Mãtiyew 15

Yesuẁ waa bà tǝvũnvãnãã'n hlũũ'n cɔ̃mmã

Gɩ̀ furũũgɩ nã, Farisĩɛ̃daba nǝ̃ Musa hlũũ'n yuntaadaabá suro Serusalɛmgu ǹ-kã Yesuw nãã ǹ-kãã yugu-yǝ wà:

2 «Bii cíé ǹ duunãtaabá ba bà ta bà maa yì tǝvũnvãnãã'n hlũũgu?

Nã̀ã wa ba-ń wa ba wuu wuuri, bà sǝ̃n saar bà nãkrɔnɲã.»

3 Yesuẃ siɛ-ba wà: «Ɲimãã-lǝ, bii cíé ɲí ba ɲì maa Dũnnũ hlũũgu, ɲì tǝvũnvãnãã'n hlũũ'n cɔ̃mmã nã?

4 Dũnnũẁ wáalá wà curo ń bũũ ǹ tǝba nǝ̃ ǹ ɲũw.^a

Nã̀ã ver ǹ-waa hlo wà gùú tii nǝ̃n waa cãwanĩɛ̃bɩbliɛga ǹ-hã wù tǝw yindagǝ nã wù ɲũw, wà gɩ saa bá ko gɩ̀ tiiw.^b

5 Nǝ̃ ɲimãã ba ɲì waa wà nǝ̃-ń ba ǹ yáá ǹ caa ń hã ǹ tǝw yindagǝ nã ǹ ɲũw nǝ̃ gùú mãã ǹ-pɛ wù nã, nã̀ã tuu-gǝ ǹ bũũ Dũnnũw nǝ̃-gǝ,

6 wà gɩ-ń dwal ǹ nã, báa bũũ ǹ tǝw nǝ̃ ǹ ɲũw.

Gɩ̀ sùɔ́gɩ nã, ɲi sórrá Dũnnũ cãwandi, ɲì tǝvũnvãnãã'n hlũũ'n cɔ̃mmã nã.

7 Kusunɲãhǝ̃nhãltaa ɲimãã, Dũnnũẁ díilá gùú cãwandii mãã wù tanhiil Esayi nũɔ̃gɩ nã, ɲì cɔ̃mmã nã sulam-i.

Wù wáalá wà:

8 “Bluu báàbà bũũ-m bà nũɔ̃gɩ nã, nǝ̃ bà sǝ bàa blǝ mǝ̃̀ cɔ̃mmã bà hiɛga nã.

9 Bà bũũ-m nǝ̃ǝ̃nĩĩ-i, nã̀ã wa cwaabà kárrá gùú hlũũ'n nǝ̃ǝ̃yaga nã, bà kal cwaaba nǝ̃ gɩ̀-i.”»

Gùú mãã gɩ̀ bla curow

(Markaw 7.14-23)

10 Yesuẃ fǝ̃ǝ̃ ǹ-be cocindi ǹ-juo waa nǝ̃-ba wà: «Ɲì min mǝ̃́garà ɲí jǝ̃ǝ̃ ɲì tɔ̃nɲã ɲí nɔ̃ ɲí hã-m, nǝ̃ ɲí mǝ̃gaa ɲí dii díɛ̀ ɲì yunɲã nã:

11 gùú mãã gɩ̀ jãn curo'n nũɔ̃gɩ nã, gɩ̀ sǝ̃n bla-yǝ Dũnnũ hlũũgɩ nã, nǝ̃ gùú mãã gɩ̀ hlǝ curo'n nũɔ̃gɩ nã, gɩ̀-lǝ gùú blárà-yǝ.»

12 Wù duunãtaabá kuganãã wù nã ǹ-ga waa nǝ̃-yǝ wà: «Ǹ fǝ̃́ǝ̃lã́ wà ǹ cãwanĩɛ̃ga cíé Farisĩɛ̃bá ver furũũ-ì?»

13 Yesuẃ waa wà: «Mǝ̃̀ Tǝ Drɔ-Dũnnũ-lǝ, wu-ń ba wù sáa so tubikuu wo tubikuu, bà ji fuur-gǝ.

14 Yáalà bá ba, yɩrnǝ̃ǝ̃-i bàa blǝ bà nãyɩrnǝ̃ǝ̃'n valunɲã.

Nǝ̃ ɲí fǝ̃́ǝ̃lã́ wà yirnĩĩ wu-ń blǝ wù nãyɩrnĩĩ'n valuugu, gɩ̀ cwaaba hǝ̃ǝ̃lba min bà kã bà ga dũn fuu nã-i.»

