Markaw 5

Yesuẁ buɔ tãntɔ̃nããntiidiɛ Gerasa yiɛntaa'n yiɛgu

Bá kãã hiraa bɩmblaagɩ nã, Gerasa yiɛntaa'n yiɛguu mãã lwaakɩnkan'n maalɩ nã.

2 Yesuẁ gáa yii ǹ-hlǝ viigǝgɩ nã, tãntɔ̃nããntiidiɛẃ hlǝ pĩɛ̃ndiitãnfla'n yiɛgu ǹ-ba wù jǝ̃ǝ̃lǝ̃ǝ̃ wù nã.

3 Gɩ̀ biɛẁ yáá dàa wù cɔ pĩɛ̃ndiitãnflaga sǝ̃ǝ̃nã, curo'n sáá wù ji gbǝ̃ǝ̃ ǹ-vaa-yǝ, halle nǝ̃ jɔrgɔba.

4 Sulammã nã, bà yáá ba-ń ce bá dii wù vyanɲã bǝ̃ǝ̃daagu nǝ̃ kwal'n ɲinɲã nã̀ã vaa-yǝ nǝ̃ jɔrgɔba, nǝ̃ wu-ń ce wú jãrãã jɔrgɔba nã nã̀ã karaa kwal'n ɲinɲã nã, nǝ̃ curo'n sáá nǝ̃ fãngããgu wù ji ce wú ba byar.

5 Bǝ̃ǝ̃ wo bǝ̃ǝ̃, yisuɔ nǝ̃ bǝ̃ǝ̃nã, wù yáá wu-ń ce wú ba wù vĩɛ̃ pĩɛ̃ndiitãnflaga sǝ̃ǝ̃nã nǝ̃ tãnsǝrɩ nã, wù kaasǝraa nã̀ã ba wù kɔsuɔ wù hla nã nǝ̃ tɩntrãga.

6 Wú maa ǹ-da Yesuw halbaa, wú sɔ̃ ǹ-juo kuulǝǝ wù yigagɩ nã.

7 Nã̀ã fǝ̃ǝ̃ ǹ-hiil wù yalli ǹ-waa wà: «Yesu, Drɔ-Dũnnũ Bíɛ́, danii ń ba ǹ dii ǹ nũɔ̃gu yì cɔ̃mmã nã?

Mǝ̃̀ jiɛriɛ jiɛriɛ nǝ̃-n-i, ne Dũnnũw, báa kãnnã-m.»

8 Sulammã nã, Yesuẁ yáá wùu waa nǝ̃ tãntũɔ̃ wà: «Hlǝ biɛ wáá nã, yuflǝbɩblayǝ yíì!»

9 Yesuẃ fǝ̃ǝ̃ ǹ-yugu-yǝ wà: «Ǹ yiir-i danii?»

Wú siɛ Yesuw wà: «Mǝ̃̀ yir-i “Cin”, nã̀ã wa sulammã nã, tãntɔ̃nããcin-i dìɛ nǝ̃-m.»

10 Nã̀ã ba wù jiɛriɛ nǝ̃-yǝ wà wu ce kukuɔya nǝ̃ wu báa ɲǝ̃ǝ̃ ǹ-hiil-ba gɩ̀ yiɛgɩ nã.

11 Pyariɛ'n huɔdagǝ plǝ, gɩ̀ yáá dàa gɩ̀ sùɔ́gɩ nã, gɩ̀ wuuraa tãnũũgɩ nã.

12 Tãntɔ̃nããbá fǝ̃ǝ̃ ǹ-ba bà jiɛriɛ nǝ̃ Yesuw wà: «Tĩɛ̃ yí kãã jãn pyariɛ báà nã.»

13 Yesuẃ hũɔ̃-dǝ bà saa.

Tãntɔ̃nããbá hlǝ biɛw nã, ǹ-kãã jãn pyariɛba nã.

Bà min bá joraa ǹ-hlǝ tãnũũ'n yuugɩ nã, ǹ-sɔ̃ ǹ-kãã duruu ǹ-jãn lwaakɩnkandɩ nã, ǹ-ɲũɔ̃ hũmmã ǹ-kurǝǝ.

Bà yáá bà ji hi toyur tũndii (2 000) tuugu.

14 Wanciinããbá sɔ̃ ǹ-kwar ǹ-kãã taa dɩ̀ min ǹ-ja lǝ'n cwaaba, nǝ̃ kuɔyaga nã.

Cwaabá fǝ̃ǝ̃ ǹ-hlǝ ǹ-kãã ne dìí nǝ̃n cíé.

