Markaw 6

Nasarɛtɩ lǝntaabà hla Yesu cɔ̃mmã

Yesuẁ sórrá gùú sùɔ́gɩ-i, nã̀ã ga ver ǹ-jo wù lǝri nǝ̃ wù duunãtaabaa mãã bà yáá bà duu wù nã.

2 Yahudyaba fiisaa'n yuugu, wú kãã ba wù kal cwaaba nǝ̃ Dũnnũ cãwandi, bà tɩgim'n duugɩ nã.

Gùú cocindii nǝ̃n nṹɔ̃́ wù cãwandi, dɩ́ tugulǝǝ bà nã ǹ-car bá ba bà waa wà: «Wù hlǝ́rá nǝ̃ cɔ̃m mã́ã̀ haa yiɛ-i?

Halii hlã-yǝ nǝ̃ cɔ̃nfǝ̃ǝ̃gǝ gúɔ̀?

Nǝ̃ wù cíé danii nã̀ã juo ba wù gbǝ̃ǝ̃ wù ce cɔ̃nnurom mã́ã̀ tuugu?

3 Dapaal wáà sǝ-ì?

Mariyam bíɛ́w, Yakubaba nǝ̃ Yosew nǝ̃ Sudew nǝ̃ Simɔ̃ba ɲũũnãtii sǝ-ì?

Yi sɩriɛ yì min nǝ̃ wù tǝ̃ǝ̃ba nhlíɛ̀ nã-ì?»

Gɩ̀-lǝ gùú kãnɩmmãã yáá mã̀ ji ce bá ver furũũ.

4 Yesuẁ yáá wù waa nǝ̃-ba wà: «Badaba'n sǝ̃n dìɛ Dũnnũ tanhiilw nã́ã̀ wù hla'n yiɛntaa sǝ nǝ̃ wù cwanããba nǝ̃ wù suɔntaaba.»

5 Nǝ̃ gɩ-ń ba gɩ̀ sǝ̃n wa wu píɛlá wù nãkrɔnɲã hlɔnããdaba nã sǝ ǹ-ce bá buɔ, wù sáa gbǝ̃ǝ̃ ǹ-ce cɔ̃nnurom gɩ̀ sùɔ́gɩ nã.

6 Bà gáa ba bà sáa hũɔ̃ Dũnnũ cɔ̃mmã nnĩĩ nã, dɩ́ tugulǝǝ Yesuw nã.

Wú ba wù waaraa gɩ̀ yiɛ'n liɛga nã wù kal cwaaba.

Yesuẁ tĩɛ̃ Nũɔ̃sɔ̃nǝ̃bahǝ̃ǝ̃lba

(Mãtiyew 10.5-15 ; Lukaw 9.1-6)

7 Yesuẃ be Nũɔ̃sɔ̃nǝ̃bahǝ̃ǝ̃lba ǹ-juo ba wù tĩɛ̃-ba cwaaba hǝ̃nhǝ̃l, nã̀ã hã-ba nǝ̃ fãngããgu tãntɔ̃nããba drɔ.

8 Nã̀ã fǝ̃ǝ̃ ǹ-waa nǝ̃-ba wà ba báa tuu kuu bà waal'n hlũũgɩ nã, gɩ-ń ba gɩ̀ sǝ̃n wa guruu dɩndɩn sǝ.

Wà ba báa tuu wuur'n kuu, ba báa tuu bɩgatĩɛ̃, ba báa tuu jin

9 nǝ̃ curo'n báa dii kuulaadiibaba hǝ̃ǝ̃lba, nǝ̃ viɛtaan-lǝ, wà bá dii ɲã-lǝ.

10 Nã̀ã fǝ̃ǝ̃ ǹ-waa nǝ̃-ba wà: «Ɲi-ń kãã hyar gùú tii'n suɔgu, ɲí ba gùú sùɔ́gu, fuwɔ ɲì tallɩ̀ ji hi.

11 Nǝ̃ gùú yiɛntaaba-ń hla ɲì hyarɩmmã yindagǝ nã ǹ-hla bà sáa nɔ̃ ǹ-hã-ɲã́ã̀, púgurǝ̀ǝ ɲì viɛtra'n hlɔ̃mmã nã, ɲí pɩgaa-ba wà ba sáa fǝ̃ǝ̃ ǹ-ce.»

