eroŋay, jake poop ma uwalhaa'bo bo ma bureesunenolaal. 26 Be aatuba mbi ya ugawooruwaal, aatuba ulaahooraal, aatuba ûsiibuworaal poop.