15 Bá kãã hi Yesuẁ yáá gùú sùɔ́gu, ǹ-da biɛw mãã tãntɔ̃nããcindɩ̀ yáá wù nã, yà jiraa kuulanãmba wù cãndɩ nã, wù yigagùu kaalaa lɩgǝlɩgǝ.

Gbǝrsǝrɩ́ blǝ-ba.

16 Bàá mãã dɩ̀ cíé bà yinɲã nã, dìí nǝ̃n híí biɛ wáà bá nǝ̃ pyariɛ báà, bá taa-dǝ ǹ-ja-ba dɩ̀ cíé nĩĩguu mãã.

17 Gɩ̀-i cwaabá fǝ̃ǝ̃ ǹ-du nã ǹ-ba bà jiɛriɛ nǝ̃ Yesuw wà wu hlǝ bà yiɛgu.

18 Yesuẁ gáa ba wù jãn viigǝgɩ nã, biɛw mãã tãntɔ̃nããbà yáá wù nã, wú ba wù jiɛriɛ nǝ̃ Yesuw wà wu ya wú kã bá ba bà min.

19 Yesuẁ sáa hũɔ̃-dǝ, nǝ̃ wù wáalá nǝ̃-yǝ wà: «Yitiiẁ cíé gùú cɔ̃ngǝ̃ngãmmã mãã ǹ-hã-n, maar ń kũũ ɲì bluuba nã n ga taa-dǝ ń ja-ba, wù sṹɔ̃́ ǹ hujãndi nĩĩguu mãã.»

20 Yesuẁ cíé gùú cɔ̃ngǝ̃ngãmmãã mãã ǹ-hã biɛ wáàw, wú fǝ̃ǝ̃ ǹ-ta ǹ-kãã ba wù waa-mã wù ja cwaaba Dekapol yiɛgu^a.

Cwaaba min mãã bà nṹɔ̃́-dǝ, dɩ́ tugulǝǝ bà nã.

Yesuẁ gbǝ̃ǝ̃ huulaagu nǝ̃ kuugɩ nã

(Mãtiyew 9.18-26 ; Lukaw 8.40-56)

21 Yesuẁ gáa tuu viigǝgu, wú ver ǹ-huɔl ǹ-jo lwaakɩnkan'n bɩmblaagɩ nã.

cohuɔdaagɩ́ juo tɩgii ǹ-caliɛ wù nã lwaakɩnkan'n nũɔ̃gɩ nã.

22 Gɩ̀ sùɔ́'n Yahudyaba tɩgim'n duu'n yuuntiidiɛẁ yáá dàa bà be-yǝ wa Saarisɩ, wù gáa juo da Yesuw, wú juo duruu wù vyanɲãã taara,

23 nã̀ã ba wù jiɛriɛ wù waa nǝ̃-yǝ wà wú ce kukuɔya.

Wù yáá wù waa wà: «Mǝ̃̀ bisãblɩẃ nàa dɩ̀ wu dɩ̀ hũɔ̃ nũgɔ, jo ń piɛ ǹ nãkrɔnɲã wù nã ń ce wú buɔ ǹ-ba nũmǝ̃nãw.»

24 Yesuẃ fǝ̃ǝ̃ ǹ-kã bá ta nǝ̃-yǝ, nǝ̃ cohuɔdaagɩ́ ba gɩ̀ yáá gɩ̀ duu wù nã, nã̀ã ba gɩ̀ juuraa wù nã yanɲã min.

25 Cijaldiɛẁ yáá dàa gɩ̀ sùɔ́gɩ nã, wù twammã̀ tṹnṹũ fuwɔ bii nũɔ̃sɔ̃ nǝ̃ gà hǝ̃ǝ̃l.

26 Cijal wáà ywárrá tãntaacin'n saa tãciegɩ nã, ǹ-bǝ̃ǝ̃lǝ̃ǝ̃ wù nãkruɔgɩ min nã nǝ̃ dɩdǝ̃ǝ̃m'n sáa fǝ̃ǝ̃, kuu yáá gɩ̀ piɛ nã gɩ̀ maar.

27 Wù gáa nɔ̃ Yesu cɔ̃mmã nã, wú ta wù furũnyiɛgu cohuɔgu sǝ̃ǝ̃nã, ǹ-juo jĩɛ̃ wù kuulaa nã.

28 Nã̀ã wa wù yáá wù waa nǝ̃ wù hla wà: «Mǝ̃-ń da ǹ-gbǝ̃ǝ̃ ǹ-jĩɛ̃ wù kuulanãmbaa dɩndɩn nã, mǝ̃̀ ji buɔ.»

29 Gùú bǝ̃ǝ̃gɩ dɩngu dàa, wù twammã́ hiraa, wú fǝ̃ǝ̃ wù cãndɩ nã wà wù hlɔmmã búɔlá.

30 Gùú bǝ̃ǝ̃gɩ dɩnguu dàa Yesuẃ da wà fãngããdaagɩ hlǝ́rá wù nã.

Wú yiil ǹ-ne cohuɔgu sǝ̃ǝ̃nã nã̀ã yugu-ba wà: «Halii jĩ́ɛ̃lã́ mǝ̃̀ kuulanãmba nã?»