[Mǝ̃̀ waa sulam-i nǝ̃-ɲã́ã̀, gɩ̀-lǝ gɩ̀ lǝ'n sugojaryuugu, Dũnnũẁ mãã wù ga ce dìí mãã bà nã, dɩ̀ ga maa dìí mãã dɩ̀ ga hi Sodɔm lǝri nǝ̃ Gomɔr lǝri.]

12 Yesu tĩɛ̃taabá fǝ̃ǝ̃ ǹ-ta ǹ-kãã ba bà waa Dũnnũ cãwandi bà ja cwaaba wà bá nǝ̃nǝ̃ǝ̃ bà gaacĩɛ̃yaga nã nã̀ã tuu ǹ-tu.

13 Bà ɲǝ̃́ǝ̃lã́ tãntɔ̃nããcin, nã̀ã tra nɔ̃mmã hlɔnããcin nã ǹ-ce bá buɔ.

Yuhanãw mãã wù ɲĩɛ̃ cwaaba wù kuugu

(Mãtiyew 14.1-12 ; Lukaw 9.7-9)

14 Yesu yiirɩ̀ mãã dɩ̀ jáa hlǝ yanɲã min nã, jãmãtigi Erodɩẃ juo nɔ̃-dǝ.

Badaabà yáá bà waa wà Yuhanãw mãã wù yáá wù ɲĩɛ̃ cwaaba, wà wùú gáa nĩĩ ǹ-hlǝ cugutaaba sǝ̃ǝ̃nã, wà gùú cíé wú ba nǝ̃ fãngããgu wù ce cɔ̃nnurommã.

15 Badaabá ba bà waa wà Dũnnũ tanhiil Eli-i, badaa-lǝ bá ba bà waa wà gɩ̀ bǝ̃ǝ̃'n tanhiildiɛ-i.

16 Nǝ̃ Erodɩ-lǝ, wù gáa ba wù nɔ̃ Yesu gaaciega nã, wú waa wà: «Yuhanã wáà mãã mǝ̃̀ cíé bá bǝr wù yuugu, wù-lǝ wùú gáa hla nã̀ã nĩĩ ǹ-hlǝ kuugɩ nã!»

17 Erodɩw nǝ̃ wù hla, wùú cíé bá blǝ Yuhanãw ǹ-vaa-yǝ ǹ-dii-yǝ kasoduugɩ nã, wù tiinãtii Filipɩ ciɛ Erodiyadɩ cɔ̃mmã nã, wù yáá wùu tuu ǹ-dii-yǝ nǝ̃ ciɛ.

18 Nã̀ã wa Yuhanãẁ yáá wùu waa nǝ̃ Erodɩw wà: «Gɩ̀ sáa saa ń tuu ǹ tiinãtii'n ciɛw ǹ-jiraa nǝ̃-yǝ.»

19 Erodiyadɩ hiɛgá mǝ̃gaa ǹ-dũ nǝ̃ Yuhanãw, fuwɔ wú ba wù caa wú ce bá ko-yǝ, nǝ̃ wù sáá wù ji gbǝ̃ǝ̃ ǹ-ce-dǝ.

20 Sulammã nã, Erodɩẁ yáá wù sɔ̃ Yuhanãw nã, nã̀ã wa wù yáá wùu fǝ̃ǝ̃ wà cosũɔ̃lyǝ-i nǝ̃-yǝ, wùu kra wù dǝ ǹ-hã Dũnnũw, wù yáá wùu fǝ̃ǝ̃ ǹ-blǝ-yǝ.

Yuhanãẁ yáá wu-ń waa cɔ̃mmã, Erodɩẃ ba wù sǝ̃n fǝ̃ǝ̃ wù diicerǝdi, nǝ̃ wù cãwan'n nɔ̃llɩ́ ba dɩ̀ yáá dɩ̀ dwal wù nã.

21 Nǝ̃ gùú bǝ̃ǝ̃guu mãã gùu saa gɩ́ juo hi, ǹ-vaa nǝ̃ Erodɩ huum'n yuu'n paaruugu.

Wú ce bá hĩɛ̃ wuuri nã̀ã jar wù cogǝ̃ngĩɛ̃ba, wù sɩrǝǝsɩba yuntaaba nǝ̃ Galile yiɛ'n nũɔ̃sǝn yigantaaba.

