Mãtiyew 5

Bàá mãã bà yunɲã̀ dwal

Yesuẁ gáa da cocindɩ duu wù nã nnĩĩ nã, wú yugo tãnũũdagǝ drɔ ǹ-kãã jiraa.

Wù duunãtaabá kuganãã wù nãã.

2 Wú du nã ǹ-ba wù kal-ba wà:

3 «Bàá mãã bàa fǝ̃ǝ̃ wà gɩ-ń ba gɩ̀ sǝ Dũnnũ sǝ, bà-lǝ bá síì hi cɔ̃m nã, bà yunɲã̀ dwállá; nã̀ã wa Dũnnũ yuuntasǝrɩ nǝ̃ bàá saa-i.

4 Bàá mãã kaaluugɩ nã, bà yunɲã̀ dwállá; Dũnnũẁ ji hinĩɛ̃ bà ɲiɲirãmmã.

5 Bàá mãã bà sǝ̃n buɔ bà hla nã nǝ̃ cwaa'n dɩgaliɛw, bà yunɲã̀ dwállá; bà-lǝ bàá ji tuu cuuw nǝ̃ sùɔ́gu.

6 Bàá mãã bàa vaa bà hla ǹ-ba bà caa sũɔ̃lɩmmã, bà yunɲã̀ dwállá; bà ga da-mã.

7 Bàá mãã bà sɔ̃ hujãndi, bà yunɲã̀ dwállá; Dũnnũẁ ga sɔ̃ bà hujãndi.

8 Bàá mãã nǝ̃ kusuugɩ dɩngu, bà yunɲã̀ dwállá; bà ga da Dũnnũw.

9 Bàá mãã bà blǝ bà ɲĩɛ̃ jirammã, nã̀ã ba bà ce bà jirataabá ba bà gbǝ nǝ̃ bà ɲĩɛ̃, bà yunɲã̀ dwállá; Dũnnũẁ ga ba wù be bà-lǝ wù tãnkuuraaba.

10 Bà mãã bà ywar bàá mãã bà sũɔ̃lɩm'n cɔ̃mmã nã Dũnnũ hlũũgɩ nã, bà yunɲã̀ dwállá; Dũnnũ yuuntasǝrɩ nǝ̃ bàá saa-i.

11 Ɲi-ń ji da cwaaba tuuraa ɲì nã, bà cuɔl-ɲã́ã̀, nãã ba bà bǝr kwasiɛ'n plaaga min bà dii ɲì nã mã́ã cɔ̃mmã nã, ɲi yunɲã̀ dwállá.

12 Bláà dudwalɩmmã nã, nǝ̃ ɲí ba ɲì ce kweyi-kweyiw; Dũnnũẁ ga pã-ɲã́ã̀ dugɔ wù suɔgu.

Nã̀ã wà Dũnnũ tanhiilaabaa mãã bà sórrá ɲimãã yigagɩ nã, bà cúɔlá-ba nnĩĩ-i.»

Ɲi nǝ̃ nã́ã́ dɔ̃m-i, nã̀ã ver ǹ-ba nã́ã́ fitɩnɩba-i

(Markaw 9.50 ; Markaw 4.21 ; Lukaw 14.34-35)

13 «Ɲimãã-i cuu wáà dɔ̃mmã^a.

Dɔ̃mmã-ń suruɔ, halǝmblǝ ji gbǝ̃ǝ̃ ǹ-ver ce mã́ dwal?

Mã̀ síì gbǝ̃ǝ̃ ǹ-ver ǹ-fa cɔ̃m; bà tuu ǹ-ga nǝ̃nǝ̃ǝ̃ cɩnkaaraa yiɛ-i, cwaaba ba bà ta bà sa-mã nǝ̃ bà vyanɲã.

14 Ɲimãã-i cuu wáà gbɩgbaamã.

Lǝri mãã dɩ-ń ba tãnũũgu drɔ, dɩ̀ síì gbǝ̃ǝ̃ ǹ-ŋmǝ̃ǝ̃rǝ̃ǝ̃ curo nã.

15 Nǝ̃ bà sǝ̃n tii fitɩnw nã̀ã tuu cirakiigu ǹ-curǝǝ ǹ-suu wù nã.

Nǝ̃ ba-ń tii-yǝ, bà piɛ-yǝ kuudagǝ drɔ-i, cwaaba min mãã duugɩ nã, bá ba gbɩgbaamã nã.

16 Fitɩnw mãã wù hiil gbɩgbaamã dudũũmã nã gùú tammã, ɲimãã yo ɲi saa ɲí ba ɲì hiil gbɩgbaamã cwaaba sǝ̃ǝ̃nã nnĩĩ-i, bá ba bà da ɲì mããcefɩnfammã nã̀ã ba bà bũũ ɲì Tǝ Drɔ-Dũnnũw.»