15 Piɛrẃ waa wà: «Fɩr cãwan díɛ́dɩ yuugu ń ja-yáà.»

16 Yesuẃ waa wà: «Gɩ ba nã́ã́ ǹ-ji vaa nǝ̃ kuɔkuɔgu, ɲimãã yo ɲi náalá cɔ̃nfǝ̃ǝ̃gǝgɩ-ì?

17 Ɲimãã sáa fǝ̃ǝ̃ wà gùú mãã gɩ̀ jãn curo'n nũɔ̃gu gɩ́ kã wù kusunã-i, nã̀ã ga da gɩ́ cin bindi wú kãã nǝ̃nǝ̃ǝ̃ dɩ̀ nã hĩɛ̃gɩ nã-ì?

18 Nǝ̃ dìí mãã dɩ̀ hlǝ curo'n blɩ'n nũɔ̃gɩ nã, dɩ̀ hlǝ́rá wù kusuu nã-i, dɩ̀-lǝ dìí blárà curow.

19 Nã̀ã wa dìí mãã dɩ̀ hlǝ curo'n blɩ'n hiɛga nã, dɩ̀-i kãnɩmbɩblammã, cokuogu, nǝ̃ ǹ-mǝ̃rǝ̃ǝ̃ nǝ̃ curow mãã ɲi sáa taa, durkũmmã, ŋmãlli, kwasǝri, nǝ̃ yirbǝ̃ǝ̃lǝ̃gǝgu.

20 Ɲã̀-lǝ ɲã̀ã́ blárà curow.

Nǝ̃, ǹ-wuu wuuri nǝ̃ ǹ nãkrɔnɲã nnĩĩ ǹ sáa saar-ɲã, gɩ̀-lǝ gɩ̀ sǝ̃n bla curow.»

Kanãã yiɛntacijaldiɛẁ hũɔ̃ Yesu cɔ̃mmã

(Markaw 7.24-30)

21 Gɩ̀ furũũgɩ nã, Yesuẃ hlǝ gɩ̀ sùɔ́gɩ nã, ǹ-kã Tiir lǝri nǝ̃ Sidɔ̃ lǝ'n yiɛgu.

22 Nǝ̃ Kanãã yiɛntacijaldiɛẁ^c yáá dàa yiɛ gúɔ̀ nã, wú jo Yesuw nã̀ã ǹ-juo kaasǝ nǝ̃ fãngããgu wà: «Yitii, Dawuda bíɛ́ yíì, ne mǝ̃̀ hujãndi!

Tãntũɔ̃diɛ nàa wù ywar mǝ̃̀ tãnkuurw, gɩ́ nǝ̃ gùu gbǝ̃ǝ̃ wù nã ǹ-car.»

23 Yesuẁ sáa haa-gǝ nǝ̃-yǝ.

Wù duunãtaabá kuganãã wù nã ǹ-kãã waa wà: «Nã́ã́ n síì ɲǝ̃ǝ̃ ǹ-ver cijal wáà yì furũũgɩ nã-ì?

Ne wù mãã wù kaasǝraa wù duu yì nã nĩĩguu mãã.»

24 Yesuẃ waa wà: «Dũnnũẁ tĩ́ɛ̃lã́-m Isɩrayɛl bluu nãã dɩn-i, bá nǝ̃ bàa vaalaa nã́ã́ tũm-i.»

25 Cijal wáà jo ǹ-ji kuulǝǝ wù yigagɩ nã nã̀ã waa wà: «Yitii, pɛ mǝ̃̀ nã!»

26 Yesuẃ waa nǝ̃-yǝ wà: «Nǝ̃-ń tuu tãnkuuraa'n wuuri ǹ-hã vabiiba, gɩ̀ sáa fa.»

27 Cijalẃ siɛ-yǝ wà: «Ũwũũ Yitii, nǝ̃ vabii yo, bà wuu bà tii'n jugugwaagaa mãã gà duruu juwuukaagɩ nã.»

28 Gɩ̀-i, Yesuẃ fǝ̃ǝ̃ ǹ-waa nǝ̃-yǝ wà: «Cijal yíì, ń nǝ̃ nã̀ã mǝ̃gaa ǹ-hũɔ̃ mǝ̃̀ cɔ̃mmã!

Yíǹ mãã ǹ cirǝ̃ǝ̃ dìí nã mãã, Dũnnũẃ ce-dǝ ǹ-hã-n.»