22 Erodiyadɩ bisĩɛ̃ẃ kãã jo gɩ̀ sùɔ́gɩ nã, ǹ-juo ba wù sa.

Wù saagɩ́ dwal Erodɩw nã nǝ̃ gùú cwaabaa mãã wù yáá wùu jar-ba bá jo.

Wú fǝ̃ǝ̃ ǹ-waa nǝ̃ bisãblɩw wà: «Ǹ mãã ǹ caa kuu wo kuu mãã, cirǝ̃ǝ̃ gɩ̀ nã mǝ̃̀ saa, mǝ̃̀ ji hã-n nǝ̃-gǝ.»

23 Nã̀ã ǹ-ver ǹ-waa hlo wà: «Mǝ̃n waasǝ wà n mãã ǹ ji cirǝ̃ǝ̃ gùú nã, mǝ̃ ji hã-n nǝ̃-gǝ, halle nǝ̃-n wa yí buruɔ mǝ̃̀ yuuntasǝ'n ɲinɲã nã tiɛmã hǝ̃ǝ̃lmã, mǝ̃̀ ji ce-dǝ.»

24 Bisãblɩẃ fǝ̃ǝ̃ ǹ-hlǝ ǹ-yugu wù ɲũw wà: «Ǹ caa mǝ̃́ cirǝ̃ǝ̃ bii nã-ì?»

Wù ɲũẃ siɛ-yǝ wà: «Yuhanãw mãã wù ɲĩɛ̃ cwaaba, wù yuugu.»

25 Gùú bǝ̃ǝ̃gɩ dɩngu dàa bisãblɩẃ sɔ̃ ǹ-jãn wù gbɩraanã, ǹ-kã jãmãtigiw nãã nǝ̃ cirǝ̃m mã́ã̀ wà: «Mǝ̃̀ caa ń dii Yuhanãw mãã wù ɲĩɛ̃ cwaaba wù yuugu tasadiɛ nã ń hã-m kuɔkuɔdiɛ.»

26 Jãmãtigi cãndɩ́ juo karaa, nǝ̃ wù mãã wù yáá wùu hi ǹ-waasǝ ǹ-tã, nǝ̃ gùú cwaabaa mãã bà yáá dàa bà-lǝ bà cɔ̃mmã nã, wù sáa ba wù caa wù hla-dǝ.

27 Gùú bǝ̃ǝ̃gɩ dɩnguu dàa, wú tĩɛ̃ gardɩbiɛw wà wú kãã jo nǝ̃ Yuhanã yuugu.

Gardɩbiɛẃ ta ǹ-kãã jã ǹ-bǝr Yuhanã yuugu kasoduugɩ nã,

28 ǹ-jo nǝ̃-gǝ tasadiɛ nã, ǹ-juo hã bisãblɩw nǝ̃-gǝ, nǝ̃ wù-lǝ wú fǝ̃ǝ̃ ǹ-hã wù ɲũw nǝ̃-gǝ.

29 Yuhanã duunãtaabà gáa nɔ̃-dǝ, bá kãã tuu wù pĩɛ̃ndi ǹ-kãã dii-dǝ pĩɛ̃ndiitãnferdarǝ nã.

Yesuẁ hã cohuɔgu nǝ̃ wuuri

(Mãtiyew 14.13-21 ; Lukaw 9.10-17 ; Yuhanãw 6.1-14)

30 Yesu tĩɛ̃taabà gáa juo tɩgii ǹ-caliɛ wù nã, bà cíé kuu wo kuu, nǝ̃ bà kállá cwaaba nǝ̃ kuu wo kuu mãã, bá taa gà min ǹ-ja-yǝ.

31 Yesuẃ waa nǝ̃-ba wà: «Jaatiɛ sɔkwaadagǝ nã, ɲi ga fiisa fiyãã.»

Nã̀ã wa cocindɩ̀ yáá dɩ̀ maar nã̀ã ba dɩ̀ jo, fuwɔ ǹ-ce Yesuẁ nǝ̃ wù duunãtaabà sáa da gbaagu ǹ-ba bà ji wuu wuuri.

