Lukaw 4

Sɩtãnẁ wa wù vuuraa ǹ-blǝ Yesuw

Dũnnũ Yuflǝẁ mãã wù bla Yesuw nã, wú ta wù yigagɩ nã, ǹ-hlǝ nǝ̃-yǝ Surdɛ̃ lwaa'n nũɔ̃gɩ nã, ǹ-kã nǝ̃-yǝ jerkwaarɩ nã.

2 Bãn gwaahǝ̃ǝ̃l kusuugɩ nã, tiilǝtiiẃ kãã ba wa wu dǝ̃ǝ̃ Yesuw.

Yesuẁ sáa wuu kuu, gɩ̀ bãn'n kusuugɩ nã.

Gɩ̀ bãn'n furũũgɩ nã, nũmmã́ fǝ̃ǝ̃ ǹ-jaa-yǝ.

3 Gùú nã-i, tiilǝtiiẃ waa nǝ̃-yǝ wà: «Nǝ̃-ń ba Dũnnũ Bíɛ́ nǝ̃n ba, ce tɩntãn díɛ̀dɩ́ cin burblɩri yí ne.»

4 Yesuẃ siɛ-yǝ wà: «Dɩ̀ yállá wà: “Wuur'n kuu dɩndɩn sǝ̃n val curow.”»

5 Dɩ̀ furũũgɩ nã, tiilǝtiiẃ mǝ̃gaa ǹ-yuguraa nǝ̃-yǝ drɔgu, ǹ-kãã ce wú jã ǹ-da cuu wáà yuuntasǝrɩ min,

6-7 nã̀ã fǝ̃ǝ̃ ǹ-waa nǝ̃-yǝ wà: «Nǝ̃-ń kuulǝǝ ǹ-bũũ-m, mǝ̃̀ hã-n nǝ̃ cuu wáà, yuuntasǝrɩ̀ min, nǝ̃ wù kusunɲããfɩnfanɲã min.

Bà hlã mã́ã-i nǝ̃ ɲã̀ min min.

Nǝ̃ gùú tiiw nǝ̃n dwal mã́ã yo mǝ̃̀ nã, mǝ̃̀ ji gbǝ̃ǝ̃ ǹ-hã-yǝ nǝ̃-ɲã.»

8 Yesuẃ siɛ-yǝ wà: «Dɩ̀ yállá wà: “Ǹ saa ń kuulǝǝ ǹ bũũ Yitii Dũnnũ dɩndɩn-i, nã̀ã ba ǹ nɔ̃ ǹ-hã-yǝ.”»

9 Wú fǝ̃ǝ̃ ǹ-kã nǝ̃ Yesuw Serusalɛmgu, ǹ-kãã piɛ-yǝ Dũnnũ bũũduu'n yuugɩ nã, nã̀ã waa nǝ̃-yǝ wà: «Nǝ̃-ń ba Dũnnũ Bíɛ́ nǝ̃n ba, sãl nhlíɛ̀ yí ne,

10 dɩ̀ mãã dɩ̀ yállá wà: “Dũnnũẁ ga tĩɛ̃ wù mɛlɛgɛbá juo cii ǹ nã.”

11 Nã̀ã yal hlo wà: “Bà ga jã ǹ-blǝ-n nǝ̃ bà nãkrɔnɲã, ǹ viɛgɩ báa juu tɩntãn yo.”»

12 Yesuẃ fǝ̃ǝ̃ ǹ-siɛ-yǝ wà: «Bá nàa bàa yal wà: “Ǹ sǝ̃n saa ń dǝ̃ǝ̃ Yitii Dũnnũw ǹ-ne.”»

13 Tiilǝtiiẁ gáa vuu Yesuw ǹ-ji naa, wú fǝ̃ǝ̃ ǹ-ta ǹ-hal wù nã, fuwɔ, nã̀ã ba wù cii bǝ̃ǝ̃dagǝ.

Yesu mããcem'n dulli Galile yiɛgu

(Mãtiyew 4.12-17 ; Markaw 1.14-15)

14 Yesuẃ ver ǹ-kã Galile yiɛgu, nǝ̃ Dũnnũ Yuflǝ fãngããgu.

Wù yiirɩ́ ba dɩ̀ hlǝ gɩ̀ sùɔ́gɩ nã.