31 Wù duunãtaabá fǝ̃ǝ̃ ǹ-siɛ-yǝ wà: «Ń ba ǹ da cocindɩ̀ juuraa ǹ nã yanɲã min nnĩĩw, nã̀ã ba ǹ yugu wà halii jĩ́ɛ̃lã́ ǹ nã.»

32 Nǝ̃ Yesuẃ ba wù ne wù caliɛ wù hla nã ǹ-da fǝ̃ǝ̃ gùú tii nǝ̃n cíé-dǝ.

33 Cijalẁ gáa da dìí nǝ̃n híí-yǝ, gbǝrsǝrɩ́ blǝ-yǝ wú ba wù ɲãnãã, ǹ-juo duruu ǹ-kuulǝǝ Yesu vyanɲã taara nã̀ã waa sulammã min nǝ̃-yǝ.

34 Yesuẃ fǝ̃ǝ̃ ǹ-waa nǝ̃-yǝ wà: «Mã́ã bisĩɛ̃, ǹ hũɔ̃mã̀ kórrá-n.

Maar hyasɩrãgǝgɩ nã, Dũnnũẃ ya ǹ hlɔmmã́ buɔ.»

35 Yesuẁ bla wù waa dɩ̀-lǝ, cwaabá hlǝ gɩ̀ sùɔ́'n Yahudyaba tɩgim'n duu'n yuuntii Saarisɩ suɔgu, ǹ-juo waa nǝ̃-yǝ wà: «Ǹ bisĩɛ̃ẁ kúú, ǹ ywar kaltiiw hamã nã-ì?»

36 Nǝ̃ Yesuẁ sáa nɔ̃ ǹ-hã-ba, wú waa nǝ̃ Yahudyaba tɩgim'n duu'n yuuntiiw wà: «Báa sɔ̃ cɔ̃m nã, yíi hũɔ̃ mǝ̃̀ cɔ̃mmã dɩndɩn.»

37 Wù sáa ya curoẃ duu wù nã nã́ã́ Piɛrba nǝ̃ Yakubaw bá nǝ̃ wù hǝ̃ǝ̃ Yuhanã sǝ.

38 Bà gáa hi Yahudyaba tɩgim'n duu'n yuuntii'n suɔgu, Yesuẃ da cocindarǝ, dìi gaala nã nǝ̃ bà min bàa piɛ bà nãkrɔnɲã bà yunɲã nã, bà kaalaa bolbol.

39 Wú jãn, nã̀ã waa nǝ̃-ba wà: «Bii cíé ɲí ba ɲĩ̀ĩ gaala nã, nã̀ã ba kaaluu gúɔ̀ tuugɩ nã, tãnkuurẁ sáa ku sǝ, wù duɔsǝ duɔsǝ-i.»

40 Bá fǝ̃ǝ̃ ǹ-ba bà hiil Yesu kwãmmã nã.

Yesuẃ ɲǝ̃ǝ̃ ǹ-hiil bà min taasǝ̃ǝ̃nǝ̃ǝ̃gu, nã̀ã jãn nǝ̃ tãnkuur'n tǝw nǝ̃ wù ɲũw nǝ̃ bàá nǝ̃n yáá bàa duu wù nã ǹ-kã bisĩɛ̃'n duugɩ nã.

41 Wú kãã blǝ bisĩɛ̃'n nãkruɔgu nã̀ã waa nǝ̃-yǝ Hebru tammã nã wà: «Talita kũm», dɩ̀ yuugɩ-i wà: «Bisãblɩ yíì, mǝ̃̀ ja yíi-i, suro».

42 Gùú bǝ̃ǝ̃gɩ dɩngu dàa, bisãblɩẃ suro ǹ-ba wù wáà wù ta.

Nã̀ã wa wù yáá nǝ̃ bii nũɔ̃sɔ̃ nǝ̃ gà hǝ̃ǝ̃l-i.

Dɩ́ paa ǹ-tugulǝǝ bà min nã ǹ-ji maa gɩ̀ sùɔ́gu.

43 Yesuẃ mǝ̃gaa ǹ-waa dɩ́ gbǝ̃ǝ̃ nǝ̃-ba wà ba báa ya curoẃ fǝ̃ǝ̃ dɩ̀ nã.

Nã̀ã fǝ̃ǝ̃ ǹ-ce bá hã bisãblɩw nǝ̃ wuuri.