Mãtiyew 18

Wùú mãã wù buɔ nã Dũnnũ yuuntasǝrɩ nã

(Markaw 9.33-37, 42-48 ; Lukaw 9.46-48 ; 17.1-2)

Gɩ̀ bǝ̃ǝ̃gu, Yesu duunãtaabá kuganãã wù nã ǹ-yugu-yǝ wà: «Dũnnũ yuuntasǝrɩ nã, halii ga ba wù buɔ nã?»

2 Yesuẃ be tãnkuurdiɛ ǹ-juo hiraa nǝ̃-yǝ bà sǝ̃ǝ̃gɩ nã

3 nã̀ã waa wà: «Yáalà mǝ̃́ waa sulammã nǝ̃-ɲã́ã̀: nǝ̃-ń da ɲì sáa ver ǹ-ba tãnkuurbii báà tammã, ɲì síì gbǝ̃ǝ̃ ǹ-jãn Dũnnũ yuuntasǝrɩ nã.

4 Wùú nǝ̃n hɩr wù hla nã ǹ-ce wù hla fiyãã tãnkuur wáà tammã, wùú búɔlá nã Dũnnũ yuuntasǝrɩ nã.

5 Yíi nǝ̃n fǝ̃ǝ̃ ǹ-blǝ tãnkuur wáà mã́ã cɔ̃mmã nã, ǹ fǝ̃́ǝ̃lã́ ǹ-blǝ mã́ã-i.

6 Tãnkuurbiibaa mãã bà hṹɔ̃lã́ mǝ̃̀ cɔ̃mmã nnĩĩ, gùú tii nǝ̃n ce wù dɩnẃ duruu Dũnnũ hlũũgɩ nã, ywaruugɩ̀ ji hi gɩ̀ tiiw!

Ba-ń nũũ nãmlãri gɩ̀ tii'n bũɔ̃gɩ nã nã̀ã nǝ̃ǝ̃ ǹ-dii-yǝ lwaakɩnkandɩ nã, gùú ji buɔ wù nã ǹ-ɲǝ̃ǝ̃ ywaruu gúɔ̀.

7 «Cuu cwaa ɲimãã, hujãncɔ̃mmã̀ ji hi-ɲã́ã̀, nã̀ã wa cɔ̃ncindɩ nìɛ dìí mãã dɩ̀ ce cwaabá ba bà ver furũũ.

Dɩ̀ káaláa gɩ̀ cɔ̃mmã ji ba mã̀ ce, nǝ̃ gùú tii nǝ̃n ce wù nãcuroẃ ver furũũ, hujãncɔ̃mmã̀ ji hi gɩ̀ tiiẁ!

8 Ǹ nãkruɔgu yindagǝ nã ǹ viɛgɩ-ń ba ji ce ń duruu Dũnnũ hlũũgɩ nã, bǝr-gǝ ń nǝ̃nǝ̃ǝ̃!

Nǝ̃-ń ba nǝ̃ nãkruɔgɩ dɩngu yindagǝ nã viɛgɩ dɩngu, nã̀ã jãn fɩraa nũmǝ̃nãsǝrɩ nã gùu búɔlá nã, bá nǝ̃ǝ̃ ǹ-dii-n dǝ̃ǝ̃mã nã mãã fɩraa nǝ̃ ǹ nãkrɔnɲã hǝ̃ǝ̃lɲã, yindagǝ nã nǝ̃ ǹ vyanɲã hǝ̃ǝ̃lɲã.

9 Nǝ̃-ń da wà ǹ yisɩrɩ dɩndɩ̀ ji ce ń duruu Dũnnũ hlũũgɩ nã, gbɩgar ń hiil-dǝ ń nǝ̃nǝ̃ǝ̃!

Nǝ̃-ń jãn fɩraa nũmǝ̃nãsǝrɩ nã nǝ̃ yisɩrɩ dɩndi, gùú búɔlá nã bá nǝ̃ǝ̃ ǹ-dii-n jahãlmã dǝ̃ǝ̃mã nã nǝ̃ ǹ yinɲã hǝ̃ǝ̃lɲã.»

Tũnvaalaayǝ'n dal'n cɔ̃mmã

(Lukaw 15.3-7)

10 Gɩ̀ furũũgɩ nã, Yesuẃ waa wà: «Blǝ́rà ɲì hla nã, tãnkuuraa báà min nã, curo'n báa diɛ wù dɩn yo.

Mǝ̃̀ tu nǝ̃-ɲã́ã̀: mɛlɛgɛba mãã bà ne bà nã, bá nàa hirammã nã fɩraa mǝ̃̀ Tǝ Drɔ-Dũnnũw tuɔra.