Yesu diiwaarǝdi ǹ-kã Musa hlũũgu nǝ̃ tanhiilaa'n yiɛgu

17 Gɩ̀ furũũgɩ nã, Yesuẃ waa wà: «Bláá ba ɲì ne wà Musa hlũũ'n sɛbɛba wáalá dìí nǝ̃ Dũnnũ tanhiilaabà kállá-ɲã́ã̀ nǝ̃ dìí mãã, wà mǝ̃ júó mǝ̃ ji suro dɩ̀-i, dìí sǝ.

Mǝ̃̀ júó mǝ̃ ji ce cãwan díɛ́dɩ́ suu-i.

18 Yáalà mǝ̃́ waa sulammã nǝ̃-ɲã́ã̀: drɔkuɔli nǝ̃ ɲũũrũũguu ji ta ǹ-ga guu nã, nǝ̃ Musa hlũũ'n sɛbɛba cãwaablɩri mãã dìi kol, dɩ̀ dɩndɩ̀ síì guu nã.

Halle cãwaablɩrɩ dɩn yo dɩ̀ sɔsaalaagǝgɩ̀ síì guu nã, fuwɔ cɔ̃mmã min mã ji ta ǹ-ga suu.

19 Gɩ̀ sùɔ́gɩ nã, Musa hlũũgɩ̀ kárrá dìí nã, yíi nǝ̃n hla dɩ̀ hlũũ'n nǝ̃ǝ̃lsaalaarǝdɩ̀ dɩndi, nã̀ã ver ǹ ba ǹ haar badaaba wà ba báa wáà-dǝ, Dũnnũẁ ga be yíi-i wuusaalaaw wù yuuntasǝrɩ nã.

Nǝ̃ yíi nǝ̃n ba ǹ wáà dɩ̀ hlũũgu, nã̀ã ba ǹ kal badaabá ba bà ce yíǹ tammã, Dũnnũẁ ga be yíi-i cogǝ̃ngãw wù yuuntasǝrɩ nã.

20 Nã̀ã wa, mǝ̃̀ waa-dǝ nǝ̃-ɲã́ã̀: ɲi-ń ba ɲì sáa sũɔ̃l Dũnnũ hlũũgɩ nã ǹ-ɲǝ̃ǝ̃ Musa hlũũ'n yuntaaba nǝ̃ Farisĩɛ̃ba, ɲi sɩga jãn Dũnnũ yuuntasǝrɩ nã.»

Yesu diiwaarǝdi ǹ-kã hyadũũ'n yiɛgu

(Markaw 11.25 ; Lukaw 12.57-59)

21 «Ɲi nṹɔ̃́-dǝ wà Dũnnũw wáalá nǝ̃ yì tǝvũnvãnããba wà curo'n sǝ̃n saa wú ko wù nãcurow.

Wà gùú tii nǝ̃n fǝ̃ǝ̃ nã̀ã ko wù nãcurow, wà sugollɩ ji duruu wù nã.

22 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: Yíi mãã nǝ̃-n dũ ǹ hiɛga nǝ̃ ǹ nãcurow, yíi yo, sugollɩ ga duruu ǹ drɔ.

Wùú mãã wu-ń tuuraa wù nãcurow wà mǝ̃ǝ̃lǝ̃ǝ̃ yo-i nǝ̃-yǝ, bà saa bá be-yǝ Yahudyaba vũnvãnãã'n sugojarriɛ'n kuruɔgu nãã, bá jar wù sugolli.

Wùú mãã wu-ń tuu wù nãcurow wà wuuhãr, gɩ̀ saa bá nǝ̃ǝ̃ ǹ-dii-yǝ jahãlmã dǝ̃ǝ̃mã nã.

23 Gùú cíé nǝ̃-n kã nǝ̃ kuu siijãnkuugɩ nã wà n kãã bũũ Dũnnũw nǝ̃-gǝ, nǝ̃-ń ga kãnãã gùú sùɔ́guu dàa wà ń cíé ǹ jãn wudiɛ nã,

24 ya gɩ̀ kuugɩ́ ba dàa siijãnkuugu tuɔra nǝ̃ ń kã ɲi ga waa ǹ-gbǝ nǝ̃ gɩ̀ tiiw haasǝ nǝ̃ ɲi ga fǝ̃ǝ̃ ǹ-jo ǹ-ji bũũ Dũnnũw nǝ̃-gǝ.

25 Ǹ kuuriiw-ń ba wù caa wú be-n sugojarsuɔgɩ nã, ǹ-ya ɲí ba hlũũgɩ nã, gbǝ̃ǝ̃ nǝ̃-yǝ, ń ya ɲí gbǝ dɩ̀ nã nǝ̃-yǝ; báa ya wú dii-dǝ sugojarriɛ'n nãkruɔgɩ nã.

