Markaw 7

Yesuẁ waa bà tǝvũnvãnãã'n hlũũ'n cɔ̃mmã

Farisĩɛ̃ba nǝ̃ Musa hlũũ'n yuntaadaba, bàa hlǝ Serusalɛmgu ǹ-jo, bá juo tɩgii ǹ-caliɛ Yesuw nã.

2 Bá da wà wù duunãtaadaaba sǝ̃n per bà nãkrɔnɲã nã, dɩ̀ yuugɩ-i wa bá sáa bà saar-ɲã Yahudyaba tammã nã nã̀ã da ǹ-wuu wuuri.

3 Sulammã nã Farisĩɛ̃ba nǝ̃ Yahudya'n dɩgaliɛw, ba-ń wa ba wuu wuuri, ba-ń ce bá mǝ̃gaa ǹ-saar bà nãkrɔnɲã ǹ-vaa nǝ̃ bà tǝvũnvãnãã'n hlũũgu.

4 Ba-ń hlǝ cɔ̃ncesɔsiɛga nã ǹ-jo, bà sǝ̃n wuu wuuri nã́ã́ ba sáa saar bà hla nã ǹ-ba yiyalɩmmã nã.

Bà ce cɔ̃ncin bà tǝvũnvãnãã'n tammã nã́ã́ bà ɲããɲũɔ̃ɲin'n saarɩmmã, bà hablaa'n saarɩmmã nǝ̃ bà kwabyãr'n wariɛ'n saarɩmmã.

5 Farisĩɛ̃ba nǝ̃ Musa hlũũ'n yuntaabá yugu Yesuw wà: «Danii yíǹ duunãtaabà sǝ̃n duu yì tǝvũnvãnãã'n hlũũgɩ nã, nã̀ã ba bà sǝ̃n saar bà nãkrɔnɲã ǹ-ba yiyalɩmmã nã ǹ-vaa yì tǝvũnvãnãã'n hlũũgu nã̀ã da ǹ-wuu wuuri?»

6 Yesuẃ siɛ-ba wà: «Kusunɲãhǝ̃nhãltaa ɲimãã, Dũnnũẁ díilá gùú cãwandii mãã wù tanhiil Esayi nũɔ̃gɩ nã, ɲì cɔ̃mmã nã sulam-i.

Wù yáalá wà: “Bluu báàba bũũ-m bà nũɔ̃gɩ nã, nǝ̃ bà sǝ bàa blǝ mǝ̃̀ cɔ̃mmã bà hiɛga nã.

7 Bà bũũ-m nǝ̃ǝ̃nĩĩ-i, nã̀ã wa cwaabà kárrá gùú hlũũ'n nǝ̃ǝ̃yaga nã, bà kal cwaaba nǝ̃ gɩ̀-i.”»

8 Yesuw nã̀ã fǝ̃ǝ̃ ǹ-waa nǝ̃-ba wà: «Ɲi nǝ̃́nǝ̃́ǝ̃ Dũnnũ hlũũgɩ nã nã̀ã ba ɲì duu cwaanbii'n hlũũgɩ nã.»

9 Yesuẃ ver ǹ-waa nǝ̃-ba hlo wà: «Ɲi mǝ̃́gará ǹ-hla Dũnnũ hlũũgu sulammã nã ǹ-hiraa ɲì tǝvũnvãnãã'n kuugu drɔ.

10 Sulammã nã Musaẁ wáalá wà: “Ɲi saa ɲí ba ɲì bũũ ɲì tǝba nǝ̃ ɲì ɲũba”, nã̀ã waa hlo wà: “Gùú tii nǝ̃n waa cãwanĩɛ̃bɩbliɛga ǹ-hã wù tǝw yindagǝ nã wù ɲũw, gɩ saa bá ko gɩ̀ tiiw.”

11 Nǝ̃ ɲimãã-lǝ ɲì saa, ɲi hũɔ̃ curow waa nǝ̃ wù tǝw yindagǝ nã wù ɲũw wà: “Mǝ̃̀ yáá mǝ̃̀ saa mǝ̃̀ pɛ n nã nǝ̃ gùú mãã Kɔrbã-i^a nǝ̃-gǝ.”

Dɩ̀ yuugɩ-i nã wà: “Gɩ̀-lǝ gɩ̀ kuugu, mǝ̃̀ ji bũũ Dũnnũ-i nǝ̃-gǝ.”