15 Wù yáá wù kal cwaaba nǝ̃ Dũnnũ cãwandi, Yahudyaba tɩgim'n donɲã nã.

Cwaaba min, bá ba bà be wù yirfɩnfaari.

Nasarɛtɩ lǝntaabà hla Yesuw

(Mãtiyew 13.53-58 ; Markaw 6.1-6)

16 Yuudagǝ, Yesuẃ juo kã Nasarɛtɩ lǝri, wù vǝ̃́ǝ̃lã́ gùú sùɔ́guu mãã.

Yahudyaba fiisaa'n yuugu, wú kãã jãn Yahudyaba tɩgim'n duugɩ nã, nã́ã́ wù yáá wù ce-dǝ fufodii gùú tammã.

Wú kãã suro ǹ-hiraa, wa wú kal Dũnnũ cãwan'n sɛbɛw.

17 Bá tuu Dũnnũ tanhiil Esayi sɛbɛw ǹ-hã-yǝ, wú hũɔ̃ ǹ-ba wù cugur-yǝ, ǹ-kãã hi gùú sùɔ́guu mãã bàa yal wà:

18 «Yitii'n Yuflǝẃ nǝ̃ mǝ̃n nã, wù híilá-m wà mǝ̃́ waa cɔ̃ndudwalɩmmã nǝ̃ kokwaaba.

Wù tĩ́ɛ̃lã́-m wà mǝ̃́ juo waa lwɛ'n hiilɩm'n cɔ̃mmã wasǝrɩ nã, nã̀ã cugur yɩrnǝ̃ǝ̃'n yinɲã, nã̀ã hiil ywartaaba ywaruugɩ nã,

19 nã̀ã waa Yitii'n hujãn'n blɩ'n cɔ̃mmã.»

20 Wú ba wù kal gɩ̀ sùɔ́gu wù ja cwaaba, wù gáa kal-gǝ ǹ-tã, wú fǝ̃ǝ̃ ǹ-pĩĩ sɛbɛw, ǹ-hã wù blǝtiiw nǝ̃-yǝ, nã̀ã jiraa.

Cwaaba min min, bá ba bà ne-yǝ.

21 Gùú nã-i, wú fǝ̃ǝ̃ ǹ-ba wù waa nǝ̃-ba wà: «Ɲimãã mãã ɲì nṹɔ̃́ Dũnnũ cãwan'n sɛbɛbà cãwan díɛ̀, dɩ̀ súulǝ́ ɲimãã saa ǹ-tã jimããgu.»

22 Gùú cãwaadudwaliɛgaa mãã gà yáá gà hlǝ wù nũɔ̃gɩ nã, gá tugulǝǝ cwaaba nã, fuwɔ, bá ba bà ne-yǝ, nã̀ã fǝ̃ǝ̃ ǹ-ba bà yugu bà ɲĩɛ̃ wà: «Yisefu bíɛ́ sǝ-ì?»

23 Yesuẃ waa nǝ̃-ba wà: «Mǝ̃̀ fǝ̃́ǝ̃lã́ wà ɲi ji waa cãwaadũũm mã́ã̀ nǝ̃-m, wà tãntiiw buɔ wù hla-i haasǝ.

Nã̀ã waa nǝ̃-m, wà mǝ̃ cíé gàá mãã Kapɛrnã lǝri, wà mǝ̃́ ce gà tuugu mǝ̃̀ lǝri nhlíɛ̀, ɲí ne.»

24 Nã̀ã fǝ̃ǝ̃ ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: Dũnnũ tanhiilw mãã wù hlǝ gùú lǝrii mãã, gɩ̀ lǝntaabà sǝ̃n nɔ̃ bà hã-yǝ.

25 Mǝ̃̀ waa sulam-i nǝ̃-ɲã́ã̀: duɔgɩ̀ yáá gùu hla nɔ̃lli gùú nã mãã, Dũnnũ tanhiil Eli bǝ̃ǝ̃gu, biiga siɛlgaa nǝ̃ hyarsǝ nãndienw, nǝ̃ nũmmã́ jãn cuuw nã, blakuucanããbà yáá dàa piyɛ̃ Isɩrayɛl yiɛgu!

26 Nǝ̃ Dũnnũẁ sáa tĩɛ̃ Eli curo nãã, bà-lǝ bà min sǝ̃ǝ̃nã.

Nã̀ã tĩɛ̃-yǝ blakuuciɛw nãã, wùú mãã wù yáá Sarɛpɩta lǝri, Sidɔ̃ yiɛgu.