Nǝ̃-ń ya dɩ́ hi-ba, bà ga hã fãngãtaaba nǝ̃-dǝ, bà-lǝ bá blǝ ǹ-ga suu ǹ nã.

26 Yáalà mǝ̃́ waa sulammã nǝ̃-ɲã́ã̀: ba-ń hi ǹ-dii-n kasoduugɩ nã, nǝ̃-ń ba ǹ sáa ji pã ǹ cãmlãrɩ min dɩ́ tã halle tãmã yiɛgɩ dɩn yo gɩ́ báa ba, ǹ sɩga da wanhlǝm gɩ̀ sùɔ́gɩ nã.»

Yesu diiwaarǝdi ǹ-kã capuɔruu'n yiɛgu

(Mãtiyew 18.8-9 ; Markaw 9.43, 47-48)

27 «Ɲi nṹɔ̃́ Dũnnũ cãwandɩ nã wà curo'n sǝ̃n saa wú mǝ̃rǝ̃ǝ̃ nǝ̃ gùú tii mãã bà sǝ bàa taa bà ɲĩɛ̃.

28 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: Yíi mãã nǝ̃-ń ne curo'n ciɛw nǝ̃ yísɩ̀darǝ, gɩ ba nã́ã́ n mã́rrã́ nǝ̃-yǝ ǹ-tã-i ǹ hiɛga nã.

29 Gɩ̀ sùɔ́gɩ nã, nǝ̃-ń fǝ̃ǝ̃ wà ǹ nãdĩĩyisɩrɩ ji ce ń duruu Dũnnũ hlũũgɩ nã, gbɩgar ń hiil-dǝ n ga nǝ̃nǝ̃ǝ̃ dɩ̀ nã yergaa.

Nã̀ã wà ǹ cãn'n sùɔ́gɩ dɩngɩ-ń guu nã, gùú búɔlá nã ǹ cãndɩ min dɩ́ ba dɩ̀ ga jãn jahãlmãw nã.

30 Nǝ̃-ń fǝ̃ǝ̃ wà ǹ nãdĩĩgɩ ji ce ń duruu Dũnnũ hlũũgɩ nã, bǝr-gǝ n ga nǝ̃nǝ̃ǝ̃ gɩ̀ nã yergaa.

Nã̀ã wà ǹ cãn'n sùɔ́gɩ dɩngɩ-ń guu nã, gùú búɔlá nã bá ba bà ga nǝ̃ǝ̃ ǹ-dii ǹ cãndɩ min jahãlmãw nã.»

Yesu diiwaarǝdi ǹ-kã cotaaba'n burɔm'n yiɛgu

(Mãtiyew 19.7-9 ; Markaw 10.11-12 ; Lukaw 16.18)

31 «Dɩ̀ wáalá hlo wà: “Wùú mãã wu-ń ɲǝ̃ǝ̃ ǹ-tĩɛ̃ wù ciɛw wà wu saa wú yal bà burɔm'n sɛbɛw ǹ-hã-yǝ.”

32 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: Gùú tii'n ciɛw-ń ba wù sáa ce durkũmsǝri nǝ̃ wú ɲǝ̃ǝ̃ ǹ-tĩɛ̃-yǝ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo, wùú mãã bà sáa taa.

Nǝ̃ gùú tii nǝ̃n taa cijalw mãã bà ɲǝ̃́ǝ̃lã́ ǹ-tĩɛ̃-yǝ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.»

Yesu diiwaarǝdi ǹ-kã Dũnnũ yir'n bel cɔ̃mmã nã

33 «Ǹ-pya dɩ̀-lǝ dɩ̀ nã, ɲi nṹɔ̃́-dǝ wà Dũnnũw wáalá nǝ̃ yì tǝvũnvãnããba wà curo nǝ̃n waasǝ wà n ji ce dìí mãã ǹ-hã Dũnnũw, wà n báa hla dɩ̀ celli, wà nǝ̃ yíi nǝ̃n pã ǹ nũɔ̃gu nã̀ã waasǝ Dũnnũ yiir wà n ji ce dìí mãã, wà n ce-dǝ; wà n ya dɩ́ suu Dũnnũ yinɲã nã.

34 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: curo'n báa waasǝ gbal gbal.

Curo'n báa waasǝ drɔkuɔl'n yiirɩ nã nã̀ã wà Dũnnũ yuuntasǝ'n guujirakuu-i.

35 Curo'n báa waasǝ ɲũũrũũ yiirɩ nã; Dũnnũ vyan'n wankram'n sùɔ́-i.

Curo'n báa waasǝ Serusalɛm yiirɩ nã; yuuntigǝ̃ngã'n lǝ-i.

