Markaw 8

Yesuẁ hã cohuɔgu nǝ̃ wuuri

Gɩ̀-lǝ gɩ̀ bǝ̃ǝ̃gu, cohuɔgɩ́ juo tɩgii nǝ̃ wuur'n kuu'n sáá bà saa, Yesuẃ be wù duunãtaaba ǹ-juo waa nǝ̃-ba wà:

2 «Cohuɔ gúɔ̀gɩ hujãndɩ̀ blǝ́rá-m ǹ-car.

Gɩ̀ bãnɲã siɛlɲã-i nnĩĩ nã, bá nìɛ nǝ̃-m, nǝ̃ bà sǝ nǝ̃ kuu bà ji wuu.

3 Badaabà hlǝ́rá halɩm nã-i ǹ-jo, mǝ̃-ń ce bá ver wà ba kũũ, bà ga mũgala hlũũgɩ nã.»

4 Wù duunãtaabá waa wà: «Jerkwaar díɛ́ nã nìɛ, yi ji hlǝ gɩ̀-lǝ gɩ̀ burw nã haa yiɛ-i ǹ-hã báàbá wuu ǹ-ye?»

5 Yesuẃ yugu-ba wà: «Burbiiga nĩɛ̃-i dìɛ ɲì saa?»

Bá siɛ-yǝ wà: «Nɩrhǝ̃ǝ̃l-i».

6 Wú fǝ̃ǝ̃ ǹ-waa nǝ̃ cohuɔgu wà bá jarnãã ɲũũrũũgu, nã̀ã tuu burbii nɩrhǝ̃ǝ̃l wáà ǹ-dũũ kwayaw Dũnnũw nã, nã̀ã fǝ̃ǝ̃ ǹ-ba wù bǝraa wù nã wù hã wù duunãtaabá ba bà buruɔ wù nã bà hã cwaaba.

7 Bà yáá nǝ̃ tɩtraabiidaba ǹ-pya nã, Yesuw fǝ̃ǝ̃ ǹ-tuu bàá yo ǹ-dũũ kwayaw Dũnnũw nã, nã̀ã ce bá yuɔ-ba ǹ-hã cwaaba.

8 Cwaabá wuu burw ǹ-ye, nǝ̃ bá tɩgɩnǝ̃ǝ̃ bur dɩgaliɛw nã ǹ-dii gaa yii nɩrhǝ̃ǝ̃l kusuugɩ nã.

9 Bà yáá bà ji hi cwa tonnũɔ̃sɔ̃ trãngwaahǝ̃ǝ̃l bà nnǝ̃ǝ̃ (4 000)^a tuugu, wú fǝ̃ǝ̃ ǹ-ce bá ver ǹ-ta,

10 nã̀ã paa ǹ-jãn viigǝgu kusunã bá ta Dalmãnuta yiɛgu nǝ̃ wù duunãtaaba.

Farisĩɛ̃bà waa nǝ̃ Yesuw wà wú ce cɔ̃nnuromdamã ǹ-ja-ba

(Mãtiyew 16.1-12)

11 Farisĩɛ̃bá juo hillaa, ǹ-juo du cincaruugɩ nã nǝ̃ Yesuw ǹ-da ǹ-dǝ̃ǝ̃-yǝ.

Bá waa nǝ̃-yǝ wà wu ce cɔ̃mdamã́ hlǝ Dũnnũw nãã, mã̀ã́ mãã mã̀ pɩgaa wù fãngããgu.

12 Yesuẃ fǝ̃ǝ̃ ǹ-mǝ̃gaa ǹ-fiisa ǹ-hɩr wù kusuugɩ nã, nã̀ã waa wà: «Hamã nã-i kuɔkuɔtaabá ba bà caa mǝ̃́ ce cɔ̃mdamã ǹ-pɩgaa-ba?

Yáalà mǝ̃́ waa sulammã nǝ̃-ɲã́ã̀, cɔ̃m'n síì ce ǹ-pɩgaa kuɔkuɔtaaba.»

13 Nã̀ã fǝ̃ǝ̃ ǹ-hal bà nãã, ǹ-jãn viigǝgu ǹ-ba wù maar lwaakɩnkan'n maaldaarɩ nã.

Farisĩɛ̃ba nǝ̃ Erodɩ leviirw

14 Yesu duunãtaabà yáá bàa sĩĩnǝ̃ǝ̃ bà sáa tuu burw, burblɩ dɩn dɩn yáá bà saa viigǝ'n kusuugɩ nã.

15 Yesuẃ mǝ̃gaa ǹ-waa dɩ́ gbǝ̃ǝ̃ nǝ̃-ba wà: «Níyà!

Mǝ̃́garà ɲí blǝ ɲì hla nã nǝ̃ Farisĩɛ̃ba nǝ̃ Erodɩ leviirw nã.»

