Pawlu koo di kumakaaku kaaku kata Jesus
2
Be na ibammi ujaañaw kunŋen di ubakiir (14), ña nilaañ joon be Jerusaleŋ ûli di Barnabe, be niŋarnen Tiitu. 2 Be ikay bo ma iga non ma Emitay êbaahulommi, îriiŋ nuleeho dîyoonoli di yahaanay yata grîsiya ma iñaaŋeniil elobay yâsuumaay ya iñaaŋenem bukanaku kagawutum jûdew. Mata îkint ma bugoroorabu ba igoroorum, baamom ba igoroorem di bo be jaat, beetuba bugawi ebeebel. 3 Mata palimo Tiitu agawutum jûdew a ûli ureboorem, an agawutool di sembe ma agawi huhaanaahu hata yîinaay. 4 Be bukaaku kâkimmi ma wahaw uwu ugawi, di kûhooloor ma kuga non kutiyolaal ma kûnebejul tutaru tatoolaal ma keeli kulaso kayiihuluwaaku ka ookaam mata kasohooraku katoolaal di Kristu Jesus, ma mbi kulaañenolaal di humiikeelowutaahu. 5 Be ûli oonutiil aawo kaŋ kuur, ma malhegenumaayamu mata elobay yâsuumaay, mbi meeli mujuum jak di tutaru tatawuul.6 Be kaaku ka êsukay kusoom non yahaanay yata grîsiya, înje ijukut hunnahaanowutaahu hatayiil, mata keenentom di hurim hakeel. Mata Emitay êjikeroriit mata haanaahu hata ajamaat. 7 Be di kunamulen di kaan, Emitay ewulommi bugoroorabu bata jañaaŋenaju jata elobay yâsuumaay be bata bukanaku kagawutum jûdew, non ma egam Pedru be bata kagam jûdew. 8 Mata Emitay yoyawuum Pedru sembaasu ma egawool âmakaaw ata Jesus di tutaru tata jûdewwi, yoo poop ewulommi sembaasu ma iga âmakaaw ata Jesus di tutaru tata bukanaku kagawutum jûdew. 9 Momakiimom na Pedru, koo di Tiyaagu, di Joŋ ka bukanaku kusoom non sîlandasu sata grîsiya, kunamulemmi kaan Emitay ewulommi bugoroora'ubu, ña di kûyaakoli ûli di Barnabe. Ña nujamoor ma ûli ukay be baabu bukanaku kagawutum jûdewwi, buko di kukay be baabu kaaku kagam jûdew. 10 Be ban di kêenoli, mbi ya uwollho kûsukateenaku kata di grîsiya yata bo. Ña niga ban nisoh lit ma ya iga mo.
Pawlu nawaŋ Pedru Antiyokiya
11 Na Pedru ârillom Antiyokiya, nijooŋoor d'oo ma iwaŋool mata wahaw wajakutaaw wa agam. 12 Mata bala kûynaaku kaaku ka Tiyaagu abollom kûriiŋul, Pedru ya ariyeen tanor di bukan kaaku kagawutum jûdew, be na kûrillom, ña ya atey buku kagawutum jûdew ma aatuba kuri tanor, mata ma âkolim jûdewwi kaanem bûynenaabu bagawutim huhaanaahu hata yîinaay, mbi kugawi huhaanaahu hata yîinaay. 13 Bukaaku poop kagam jûdew, di kûhooloor ma kuga non Pedru, poopii Barnabe poop ya âhooloor ma aga non buko. 14 Be na ijuum kaan kulee'ma kugawem non malhegenumaayamu mata elobay yâsuumaay muloom, ña nilob di Pedru kayooŋ di êsukay ma eenool: “Aw jagam jûdew, be mowme ulee'ban nuga non ma jûdewwi kugawem, moo mata wa ma ûkimmi uga di sembe bukanaku kagawutum jûdew, ma kuga non ma jûdewwi kugawem?”
Bukanaku mbi kupak mata kâynenaku
15 Malhegen ûli jûdewwi nugam, mata di buko nubajim; moo, jûdewwi ya kêenul kubajut kûbajumiñ non bukanaku kagawutum jûdew. 16 Be nûmiraale kaan, ajamaat aaliit aga an acol kayooŋ di Emitay mata ma agam non ma kûboñaku kata Emitay kuloom, be naali acol kayooŋ di Emitay keb mata ma âynemmi Jesus Kristu. Momakiimom poop ma ûli ûynenummi Jesus Kristu ma mbi ugawi bukanaku kacolum di Emitay mata ma ûynenoom. Mata an aaliit agawi ma acol kayooŋ di Emitay mata kûboñaku kata Emitay.
17 Mata palimo ulaal jammi ma ugawaleyim di buko ma ucolaal di Emitay mata kasohooraku katoolaal di Jesus Kristu, be ulaamaal para di kûbajumiñaku non bukanaku kagawutum jûdew; moo mbi oonaal pîya Kristu omu ma agoroorem be bata kûbajumiñaku? See, ntuwa moo! 18 Be înje ilaañ jaa joon icookoorlanken kûboñaku kata Emitay ka ikajenemmi ban, nûmir kaan nigawooruwe anaw ata kûbajumiñaku. 19 Mata di kûboña'uku kapiyaaku, înje nikete ban, mata koo kubujommi. Moo, înje ma iriiŋoorim tanor di Kristu, ma eeli iroŋ be bata Emitay. 20 Moo, eroŋay ya eekum jaat, ntuwa înje ikiiyom, be Kristu ammi d'înje akiiyom. Mata eroŋay ya iroŋem di yo jaat, îroŋum yo mata kâynenaku ka eekum di Añool Emitay, aamom aboolaatommi ma aket mata înje. 21 Moo, înje etukalat kañankiitaku ka Emitay eñankiitoom; mata ga jaa non jagawaju jata non ma kûboñaku kata Emitay kuloom jigawem an acol kayooŋ di Emitay, ña kama Kristu oo akeem ebeebel.