Markaw 9

Yesuw nã̀ã fǝ̃ǝ̃ ǹ-waa nǝ̃-ba hlo wà: «Yáalà mǝ̃́ waa sulammã nǝ̃-ɲã́ã̀, ɲimãã mãã dìɛ kuɔkuɔgu, badaabà síì hi ǹ-kurǝǝ nã̀ã da Dũnnũ yuuntasǝrìi jo nǝ̃ fãngããdagǝ.»

Yesu yiga'n cinɩmmã

(Mãtiyew 17.1-13 ; Lukaw 9.28-36)

2 Bãn nãndien gɩ̀ furũũgɩ nã, Yesuẃ fǝ̃ǝ̃ ǹ-tuu Piɛrw, Yakubaw bá nǝ̃ Yuhanãw, bá ta ǹ-kãã yugo tãnũdɩdaalaadagǝ nã, ǹ-ba dàa bà dǝ.

Yesuw cínnã́ gùú sùɔ́gɩ-i bà yinɲã nã,

3 wù kuulanãmbá juo pesǝ fuwɔ ǹ-ba bà caalaa bà blǝ yinɲã.

Cuuw nã, curo'n sɩriɛ wùú mãã wù ji gbǝ̃ǝ̃ ǹ-ce bá pesǝ nnĩĩ tammã.

4 Dũnnũ tanhiil Musaw bá nǝ̃ Eliw, bá juo hillaa duunãtaaba siɛl báá nã.

Bá da-ba bà waa cɔ̃mmã bà min nǝ̃ Yesuw.

5 Gɩ̀-i, Piɛrẃ fǝ̃ǝ̃ ǹ-waa nǝ̃ Yesuw wà: «Kaltii, yi saa yí ba dìɛ níɛ̀-i.

Yi ji sa kuɔyaga siɛlga, dɩ̀ dɩndɩ́ ba yíi dǝlli, dɩdaarɩ́ ba Musa dǝlli, nǝ̃ dɩ̀ diindaarɩ́ ba Eli dǝlli.»

6 Wù sáa fǝ̃ǝ̃ wù diiwaarǝdi, nã̀ã wa gbǝrsǝrɩ́ yáá dìi blǝ-ba bá wù nãbɩgaaba.

7 Yiiluudaagɩ́ juo suu bà nã, nǝ̃ gɩ̀ husumũũgu, nǝ̃ cãwandaarɩ́ hlǝ yiiluu gúɔ́ nã ǹ-waa wà: «Mǝ̃̀ bíɛ́ cituublɩ wɩ̀-i nnĩĩ.

Bláà ɲì nɔ̃ ɲì hã-yǝ!»

8 Gùú bǝ̃ǝ̃gɩ̀ dɩngu dàa, bá ba bà ne bà caliɛ bà hla nã, bà sáa da curo dàa nǝ̃-ba nã́ã́ Yesu sǝ nǝ̃ wù dɩn.

9 Bà gáa ba bà hɩr tãnũũgu gùú nã mãã, Yesuẃ fǝ̃ǝ̃ ǹ-waa nǝ̃-ba wà ba báa taa Dũnnũw jíɛ́-ba nǝ̃ dìí mãã ǹ-ja curo, fuwɔ Curonbiɛw ga nĩĩ ǹ-hlǝ cugutaaba sǝ̃ǝ̃nã.

10 Bá blǝ gɩ̀ cãwandi nã̀ã ba bà yugu bà ɲĩɛ̃ wà: «Ǹ-nĩĩ ǹ-hlǝ cugutaaba sǝ̃ǝ̃nã, dɩ̀-lǝ dɩ̀ yuugɩ-i wa nnĩĩ?»

11 Bá yugu-yǝ wà: «Nǝ̃ danii Musa hlũũ'n yuntaabá wa Dũnnũ tanhiil Eli saa wú jo haasǝ?»

12 Wú fǝ̃ǝ̃ ǹ-siɛ-ba wà: «Sulam-i, Eli saa wú jo haasǝ ǹ-juo ce cɔ̃mmã min mã́ saa ǹ-ba mã̀ tantammã nã hlo.

Nǝ̃ Curonbiɛ-lǝ, hamã nã-i bá yal ǹ-waa wù cɔ̃mmã nã wà wu saa wú ywar piyɛ̃, nǝ̃ cwaabá diɛ-yǝ?