32 Bá fǝ̃ǝ̃ ǹ-jãn viigǝdagǝ nã ǹ-ta nǝ̃ bà dɩn, ǹ-kãã ba sùɔ́dagǝ nã, sɔkwaadagǝ nã.

33 Nǝ̃ cocindɩ̀ díɛ́-ba, ǹ-fǝ̃ǝ̃-ba, bá fǝ̃ǝ̃ bà mãã bà kã gùú sùɔ́gu, bá hlǝ liɛga min nã, vyanɲã nã, ǹ-sɔ̃ ǹ-ta, ǹ-kãã káà-ba gɩ̀ sùɔ́gɩ nã.

34 Yesuẁ gáa hlǝ viigǝgɩ nã, wú da cohuɔdagǝ, bà hujãndɩ́ blǝ-yǝ ǹ-car.

Wù yáá wù da-ba nã́ã́ tũmbaa mãã bà sǝ nǝ̃ tũnciir, nã̀ã du nã ǹ-ba wù kal-ba nǝ̃ cɔ̃ncin.

35 Nǝ̃ bǝ̃ǝ̃gɩ̀ mãã gɩ̀ yáá gɩ̀ jo gɩ̀ ji jãn, wù duunãtaabá juo waa nǝ̃-yǝ wa: «Sùɔ́ gúɔ̀ sɔkwaa-i nǝ̃ bǝ̃ǝ̃ yo gɩ́ ba gɩ̀ jo gɩ̀ ji jãn,

36 hã-ba nǝ̃ hlũũgu, bá kã kuɔyaga nǝ̃ liɛga nã ǹ-ga sǝ̃ǝ̃ wuuri ǹ-wuu.»

37 Yesuẃ fǝ̃ǝ̃ ǹ-siɛ-ba wà: «Ɲimãã nǝ̃ ɲì hla, hlã́ã̀-ba nǝ̃ wuuri bá wuu.»

Bá waa nǝ̃-yǝ wà: «Ǹ wa yí sǝ̃ǝ̃ wuuri nǝ̃ curo'n hyarsǝ nɩrhǝ̃ǝ̃l mããcem'n jinɲã-i ǹ-hã-ba-ì?»

38 Yesuẃ fǝ̃ǝ̃ ǹ-waa nǝ̃-ba wà: «Kã́ã̀ ɲi ga ne, burbiiga nĩɛ̃-i dìɛ ɲì saa?»

Bá kãã caaraa ǹ-fǝ̃ǝ̃ nã̀ã juo waa nǝ̃-yǝ wà: «Burbiiga ndii nǝ̃ tɩtraaba hǝ̃ǝ̃l-i dìɛ.»

39 Gɩ̀-i Yesuẃ fǝ̃ǝ̃ ǹ-waa nǝ̃-ba wà bá ce cwaabá jarnãã juwuukaanɲã nã hyãbrĩɛ̃gu drɔ.

40 Cwaabá fǝ̃ǝ̃ ǹ-jarnãã cwa gwaahǝ̃ǝ̃l nǝ̃ nũɔ̃sɔ̃ nũɔ̃sɔ̃ nǝ̃ cwa gundɩndi.

41 Yesuẃ fǝ̃ǝ̃ ǹ-tuu burbiiga ndii gáà, nǝ̃ tɩtraaba hǝ̃ǝ̃l báà, ǹ-haar wù yuugu drɔgu, ǹ-dũũ kwayaw Dũnnũw nã, wuur díɛ̀dɩ cɔ̃mmã nã.

Nã̀ã fǝ̃ǝ̃ ǹ-ba wù bǝraa burbiiga wù hã wù duunãtaabá ba bà buruɔ wù nã bà hã cwaaba.

Wú buruɔ tɩtraaba hǝ̃ǝ̃l báà yo bà nã, ǹ-hã bà min.

42 Bà min, bá wuu ǹ-ye,

43 nǝ̃ Yesu duunãtaabá fǝ̃ǝ̃ tɩgɩnǝ̃ǝ̃ burw dɩgaliɛ nã, nǝ̃ tɩtraaba, ǹ-dii-ɲã nugoyiin nũɔ̃sɔ̃ nǝ̃ ɲã̀ hǝ̃ǝ̃l kusuugɩ nã.