16 Wù duunãtaabá du nã ǹ-ba bà waa nǝ̃ bà ɲĩɛ̃ wà: «Yi mãã yì sáa tuu burw, nã́ã̀ dìí sǝ-ì?»

17 Yesuẃ fǝ̃ǝ̃ bà mãã bà waa dìí nǝ̃ bà ɲĩɛ̃.

Wú waa nǝ̃-ba wà: «Danii ɲí ba ɲì waa-dǝ gɩ̀-lǝ gɩ̀ tammã wà ɲi mãã ɲi sáa tuu burw?

Danii ɲi naa cɔ̃nfǝ̃ǝ̃gǝguu nnĩĩ?

Hamã nã-i ɲi sǝ nǝ̃ ɲì da-gǝ?

Nã́ã́ kãnɩmmã́ gaala nã-ì?

18 Ɲí nǝ̃ yinɲã nǝ̃ ɲi sǝ̃n daraa-ì?

Nã̀ã ba nǝ̃ tɔ̃nɲã nǝ̃ ɲi sǝ̃n nɔ̃-ì?

Nã́ã́ ɲi sĩĩnǝ̃ǝ̃-ì?^b

19 Gùú nã mãã mǝ̃̀ yáá mã̀ã bǝraa burbiiga ndiiga nã ǹ-hã cwa tonnũɔ̃sɔ̃ trãngwaahǝ̃ǝ̃l bà ndii (5 000)^c, ɲí biɛriɛ wù dɩgaliɛw nã ǹ-dii nugoyiinɲã nĩɛ̃ nã-ì?»

Bá siɛ-yǝ wà: «Nugoyiin nũɔ̃sɔ̃ nǝ̃ ɲã̀ hǝ̃ǝ̃l-i.»

20 Yesuẃ waa wà: «Nǝ̃ gùú nã mãã mǝ̃̀ yáá mã̀ã karaa burbii nɩrhǝ̃ǝ̃lw nã ǹ-hã cwa tonnũɔ̃sɔ̃ trãngwaahǝ̃ǝ̃l bà nnǝ̃ǝ̃^d (4 000), ɲí biɛriɛ wù dɩgaliɛw nã ǹ-dii gaa yinɲã nĩɛ̃ nã-ì?»

Bá siɛ-yǝ wà: «Gaayiin nɩrhǝ̃ǝ̃l-i.»

21 Wú fǝ̃ǝ̃ ǹ-waa nǝ̃-ba wà: «Nǝ̃ danii ɲi sǝ nǝ̃ ɲì fǝ̃ǝ̃ dɩ̀ tam dìɛ dìɛ?»

Yesuẁ cugur yɩrnĩĩdiɛ yin Besayida lǝri

22 Yesuẁ nǝ̃ wù duunãtaabà gáa hi Besayida lǝri, cwaabá kãã jo nǝ̃ yɩrnĩĩdiɛ ǹ-ji ba bà jiɛriɛ nǝ̃ Yesuw wà wu jĩɛ̃ wù nã nǝ̃ wù nãkruɔgu.

23 Yesuẃ fǝ̃ǝ̃ ǹ-blǝ yɩrnĩĩ wù nãkruɔgɩ nã ǹ-hlǝ nǝ̃-yǝ lǝ'n kusuugɩ nã.

Wú tɔ tɔlunɲã ǹ-tũn wù yinɲã nã, nã̀ã piɛ wù nãkrɔnɲã wù nã nã̀ã yugu-yǝ wà: «N nàa ǹ da kuu-ì?»

24 Yɩrnĩĩẃ cugur wù yinɲã nã̀ã waa wà: «Mǝ̃́ nìɛ mǝ̃̀ da cwaaba, mǝ̃̀ da-ba nã́ã́ tubiɲin-i, bà wáà.»

25 Yesuẃ fǝ̃ǝ̃ ǹ-ver ǹ-piɛ wù nãkrɔnɲã yɩrnĩĩ'n yinɲã nã hlo.

Yɩrnĩĩẃ cugur wù yinɲã ǹ-ba wù ne kullǝ lɩgǝlɩgǝ, wù búɔlá-i.

Wú ba wù da wù pyariɛ ɲinɲã min nã lɩgǝlɩgǝ.

26 Yesuẃ ce wú ta wù kũũ nã̀ã waa nǝ̃-yǝ wà: «Báa jãn lǝ'n kusuugu.»

Piɛrẁ waa wà Yesu wɩ̀-i Kɩrsaw

(Mãtiyew 16.13-20 ; Lukaw 9.18-21)

27 Yesubá ta nǝ̃ wù duunãtaaba ǹ-ba bà maar Filipɩ lǝ'n yiɛgu mãã bà be-gǝ Sesaare yiɛ dɩ̀-lǝ dɩ̀ yiɛ'n liɛbiiga nã.

Ǹ-ya bá ba hlũũgɩ nã, wú yugu-ba wà: «Cwaabà wa halǝmblǝ-i nǝ̃-m?»