13 Nǝ̃ mǝ̃̀ waa-dǝ nǝ̃-ɲã́ã̀, Eliẁ júó ǹ-tã nǝ̃ cwaabá juo blǝ-yǝ ǹ-vaa nǝ̃ bà kusuugu, nã́ã́ dɩ̀ yállá nĩĩgu wù cɔ̃mmã nã.»

Yesuẁ buɔ tãntɔ̃nããntiidiɛ, pũmpɩrblɩ-i

(Mãtiyew 17.14-21 ; Lukaw 9.37-43)

14 Bà gáa ver ǹ-juo hi duunãtaa'n dɩgaliɛw, bá da cohuɔdaagùu caliɛ bà nã, nǝ̃ bá ba cincaruugɩ nã nǝ̃ Musa hlũũ'n yuntaaba.

15 Cohuɔgɩ̀ jáa yii ǹ-da Yesuw, dɩ́ tugulǝǝ bà nã, bá ba bà sɔ̃ bà kã wù nãã bà ga fyãn-yǝ.

16 Yesuẃ fǝ̃ǝ̃ ǹ-yugu wù duunãtaaba wà: «Ɲi nǝ̃ cincaruugɩ nã nǝ̃-ba hamã nã-ì?»

17 Biɛdiɛ siɛ-yǝ cohuɔgu sǝ̃ǝ̃nã wà: «Kaltii, mǝ̃̀ júó nǝ̃ mǝ̃̀ tãnkuur-i ǹ nãã.

Tãntũɔ̃ẃ nàa wù nã, wú nǝ̃ wùu ce wú ba kũnkunĩĩw.

18 Tãntũɔ̃ wáàw-ń suro wù nã sùɔ́ wo sùɔ́, wu-ń ce wú tuu ǹ-nǝ̃ǝ̃-yǝ ɲũũrũũgu, tɔlpugulunɲã́ ba ɲã̀ hlǝ wù nũɔ̃gɩ nã.

Wu-ń ce wú jal ǹ-blǝ wù ɲirãnɲã, nǝ̃ wù cãndɩ́ juo kuɔl kugɔmmã.

Mǝ̃̀ cirǝ̃ǝ̃ ǹ duunãtaaba nã mǝ̃́ wa bá ɲǝ̃ǝ̃ tãntũɔ̃ wáà, bà sáa ji ba bà ji hi dɩ̀ nã.»

19 Yesuẃ fǝ̃ǝ̃ ǹ-siɛ-ba wà: «Kuɔkuɔtaa ɲimãã, ɲi sǝ̃n gǝǝ ɲì hũɔ̃ mǝ̃̀ cɔ̃mmã.

Ɲi ne wà mǝ̃ ji hǝ̃ǝ̃sǝ ɲì sǝ̃ǝ̃nã ǹ-tuu ɲì yuunã cɔ̃mmã-ì?

Jówà nǝ̃-yǝ ɲí hã-m.»

20 Bá kã nǝ̃-yǝ wù nãã.

Gùú bǝ̃ǝ̃gɩ dɩnguu dàa, tãnkuurẁ gáa yii ǹ-da Yesuw, tãntũɔ̃ẃ ce tãnkuurẃ duruu ǹ-ba wù tãrãã, wù binǝ̃ǝ̃ ɲũũrũũgu, tɔlpugulunɲã́ ba ɲã̀ hlǝ wù nũɔ̃gɩ nã.

21 Yesuẃ fǝ̃ǝ̃ ǹ-yugu tiiyǝw wà: «Cɔ̃m mã́ã̀mã̀ híí-yǝ bii bǝ̃ǝ̃-i dìi?»

Tiiyǝẃ siɛ-yǝ wà: «Wù tãnkuursǝ nã-i dìi.