44 Gùú cwaabaa nǝ̃n wúulá burw, bibyanããbaa dɩn bà yáá bà ji hi cwa tonnũɔ̃sɔ̃ trãngwaahǝ̃ǝ̃l bà ndii (5 000)^a.

Yesuẁ wáà wù ta hũmmã drɔ

(Mãtiyew 14.22-33 ; Yuhanãw 6.16-21)

45 Dɩ̀-lǝ dɩ̀ furũũgɩ nã, wú paa ǹ-guur wù duunãtaaba bá jãn viigǝgɩ nã ǹ-ta wù yiga nã ǹ-huɔl ǹ-ba bà maar lwaakɩnkan'n bɩmblaadaagɩ nã Besayida lǝri, nǝ̃ wù-lǝ wú ba dàa wù hã cocindi nǝ̃ hlũũgu bá ta.

46 Yesuẁ gáa hã-ba nǝ̃ hlũũgu bá ta ǹ-tã, wú fǝ̃ǝ̃ ǹ-ta tãnũũgɩ nã wù ga cirǝ̃ǝ̃ Dũnnũw nã.

47 Taagà gáa cu, Yesu duunãtaa'n viigǝgɩ̀ yáá lwaakɩnkan'n sǝ̃ǝ̃gɩ nã-i, nǝ̃ wù-lǝ wú ba nǝ̃ wù dɩn ɲũũrũũgu.

48 Wù duunãtaabà mãã bà yáá bà jǝ̃ǝ̃lǝ̃ǝ̃ saluugu, wu ba wù da wà viigǝ'n sɔ̃l gáa ba dɩ̀ ca ba nã ǹ-car, taajãlũũ'n nũɔ̃gɩ nã, wú suro ǹ-ba wù wáà hũmmã drɔ wù jǝ̃ǝ̃lǝ̃ǝ̃-ba, nã̀ã ga ba wù jo wù ji maa-ba.

49 Bà gáa da-yǝ, wù wáà lwaakɩnkandi drɔ, bá ba bà ne wà fíí cugutiidiɛ hillaa bà nã, bá ba bà kaasǝraa huuu,

50 nã̀ã wa bà min bà díɛ́-yǝ, bà hiɛgá mǝ̃gaa ǹ-gaala nã dugɔ.

Gùú bǝ̃ǝ̃gɩ dɩngu dàa, Yesuẃ waa nǝ̃-ba wà: «Bláá sɔ̃ cɔ̃m nã!

Mǝ̃n-lǝ mã́ã-i.

Bláá ya gbǝrsǝrɩ́ blǝ-ɲã́ã̀.»

51 Yesuw nã̀ã fǝ̃ǝ̃ ǹ-jãn ǹ-kã bà nãã viigǝguu kusunã, saluugɩ́ paa ǹ-hiraa.

Dɩ́ tugulǝǝ bà nã ǹ-ji maa gɩ̀ sùɔ́gu.

52 Nã̀ã wa gùú burcɔ̃mmãã mãã mã̀ cíé ǹ-ta nnĩĩ, bà kãnɩmmã̀ yáá mã̀ã gaala nã, bà sáa fǝ̃ǝ̃ mã̀ tam.

Yesuẁ buɔ hlɔnããba Senisarɛtɩ yiɛgu

(Mãtiyew 14.34-36)

53 Bà gáa huɔl lwaakɩnkandi ǹ-tã, bá kãã hi Senisarɛtɩ yiɛgu.

Bá vaa viigǝgu ǹ-kra bɩmblaagɩ nã.

54 Bà gáa yii ǹ-hlǝ viigǝgɩ nã, cwaabá fǝ̃ǝ̃ Yesuw.

55 Gɩ̀-i cwaabá juo ba ba-ń nɔ̃ wà Yesu nàa sùɔ́ wo sùɔ́, bá ba bà sɔ̃ bà kã nǝ̃ hlɔnããba-i bà ɲããmǝ̃rãɲinɲã drɔ.

Cwaabà wáaráa yiɛ gúɔ̀gɩ min nã nnĩĩ-i.

56 Wù yáá wu-ń hi sùɔ́ wo sùɔ́, liɛbiiga nã, liɛgǝ̃ngĩɛ̃ga nã nǝ̃ kuɔyaga nã, cwaabà yáá ba-ń ce bá kã nǝ̃ bà hlɔnããbaa bà cɔ̃ncesɔsiɛga nã ǹ-kra bà nã nã̀ã ba bà jiɛriɛ nǝ̃ Yesuw wà wu ya hlɔnããbá jĩɛ̃ wù kuulaanũɔ̃gu dɩndɩn nã.

Bà min mãã bà jĩ́ɛ̃lã́ gɩ̀ nã, bà búɔlá.