Gùú bǝ̃ǝ̃gɩ dɩngu dàa, wù bisĩɛ̃ẃ paa ǹ-buɔ.

Yesuẁ buɔ hlɔnããcin

29 Yesuẃ hlǝ gɩ̀ sùɔ́gɩ nã ǹ-ba wù pɛ̃ Galile yiɛ'n lwaakɩnkan'n nũɔ̃gu.

Wú fǝ̃ǝ̃ ǹ-kãã yugo tãnũũdagǝ nã ǹ-jiraa.

30 Cohuɔdaagɩ́ kãã ba gɩ̀ jo wù nãã nǝ̃ bà hlɔnããba: kasarnãba, yɩrnǝ̃ǝ̃ba, cobornãba, nǝ̃ kũnkũnããbà yáá dàa ǹ-pya hlɔnããcindarǝ nã.

Wùú mãã wu-ń jo nǝ̃ wù yow, wú jo ǹ-ji kra wù nã Yesu vyanɲã tuɔra.

Yesuẃ buɔ-ba.

31 Kũnkũnããbà wáalá cɔ̃mmã, cobornãbá suu, kasarnããbá ba bà wáà huhorɩmmã nã, yɩrnǝ̃ǝ̃'n yinɲã́ cugur.

Dɩ́ tugulǝǝ cohuɔgɩ nã.

Bá du nã ǹ-ba bà bũũ Isɩrayɛl bluu'n Dũnnũw.

Yesuẁ ver wù hã cohuɔdagǝ nǝ̃ wuuri, bá wuu ǹ-ye

(Markaw 8.1-10)

32 Gɩ̀ furũũgɩ nã, Yesuẃ be wù duunãtaaba ǹ-juo waa nǝ̃-ba wà: «Cohuɔ gúɔ̀gɩ hujãndɩ̀ blǝ́rá-m ǹ-car.

Gɩ̀ bãnɲã siɛlɲã-i nnĩĩ nã, bá nìɛ nǝ̃-m, nǝ̃ bà sǝ nǝ̃ kuu bà ji wuu.

Mǝ̃n síì ya bá ver nǝ̃ nũmmã, nã̀ã wa bà ga mũgala hlũũgɩ nã.»

33 Wù duunãtaabá yugu-yǝ wà: «Yi ji da burw haa yiɛ-ì sɔkwaa gúɔ̀ nã ǹ-ji hã cohuɔ gúɔ̀, bá wuu ǹ-ye?»

34 Yesuẃ yugu-ba wà: «Burbiiga nĩɛ̃-i ɲì saa?»

Bá waa wà: «Burbii nɩrhǝ̃ǝ̃l dɩn-i nǝ̃ tɩtobiidaba.»

35 Gɩ̀-i wú fǝ̃ǝ̃ ǹ-ce cohuɔgɩ́ jarnãã ɲũũrũũgu

36 nã̀ã tuu burbii nɩrhǝ̃ǝ̃l wáà nǝ̃ tɩtobii báà ǹ-dũũ kwayaw Dũnnũw nã, nã̀ã fǝ̃ǝ̃ ǹ-bǝraa ɲã̀ nã ǹ-hã wù duunãtaaba, bá buruɔ ɲã̀ nã ǹ-hã-ba.

37 Cwaabá wuu burw ǹ-ye, nǝ̃ bá tɩgɩnǝ̃ǝ̃ bur dɩgaliɛw nã ǹ-dii gaa yiin nɩrhǝ̃ǝ̃l kusuugɩ nã.

38 Bàá mãã bà yáá bàa wuu wuur díɛ̀, bà ji hi cwa tonnũɔ̃sɔ̃ trãngwaahǝ̃ǝ̃l bà nnǝ̃ǝ̃^d (4 000) tuugu.

Canããba nǝ̃ tãnkuuraa'n nũɔ̃gɩ sɩraa.

39 Bà gáa wuu ǹ-tã, Yesuẃ hã-ba nǝ̃ hlũũgu, bá ta, nã̀ã kãã jãn viigǝgu ǹ-ba wù maar Magadan yiɛgu.