28 Bá siɛ-yǝ wà: «Badaabà wa Yuhanãw mãã wù yáá wù ɲĩɛ̃ cwaa-i, badaabà wa, Dũnnũ tanhiil Eli-i, badaa-lǝ wa, Dũnnũ tanhiildiɛ-i nǝ̃-n.»

29 Yesuẃ fǝ̃ǝ̃ ǹ-yugu-ba wà: «Ɲimãã-lǝ, ɲi wa mã́ã-i halii?»

Piɛrẃ siɛ-yǝ wà: «Yíi-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.»

30 Yesuẃ fǝ̃ǝ̃ ǹ-waa dɩ́ gbǝ̃ǝ̃ nǝ̃-ba, wà ba báa waa gɩ̀ cãwandi nǝ̃ curo.

Yesuẁ waa wù kuugu nǝ̃ wù nĩĩm'n cɔ̃mmã

(Mãtiyew 16.21-28 ; Lukaw 9.22-27)

31 Gɩ̀ furũũgɩ nã, Yesuẃ du nã ǹ-ba wù kal-ba, nã̀ã ba wù waa wà: «Gɩ̀ saa vũnvãnããba, nǝ̃ Yahudyaba puruɔntaa'n yuntaaba, nǝ̃ Musa hlũũ'n yuntaabá ywar Curonbiɛw piyɛ̃, nã̀ã hla-yǝ, nã̀ã ko-yǝ wú ku.

Nǝ̃ gɩ̀ bãnɲã siɛlnã yuugu, wú nĩĩ.»

32 Wù gáa ba wù waa-dǝ nǝ̃-ba gbaa nnĩĩ nã, Piɛrẃ fǝ̃ǝ̃ ǹ-be-yǝ bá kãã hiraa bà dǝ ǹ-ba wù gãnãã nǝ̃-yǝ.

33 Nǝ̃ Yesu-lǝ wú yiil ǹ-ba wù ne wù duunãtaaba, nã̀ã ver ǹ-ba wù ganãã nǝ̃ Piɛrw: «Sɩtãn yíì, ba ǹ hal mǝ̃̀ nãã!

Ǹ kãnɩmmã̀ sǝ sùɔ́gɩ dɩn nǝ̃ Dũnnũ mǝ̃gammã, ǹ kãn cwaa'n tam-i.»

34 Yesuw nã̀ã fǝ̃ǝ̃ ǹ-be cocindi nǝ̃ wù duunãtaaba ǹ-juo ba wù waa nǝ̃-ba wà: «Gùú tii nǝ̃n ba wù caa wú duu mǝ̃n nã, wú ya wù hla'n cɔ̃mmã́ ba, nã̀ã hũɔ̃ ywaruugu, nã́ã́ gùú tiiw mãã wù tuu wù gbǝl'n daagu ǹ-ba wù duu mǝ̃̀ nã.

35 Sulammã nã, gùú tiiw nǝ̃n ba wù kaal wù hla'n yuugɩ nã, wùú kuuguu ji guu nã.

Nǝ̃ gùú tiiw mãã wu-ń hũɔ̃ kuugu mã́ã cɔ̃mmã nã, nǝ̃ mǝ̃̀ cɔ̃ndudwalɩm'n cɔ̃mmã nã, wùú ga da fɩraa nũmǝ̃nãsǝri.

36 Curow-ń da cuu ɲinɲã min, nǝ̃ wù yuugɩ guu nã, gɩ̀-lǝ gɩ̀ ji pyar bii dugɔ-i wù saa?

37 Curo yíǹ ji gbǝ̃ǝ̃ ǹ-sǝ̃ǝ̃ ǹ yuugu nǝ̃ bii Dũnnũw saa?»

38 Gùú tii mãã wu-ń blǝ mǝ̃n cɔ̃mmã, nǝ̃ mǝ̃̀ cãwanĩɛ̃ga, ɲã ce circɔ̃m wù saa kuɔkuɔtaaba sǝ̃ǝ̃nã bàá mãã bà sǝ yalntaa, nã̀ã ba diicĩɛ̃rǝntaaba, Curonbiɛ mã́ã̀, mǝ̃-ń ga jo nǝ̃ Dũnnũ mɛlɛgɛbaa mǝ̃̀ Tǝ yuuntasǝ'n gbɩgbaamã nã gùú bǝ̃ǝ̃gu, mã́ã yo, mǝ̃̀ ji blǝ gɩ̀ tii'n cɔ̃mmã ce circɔ̃m-i.