11 [Gùú cwaabaa nǝ̃n váaláa, Curonbiɛ mã́ã̀, mǝ̃̀ júó mǝ̃̀ ji caa ba-i, ǹ-kor-ba.]»

12 Nã̀ã waa wà: «Ɲimãã saa tũmãm gundii-ń ba curow saa, nǝ̃ wù dɩnẁ vaalaa bà sǝ̃ǝ̃nã, gɩ̀ tiiẁ síì ya jiɛtuu nǝ̃ nũɔ̃sɔ̃ nǝ̃ densǝ mãã wù yánã́ã, wú ba wù wuuraa dàa tãnũũgɩ nã, nã̀ã ta ǹ-kãã caa wùú mãã wù vaalaa-ì?

13 Yáalà mǝ̃́ waa sulammã nǝ̃-ɲã́ã̀: wu-ń ga da-yǝ, dudwalɩmmã̀ juo yu wù hiɛga ǹ-maa jiɛtuu nǝ̃ nũɔ̃sɔ̃ nǝ̃ densǝw mãã wù yánã́ã wù sáa vaalaa wù cɔ̃mmã.

14 Gùú tammã dɩnmã nã-i, ɲì Tǝ Drɔ-Dũnnũ kusuu sǝ wù dɩnẃ vaalaa tãnkuuraa báába nã.»

Cɔ̃mmã mãã mã̀ saa mã́ ba mã̀ tũɔ̃l nĩĩguu mãã

15 Yesuw nã̀ã ver ǹ-ba wù waa wà: «Ǹ cwanĩĩw-ń ce ǹ-jãn ǹ nã, kã wù nãã n ga be-yǝ, ɲimãã cwaɲã hǝ̃ǝ̃lɲã, nǝ̃ ń pɩgaa-yǝ nǝ̃ wù yuɔrɔmmã.

Wu-ń hũɔ̃-dǝ wà wu yúɔrúɔ, ń díilá ǹ cwanĩĩw hlũfɩnfaa nã-i.

16 Wu-ń ba wù sáa hũɔ̃-dǝ, caa curodiɛ yindagǝ nã cwaaba hǝ̃ǝ̃l, ɲí kã wù nãã nã́ã́ Dũnnũ cãwandɩ̀ wáalá-dǝ nĩĩgu mãã.

Dɩ̀ wáalá wà: Cɔ̃m wo cɔ̃m, mã̀ saa mã́ tũɔ̃l cwaaba hǝ̃ǝ̃l, yindagǝ nã cwaaba siɛl yinɲã nã-i^a.

17 Wu-ń ba wù sáa ga hũɔ̃ bà-lǝ bà dǝlli, kã n ga ja Igɩlisɩ taaba nǝ̃-dǝ.

Wu-ń ba wù sáa nɔ̃ Igɩlisɩ taa'n dǝlli, blǝ wú ba curow mãã wù sǝ̃n fǝ̃ǝ̃ Dũnnũw, yindagǝ nã ń blǝ wú ba nã́ã́ nãnhũɔ̃r-i.

18 Yáalà mǝ̃́ waa sulammã nǝ̃-ɲã́ã̀: ɲi-ń hla dìí mãã ɲũũrũũgu níɛ́ nã, bà ga hla-dǝ drɔgu; ɲi-ń hũɔ̃ dìí mãã ɲũũrũũgu níɛ́ nã, bà ga hũɔ̃-dǝ drɔgu.

19 «Nǝ̃ mǝ̃̀ tu nǝ̃-ɲã́ã̀: ɲì sǝ̃ǝ̃nã, cwaaba hǝ̃ǝ̃lba-ń gbǝ dɩ̀ dɩndɩ nã, ɲũũrũũguu níɛ́ nã nã̀ã cirǝ̃ǝ̃ mǝ̃̀ Tǝ Drɔ-Dũnnũw nã, gùú cɔ̃mmã nã, wù ji ce-mã ǹ-hã-ba.

20 Nã̀ã wa, cwaaba hǝ̃ǝ̃l yindagǝ nã cwaaba siɛl ba-ń tɩgii bà ɲĩɛ̃ gùú sùɔ́guu mãã, mǝ̃̀ yiirɩ nã, mǝ̃́ nàa bà sǝ̃ǝ̃nã.»

Dũnnũẁ caa yí ba yì ce yì ɲĩɛ̃ dũndɔw

21 Yesuẁ wáalá dɩ̀-lǝ, Piɛrẃ kuganãã wù nã ǹ-yugu-yǝ wà: «Yitii, curow-ń ba wù ce wù jãn mǝ̃̀ nã, nǝ̃ mǝ̃́ ba mǝ̃̀ ce wù dũndɔw, gɩ-ń ji suu yin nĩɛ̃-i, mǝ̃́ ba mǝ̃̀ saa mǝ̃́ hla?