22 Bǝ̃ǝ̃daagu tãntũɔ̃w-ń ce wú juu ǹ-dii-yǝ dǝ̃ǝ̃mã nã yindagǝ nã hũmmã nã, ǹ-da ko-yǝ.

Nǝ̃ nǝ̃-n ba ǹ ji gbǝ̃ǝ̃ ǹ-ce mãdamã, ne yì hujãndi nǝ̃ ń pɛ yì nã.»

23 Yesuẃ waa nǝ̃-yǝ wà: «Ǹ yugu mã́ã-i wà mǝ̃-ń ba mǝ̃̀ gbǝ̃ǝ̃?

Curo wo curo mãã wu-ń hũɔ̃ mǝ̃̀ cɔ̃mmã, wù ji gbǝ̃ǝ̃ ǹ-ce mã̀ min.»

24 Gùú bǝ̃ǝ̃gɩ dɩngu dàa, tiiyǝẃ dii ǹ-kaasǝ bolbol wà: «Mǝ̃̀ hṹɔ̃lã́, mǝ̃̀ hũɔ̃mã̀ kóllá gùú sùɔ́gu, jo ń pɛ mǝ̃̀ nã!»

25 Yesuẁ gáa da cohuɔgùu sɔ̃ ǹ-juo tɩgii, wú nãlĩɛ̃ tãntũɔ̃w nã wà: «Tãntũɔ̃ yíì, yíi mãã ǹ ce cwaabá ba bà kũnkunããba nǝ̃ tɔ̃njǝraaba, hlǝ tãnkuur wáà, n báa ver ǹ-jo hlo.»

26 Tãntũɔ̃w hlǝ tãnkuurw nã nǝ̃ kaasuugu bolbol, nã̀ã ce tãnkuurẃ ba wù tãrãã piyɛ̃ piyɛ̃.

Tãnkuurẃ ga juo ba nã́ã́ pĩɛ̃n-i, fuwɔ cocindɩ ji ba dɩ̀ waa wà tãnkuurw kúú.

27 Nǝ̃ Yesuẃ fǝ̃ǝ̃ ǹ-juo blǝ wù nãkruɔgu, ǹ-pĩĩ-yǝ, nã̀ã ce wú suro ǹ-hiraa.

28 Yesuẁ gáa kũũ suɔgɩ nã, wù duunãtaabá kã nǝ̃ bà dɩn ǹ-kãã yugu-yǝ wà: «Danii hãmĩĩ sáá nǝ̃ fãngããgu ǹ-ba yì ji gbǝ̃ǝ̃ ǹ-ɲǝ̃ǝ̃ ǹ-hiil tãntũɔ̃ wáà?»

29 Yesuẃ waa nǝ̃-ba wà: «Tãntũɔ̃ wáà tuugu, gɩ-ń ba gɩ̀ sǝ Dũnnũcirǝ̃ǝ̃gǝgɩ sǝ, [nǝ̃ sũũw] curo'n síì gbǝ̃ǝ̃ ǹ-ɲǝ̃ǝ̃-yǝ.»

Yesuẁ ver wù waa wù kuugu nǝ̃ wù nĩĩm'n cɔ̃mmã

(Mãtiyew 17.22-23 ; Lukaw 9.43-45)

30 Bá ta ǹ-hal gɩ̀ sùɔ́gɩ nã, ǹ-ta Galile yiɛgu, Yesuẁ sáá wù caa curoẃ fǝ̃ǝ̃ dɩ̀ nã.

31 Nã̀ã wa wù yáá wù kal wù duunãtaaba wù waa wà: «Bà ji dii Curonbiɛw cwaa'n nãkruɔgɩ nã, bá ko-yǝ, nǝ̃ bãnɲã siɛl wù kúú'n furũũgɩ nã, wú nĩĩ.»