36 Curoẁ mãã wù síì gbǝ̃ǝ̃ ǹ-ce halle wù yukwaasǝblɩr dɩndɩ́ pesǝ wù yuugɩ nã, wù síì gbǝ̃ǝ̃ ǹ-ce dɩ́ blĩĩ yo; gɩ̀ sùɔ́gɩ nã, curo'n báa waasǝ wù yuugu.

37 Ɲi-ń da bàa yugu-ɲã́ã̀ nǝ̃ dìí mãã, gɩ-ń ba dɩ̀-i ɲí wa ũwũũ, dɩ̀-i.

Gɩ-ń ba gɩ̀ sǝ dɩ̀-i sǝ, ɲí wa ã-ãã, dìí sǝ.

Gɩ-ń vã ǹ-hlǝ dɩ̀-lǝ dɩ̀ nã, ɲi-ń piɛ kuu wo kuu, Diibɩblarǝntii cíé ɲí piɛ-gǝ.»

Yesu diiwaarǝdi ǹ-kã mããjaam'n hiilɩm'n cɔ̃mmã nã

(Lukaw 6.29-30)

38 «Ɲí nṹɔ̃́ Dũnnũ cãwandɩ nã wà gùú tii mãã wu-ń mũũ wù nãcuro'n yisɩri wà ba mũũ gɩ̀ tii'n dǝlli-i; gùú tii nǝ̃n ka wù nãcuro'n ɲirǝ̃ǝ̃gu, bá ka wù kuugɩ-i.

39 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: curo'n báa wa wú paa ǹ-cii cobalw.

Nǝ̃ wùú mãã wu-ń ca ǹ nãdĩĩtũɔ̃gu, ver gɩdaa gúɔ̀ ń hã-yǝ.

40 Wùú nǝ̃n ba wù caa wú kã nǝ̃-n sugojarriɛba nã ǹ-da ǹ-ga hũɔ̃ ǹ kuulaadiiyǝw, hã-yǝ nǝ̃-yǝ, nǝ̃ ń hã-yǝ ǹ kuulaadiiyǝpɩpuɔlayǝw yo ń pya nã.

41 Curow-ń guur-n wà ń wáà cilow dɩnw waali, kã ɲí wáà culoba hǝ̃ǝ̃l waali.

42 Wùú nǝ̃n cirǝ̃ǝ̃ kuu nã ǹ saa, hã-yǝ, wùú nǝ̃n wa ń dǝ̃ǝ̃nã wù nã, báa vũɔ̃-yǝ.»

Yesu diiwaarǝdi ǹ-kã yì ɲããtaa'n yiɛgu

(Lukaw 6.27-28, 32-36)

43 «Ɲi nṹɔ̃́ Dũnnũ cãwandɩ nã wà ǹ nãcuro'n cɔ̃mmã̀ saa mã́ dwal ǹ nã, nǝ̃ ǹ ɲããtii'n cɔ̃mmã́ bla ǹ nã.

44 Nǝ̃ mǝ̃n-lǝ mǝ̃̀ waa-dǝ nǝ̃-ɲã́ã̀: yáalà ɲì ɲããtaa'n cɔ̃mmã́ dwal ɲì nã, bláà ɲì cirǝ̃ǝ̃ Dũnnũw nã ɲì hã bàá mãã bà cuɔl-ɲã́ã̀,

45 ǹ-ji da ǹ-ba ɲì Tǝ Drɔ-Dũnnũ tãnkuuraaba.

Nã̀ã da wù-lǝ wùú híilà bǝ̃ǝ̃gu wù hã cobɩbliɛba nǝ̃ cofɩnfaaba min, nã̀ã ba wù nɔ̃ duɔgu wù hã cosũɔ̃lbaba nǝ̃ bàá mãã bà sáa sũɔ̃l.

46 Nã̀ã wa ɲimãã mãã ɲì cɔ̃mmã̀ dwal bàá nã, bàá dɩndɩn nǝ̃n ba bà cɔ̃mmã̀ dwal ɲimãã yo ɲì nã, ɲì kãn wà Dũnnũw ga pã-ɲã́ã̀ nǝ̃ bii hlo?

Nãnhũɔ̃rããba nǝ̃ bà hla, bàá yo bà ce nnĩĩ!

47 Nǝ̃ ɲimãã, ɲi-ń ba ɲì tũɔ̃l ɲì fyãn ɲì yiɛntaaba dɩndɩn, halǝmblǝ-i wù síì gbǝ̃ǝ̃ ǹ-ce dɩ̀-lǝ?

Bàá mãã bà sǝ̃n fǝ̃ǝ̃ Dũnnũw, bàá yo bà sǝ̃n ce nĩĩgu sǝ-ì?

48 Nǝ̃ ɲimãã-lǝ, bláà cwaabaa mãã bàa jalliɛ nã́ã́ ɲì Tǝ Drɔ-Dũnnũw mãã yà jalliɛ gùú tammã mãã.»