12 Gɩ̀ tiiw-ń ba wù ce nnĩĩ tammã, ɲi hã-yǝ nǝ̃ hlũũ-i wu báa da ǹ-ce kuu ǹ-hã wù tǝw yindagǝ nã wù ɲũw.

13 Gɩ̀-lǝ gɩ̀ tammã, ɲi sórrá Dũnnũ cãwandi, nã̀ã ba ɲì duu hlũũgɩ nã mãã ɲí kárrá-gǝ.

Ɲi nìɛ ɲì ce cɔ̃ncin gɩ̀-lǝ gɩ̀ tammã.»

Gùú mãã gɩ̀ bla curow

(Mãtiyew 15.10-20)

14 Wú ver ǹ-be cocindi ǹ-juo ba wù waa nǝ̃-ba wà: «Ɲì min mǝ̃́garà ɲí jǝ̃ǝ̃ ɲì tɔ̃nɲã ɲí nɔ̃ ɲí hã-m, nǝ̃ ɲí mǝ̃gaa ɲí dii díɛ̀ ɲì yunɲã nã.

15 Curo'n blɩẁ síì gbǝ̃ǝ̃ ǹ-blǝ nã Dũnnũ hlũũgɩ nã nǝ̃ nũɔ̃nã wuuri, ba wa wu blárá.

Nǝ̃ dìí mãã dɩ̀ hlǝ wù nũɔ̃gɩ nã, dìí blárà-yǝ.

16 [Wùú nǝ̃n ba wù ji nɔ̃, wú mǝ̃gaa ǹ-nɔ̃!»]

17 Yesuẁ gáa hlǝ cocin díɛ̀ sǝ̃ǝ̃nã ǹ-ta ǹ-kũũ, wù duunãtaabá kãã yugu-yǝ nǝ̃ cãwaadũũm mã́ã̀mã̀ fɩrɩmmã.

18 Wú fǝ̃ǝ̃ ǹ-waa nǝ̃-ba wà: «Gɩ ba nã́ã́ ɲimãã yo, ɲi náalá cɔ̃nfǝ̃ǝ̃gǝgɩ-ì?

Ɲi sáa ne ǹ-da-gǝ wà nũɔ̃nãwuurɩ síì gbǝ̃ǝ̃ ǹ-bla curow-ì?

19 Nã̀ã wa wuurɩ̀ sǝ̃n jãn curo'n blɩ'n hiɛ nã sǝ, dɩ̀ jãn wù kusuu nã-i, nã̀ã ga da dɩ́ cin bindi wú kãã nǝ̃nǝ̃ǝ̃ dɩ̀ nã hĩɛ̃gɩ nã.»

Yesuẁ pɩ́gará cwaaba gùú sùɔ́gɩ-i wà yi ji gbǝ̃ǝ̃ ǹ-wuu wuur wo wuur.

20 Nã̀ã fǝ̃ǝ̃ ǹ-waa hlo wà: «Dìí mãã dɩ̀ hlǝ curo'n blɩ'n hiɛga, dìí blárà-yǝ.

21 Nã̀ã dìí mãã dɩ̀ hlǝ curo'n blɩ'n kusuugɩ nã, nǝ̃ wù hiɛga nã, dɩ̀-i kãnɩmbɩblammã, durkũmmã, ŋmãlli, cokuogu,

22 ǹ-mǝ̃rǝ̃ǝ̃ nǝ̃ curow mãã ɲi sáa taa, ǹ-duu dalaa'n caamã nã, ǹ-ce gaabɩbliɛga, ǹ-ce dɛbiɛr yaga, ǹ-ce dɩgaa'n circɔ̃mmã, ǹ-ce yisɩri, nǝ̃ yirbǝ̃ǝ̃lǝ̃gǝgu, ǹ-huɔruɔ wù hla nã, nã̀ã ba ǹ-ce baahãrsǝri.

23 Gaabɩbliɛ gáàga min gà mãã gà hlǝ curo'n hiɛga nã, gùú cíé wú ba curow mãã nǝ̃ dɩgaagu.»

Nǝ̃ǝ̃nĩĩcijaldiɛẁ hũɔ̃ Yesu cɔ̃mmã

(Mãtiyew 15.21-28)

24 Yesuẃ suro gɩ̀ sùɔ́gɩ nã ǹ-ta Tiir lǝri nǝ̃ Sidɔ̃ lǝ'n yiɛgu.

Wù gáa jãn sùɔ́dagǝ, wù sáá wù caa curoẃ fǝ̃ǝ̃, nǝ̃ cwaabá kãã hla nã̀ã da-yǝ.