32 Nǝ̃ duunãtaabà sáa fǝ̃ǝ̃ cãwan díɛ̀dɩ tam, bà sáa ba bà ji da hyagbǝ̃ngbãndi ǹ-yugu Yesuw.

Duunãtaaba sǝ̃ǝ̃nã, hawu búɔlà nã?

(Mãtiyew 18.1-5 ; Lukaw 9.46-48)

33 Bà gáa hi Kapɛrnã lǝri, bá kãã jãn duugɩ nã, Yesuẃ yugu-ba wà: «Ɲi yáá ɲì waa hadi ya ɲì wáà hlũũgɩ nã?»

34 Bá ba ciyɛ̃ ciyɛ̃.

Nã̀ã wa hlũũgɩ nã, bà yáá bà yugu bà ɲĩɛ̃ wà bà sǝ̃ǝ̃nã halii búɔlà nã.

35 Gɩ̀-i, Yesuẃ jiraa nã̀ã be Nũɔ̃sɔ̃nǝ̃bahǝ̃ǝ̃lba ǹ-juo waa nǝ̃-ba wà: «Gùú tii nǝ̃n ba wù caa wú ba yigantiiw, wù saa wú ba bà min furũũgɩ nã, wù saa wú ba bà min mããcierw.»

36 Wú tuu tãnkuurdiɛ ǹ-kra wù nã bà sǝ̃ǝ̃gɩ nã.

Wù gáa tuu ǹ-fuɔ wù nã, wú waa nǝ̃-ba wà:

37 «Yíi nǝ̃n fǝ̃ǝ̃ ǹ-blǝ tãnkuur wáà tuugu mã́ã cɔ̃mmã nã, ǹ fǝ̃́ǝ̃lã́ ǹ-blǝ mã́ã-i.

Nǝ̃ yíi nǝ̃n fǝ̃ǝ̃ ǹ-blǝ-m, ǹ sáa blǝ mã́ã sǝ, ǹ fǝ̃́ǝ̃lã́ ǹ-blǝ wùú nǝ̃n tĩ́ɛ̃lã́-m-i.»

Gùú tii nǝ̃n ba wù sǝ ɲì kuurii, wú nǝ̃ ɲimãã-i

(Lukaw 9.49-50)

38 Yuhanãẃ fǝ̃ǝ̃ ǹ-tuu cãwandi ǹ-waa wà: «Kaltii, yi díɛ́ biɛdiɛẁ ɲǝ̃ǝ̃ tãntɔ̃nããba nǝ̃ ǹ yiiri, wù mãã wù sǝ̃n kã yi duu ǹ nã, hãmĩĩ yáá wa yí ɲǝ̃ǝ̃-yǝ.»

39 Yesuẃ siɛ-yǝ wà: «Bláá ɲǝ̃ǝ̃-yǝ, nã̀ã wa curo'n síì gbǝ̃ǝ̃ ǹ-ce cɔ̃nnurommã mã̀ yiir nã, nǝ̃ fiyãã gɩ̀ furũũgɩ nã wú ver ǹ-ba wù waa cãwanĩɛ̃bɩbliɛga wù hã-m.

40 Gùú tii nǝ̃n ba wù sǝ yì kuurii, wú nǝ̃ hãmĩĩ-i.

41 Nǝ̃ gùú tii nǝ̃n hã-ɲã́ã̀ nǝ̃ hũnciraagu mã́ã yiir nã ɲí ɲũɔ̃ wà ɲi mãã Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo wù bɩgaaba, yáalà mǝ̃́ waa sulammã nǝ̃-ɲã́ã̀, Dũnnũẁ ga pã-yǝ, wù sɩga naalaa.»

(Mãtiyew 18.6-9 ; Lukaw 17.1-2)

42 «Tãnkuurbiibaa mãã bà hṹɔ̃lã́ mǝ̃̀ cɔ̃mmã nnĩĩ, gùú tii nǝ̃n ce wù dɩnẃ duruu Dũnnũ hlũũgɩ nã, ywaruugɩ̀ ji hi gɩ̀ tiiw!