Fuwɔ yin nɩrhǝ̃ǝ̃l-ì wa?»

22 Yesuẃ waa nǝ̃ Piɛrw wà: «Mǝ̃n sǝ̃n waa nǝ̃-n wà yin nɩrhǝ̃ǝ̃l dɩn-i!

Nǝ̃ mǝ̃̀ wa yin gwasiɛl nǝ̃ nũɔ̃sɔ̃, ǹ-ji da yin nɩrhǝ̃ǝ̃l.

23 «Gɩ̀-i, Dũnnũ yuuntasǝrɩ́ ba nã́ã́ yuuntii mãã wù caa wú hũɔ̃ wù cãmĩɛ̃ga wù mããcieraabaa saa.

24 Wù ce bá ba bà be-ba bà hã-yǝ wú ba wù yugu-ba.

Gɩ̀ jáa hi wudiɛw, wù cãmlãrɩ̀ yáá dìi bũũ wù nã ǹ-car^b,

25 wù sáa ji ba wù ji gbǝ̃ǝ̃ pã-dǝ.

Gùú cíé yuuntiiẃ fǝ̃ǝ̃ ǹ-waa wà: “Súurà-yǝ nǝ̃ wù ciɛw nǝ̃ wù tãnkuuraaba ǹ-pya wù nãkruɔɲinɲã min nã, ɲí suu cãmlã díɛ̀.”

26 Biɛẃ kãã duruu ǹ-kuulǝǝ yuuntii'n yigagɩ nã nã̀ã waa wà: “Yuuntii, fɛ̃ ǹ hiɛga nǝ̃-m!

Mǝ̃̀ ji pã dɩ̀ min ǹ-hã-n.”

27 Wù gáa wanãã nnĩĩ nã, wù hujãndɩ́ blǝ yuuntiiw, wú waa wà wù cãmlãrɩ tĩ́ɛ̃́, wà wú suro ǹ-maar.

28 Mããcier wáà gáa yii ǹ-diɛ ǹ-hlǝ, wú kãã jal nǝ̃ wù nãmããcierdiɛ, wù cãmlãrɩ̀ yáá wù nã, dɩ̀ sáa dugɔ^c.

Wú paa ǹ-blǝ ǹ-sɩsĩɛ̃lĩɛ̃ wù nǝhlɩgǝw nã nã̀ã waa nǝ̃-yǝ wà: “Jo nǝ̃ mǝ̃̀ jinɲã!”

29 Wù nãyoẃ duruu ǹ-kuulǝǝ wù yigagɩ nã, nã̀ã waa nǝ̃-yǝ wà: “Fɛ̃ ǹ hiɛga nǝ̃-m!

Mǝ̃̀ ji pã-ɲã ǹ-hã-n.”

30 Biɛẃ hla nã̀ã ce bá blǝ ǹ-kãã suu wù nã kasoduugɩ nã, wà wu-ń ba wù sáa pã cãmlã díɛ̀, wù síì da ǹ-hlǝ.

31 Wù nãbɩgaabà gáa da dìí nǝ̃n cíé nnĩĩ nã, bá ta ǹ-kã bà yuuntii'n kuugɩ nã bà yigasǝri mǝ̃gaa ǹ-ɲǝ̃ǝ̃ ǹ-kãã taa dɩ̀ min ǹ-ja-yǝ.

32 Yuuntiiẃ fǝ̃ǝ̃ ǹ-ce bá be wú jo.

Wù gáa jo, yuuntiiẃ waa nǝ̃-yǝ wà: “Mããcierbɩblayǝdiɛ dɛ!

Yíǹ sáa jiɛriɛ nǝ̃-m sǝ-i nǝ̃ mǝ̃n ya ǹ cãmlãrɩ́ tã-ì?

33 Yíi yo ǹ yáá ǹ saa ń sɔ̃ ǹ nãyo wáà hujãndi nã́ã́ mǝ̃n sṹɔ̃́ yíǹ hujãndi nĩĩguu mãã!”

34 Dɩ̀ cíé nnĩĩ nã, wù hiɛgá juo mǝ̃gaa ǹ-dũ, wú ce bá blǝ ǹ-kãã dii-yǝ kasoduugɩ nã, ǹ-piɛ nũɔ̃sǝn ywaruugu wù drɔ, fuwɔ wu ji pã wù cãmlãrɩ́ tã.

35 Gùú tii nǝ̃n ba wù sǝ̃n hũɔ̃ wù ce wù cwanĩĩ dũndɔw, nǝ̃ wù hiɛga min, mǝ̃̀ Tǝ Drɔ-Dũnnũ yo wù ji ba wù ce-yǝ nnĩĩ-i.»