25 Nã̀ã wa, cijaldiɛẁ yáá dàa nǝ̃ bisãblɩ tãntũɔ̃ wù nã.

Cijal wáà yáá wùu nɔ̃ Yesu cɔ̃mmã nã, wú paa ǹ-juo duruu Yesu vyanɲãã taara.

26 Siirii-Fenisɩ yiɛntacijal yáá, Yahudya sáá nǝ̃-yǝ, nǝ̃ wù yáá wù cirǝ̃ǝ̃ Yesuw nã wà wú ɲǝ̃ǝ̃ ǹ-hiil tãntũɔ̃w wù bisĩɛ̃w nã.

27 Yesuẃ fǝ̃ǝ̃ ǹ-waa nǝ̃-yǝ wà: «Ya tãnkuuraabá wuu ǹ-ye haasǝ, gɩ̀ sǝ̃n saa yí tuu tãnkuuraa'n wuuri ǹ-nǝ̃ǝ̃ ǹ-hã vabiiba.»

28 Cijalẃ siɛ-yǝ wà: «Yitii, sulam-i, nǝ̃ vabii yo bà wuu tãnkuuraa'n jugugwaagaa mãã gà duruu juwuukaagɩ nã.»

29 Gɩ̀-i Yesuẃ fǝ̃ǝ̃ ǹ-siɛ-yǝ wà: «Maar ń kũũ, ǹ cãwan díɛ̀dɩ cɔ̃mmã nã, tãntũɔ̃ẁ hlǝ́rá ǹ bisĩɛ̃ nã.»

30 Cijalẃ ta ǹ-kũũ ǹ-kãã da wù tãnkuurw mǝ̃rãmmã nã guumǝ̃rãkuugu drɔ, tãntũɔ̃w yà hlǝ wù nã.

Yesuẁ buɔ kũnkunĩĩtɔ̃njǝrdiɛ

31 Gɩ̀ furũũgɩ nã, Yesuẃ hlǝ Tiir lǝ'n yiɛgu.

Wú ta ǹ-hlǝ Sidɔ̃ lǝri, ǹ-kãã hlǝ Dekapol yiɛgu^b ǹ-ba wù maar Galile yiɛ'n lwaakɩnkan'n yiɛgu.

32 Bá kãã jo nǝ̃ tɔ̃njǝrdiɛ, cãwan yo dɩ̀ ca wù nã, ǹ-juo ba bà jiɛriɛ nǝ̃ Yesuw wà wu piɛ wù nãkruɔgu wù nã.

33 Yesuẃ blǝ-yǝ nǝ̃ wù dɩn ǹ-kã nǝ̃-yǝ gɩ̀ dǝ yiɛ, bá hal cocindɩ nã.

Wú fǝ̃ǝ̃ ǹ-dii wù nǝ̃biiga tɔ̃njǝr'n tɔ̃nɲã nã, nã̀ã ga fǝ̃ǝ̃ ǹ-tɔ tɔlunɲã ǹ-dii wù nãkruɔgɩ nã ǹ-jĩɛ̃ tɔ̃njǝr'n nãmbendɩ nã.

34 Yesuẁ nã̀ã ga fǝ̃ǝ̃ ǹ-haar wù yuugu ǹ-ba wù ne drɔgu, nã̀ã ga fǝ̃ǝ̃ ǹ-fiisa ǹ-hɩr nã̀ã waa wà: «Efata!» dɩ̀ yuugɩ-i wà «Cugur ǹ hla.»

35 Gùú bǝ̃ǝ̃gɩ dɩngu, tɔ̃njǝr'n tɔ̃nɲã́ ciɛl, wù nãmben yo dɩ́ fɩr, wú ba wù waa cɔ̃mmã saamã dɩndɩn.

36 Yesuẃ fǝ̃ǝ̃ ǹ-waa nǝ̃-ba wà ba báa taa-dǝ nǝ̃ curo, nǝ̃ wù yáá wu-ń waa dɩ̀-lǝ nǝ̃-ba bǝ̃ǝ̃ wo bǝ̃ǝ̃, bà piɛ kuu mã̀ waamã nã-i bà ja cwaaba.

37 Dɩ̀ yáá dìi tugulǝǝ cwaaba nã ǹ-car, bá ba bà waa wà: «Wu-ń wa wú ce cɔ̃m wo cɔ̃m, wù ce-mã fa-i, wù ce tɔ̃njǝraabá ba bà nɔ̃, nã̀ã ba wù ce kũnkunããbá ba bà waa cɔ̃mmã.»