Ba-ń nũũ nãmlãri gɩ̀ tii'n bũɔ̃gɩ nã nã̀ã nǝ̃ǝ̃ ǹ-dii-yǝ lwaakɩnkandɩ nã, gùú ji buɔ wù nã ǹ-ɲǝ̃ǝ̃ ywaruu gúɔ̀.

43 Nǝ̃-ń fǝ̃ǝ̃ wà ǹ nãdĩĩgɩ ji ce ń duruu Dũnnũ hlũũgɩ nã, bǝr-gǝ.

Nǝ̃-ń ba nãkruɔgɩdiintiiw, nã̀ã jãn fɩraa nũmǝ̃nãsǝrɩ nã, gùú búɔlá nã ń jãn jahãlmãw nã dǝ̃ǝ̃mã nã mãã fɩraa mã̀ sǝ̃n dĩĩ ǹ-da, nǝ̃ nãkrɔnɲã hǝ̃ǝ̃lɲã.

44 [Gɩ̀ sùɔ́gɩ nã, gùú jãnããbaa mãã bà ɲĩɛ̃l curo'n cãndi, bà sǝ̃n kurǝǝ, nǝ̃ gùú dǝ̃ǝ̃mãã mãã dàa, mã̀ã́ yo mã̀ sǝ̃n dĩĩ ǹ-da].

45 Ǹ viɛgɩ-ń ba gɩ̀ ji ce ń duruu Dũnnũ hlũũgɩ nã, bǝr-gǝ.

Nǝ̃-ń ba viɛgɩdiintiiw, nã̀ã jãn fɩraa nũmǝ̃nãsǝrɩ nã gùú búɔlá nã ń jãn jahãlmãw nã [dǝ̃ǝ̃mã nã mãã mã̀ sǝ̃n dĩĩ ǹ-da], nǝ̃ vyanɲã hǝ̃ǝ̃lɲã.

46 [Gɩ̀ sùɔ́gɩ nã, gùú jãnããbaa mãã bà ɲĩɛ̃l curo'n cãndi, bà sǝ̃n kurǝǝ, nǝ̃ gùú dǝ̃ǝ̃mãã mãã dàa, mã̀ã́ yo mã̀ sǝ̃n dĩĩ ǹ-da].

47 Ǹ yisɩrɩ-ń ba dɩ̀ ji ce ń duruu Dũnnũ hlũũgɩ nã, gbɩgar ń hiil-dǝ.

Nǝ̃-ń ba yisɩrdiintiiw, nã̀ã jãn fɩraa nũmǝ̃nãsǝrɩ nã, gùú búɔlá nã ń jãn jahãlmãw nã [dǝ̃ǝ̃mã nã] nǝ̃ ǹ yinɲã hǝ̃ǝ̃lɲã.

48 Gɩ̀ sùɔ́gɩ nã, gùú jãnããbaa mãã bà ɲĩɛ̃l curo'n cãndi, bà sǝ̃n kurǝǝ, nǝ̃ gùú dǝ̃ǝ̃mãã nã mãã fɩraa.

49 Nã̀ã wa bà mãã bà tũn dɔ̃mmã kuugɩ nã ǹ-ce gɩ́ ba yalla ǹ-hã Dũnnũw nĩĩguu mãã, Dũnnũẁ ga per curo wo curo nã, nĩĩgɩ-i wú ba wù yow.

50 Dɔ̃mmã kuhuhorgǝ-i, nǝ̃ mã̀ yiyellǝmmã-ń hlǝ mã̀ nã, ɲi ji ver ǹ-dii yiyellǝm mã́ã̀mã̀ nã nǝ̃ bii?^a

Yáalà ɲimãã nǝ̃ ɲì hla dɔ̃mmã́ ba ɲi nã, ɲí da ǹ-ba sɩsɩrãmmã nã nǝ̃ ɲì ɲĩɛ̃.»