27 Sǝ̃nkũnãã yo, bà yáá dàa piyɛ̃ Isɩrayɛl yiɛgu, Dũnnũ tanhiil Elise bǝ̃ǝ̃gu.

Nǝ̃ wù sáa ce wù dɩn yo wú buɔ, fuwɔ Siirii yiɛntabiɛ mãã bà be-yǝ wà Nãmãã, nǝ̃ wù dɩn.»

28 Wù gáa waa gɩ̀-lǝ gɩ̀ cãwanĩɛ̃ga ǹ-tã, Yahudyabaa nǝ̃n yáá dàa tɩgim'n duugɩ nã, bà min bà hiɛgá dũ.

29 Bá suro ǹ-blǝ ǹ-juu ǹ-hiil-yǝ taasǝ̃ǝ̃nǝ̃ǝ̃gu.

Bà mlã Nasarɛtɩ lǝri gùú tãnũũgu drɔ, bá fa ǹ-kã nǝ̃-yǝ gɩ̀ gbɩgaagɩ nã, wà ba kãã juu ǹ-dii-yǝ jũɔ̃gɩ nã,

30 nǝ̃ wú kãã jãn ǹ-hlǝ bà sǝ̃ǝ̃nã, ǹ-ta.

Biɛw mãã nǝ̃ tãntɔ̃nããba

(Markaw 1.21-28)

31 Yesuẃ kãã maar Kapɛrnã lǝri, Galile yiɛ'n lǝdarǝ-i, ǹ-kãã ba wù kal cwaaba, Yahudyaba fiisaa'n yuugu.

32 Wù yáá wù kal cwaaba nǝ̃ fãngããgu, gùú yáá gùu ce wù cãwanĩɛ̃gá ba gà yáá gà tugulǝǝ cwaaba nã ǹ-car.

33 Gɩ̀-lǝ gɩ̀ Yahudyaba tɩgim'n duugɩ nã, tãntũɔ̃ẁ yáá biɛdiɛ nã, gɩ̀ biɛẃ dii ǹ-nãlĩɛ̃ wà:

34 «Nasarɛtɩ lǝntaa'n Yesu, danii ń ba ǹ dii ǹ nũɔ̃gu yì cɔ̃mmã nã, dàa, ǹ júó ǹ ji bǝ̃ǝ̃lǝ̃ǝ̃ yì nã-ì?

Yi fǝ̃́ǝ̃lã́ wà Dũnnũw níé ǹ-hiil yíi-i, ǹ-tĩɛ̃-n!»

35 Yesuẃ nãlĩɛ̃ tãntũɔ̃ wáá nã wà: «Suu ǹ nũɔ̃gɩ nã, nǝ̃ ń hlǝ biɛ wáá nã!»

Gɩ̀ tãntũɔ̃ẃ huɔ biɛw ǹ-nǝ̃ǝ̃-yǝ ɲũũrũũgu cwaaba sǝ̃ǝ̃nã, nã̀ã hlǝ wù nã, wù sáa ce-yǝ nǝ̃ kuu.

36 Bà min bà kusunɲã́ cu, bá ba bà waa nǝ̃-ba ɲĩɛ̃ wà: «Bincɔ̃m'n plǝ-ì nĩĩguu?

Wu-ń ce wù nãlĩɛ̃ nǝ̃ tãntɔ̃nããba fãngããgɩ nã, bá ba bà hlǝ.»

37 Gɩ̀-lǝ gɩ̀ nã, Yesu yiirɩ́ ba dɩ̀ hlǝ dɩ̀ maar sɔnɲã min.

Yesuẁ ba wù buɔ hlɔnããcin

(Mãtiyew 8.14-17 ; Markaw 1.29-34)

38 Yesuẁ gáa hlǝ Yahudyaba tɩgim'n duugɩ nã, wú ta ǹ-kã Simɔ̃ suɔgu, ǹ-kãã hi Simɔ̃ curɔcijalẁ jaa, wù cãndìi huulaa.

Bá cirǝ̃ǝ̃ Yesuw nã, wà wú pɛ bà nã.

39 Yesuẃ juo fiɛriɛ hlɔnĩĩ'n yuugɩ nã, nã̀ã nãlĩɛ̃ hlɔmmã nã, mã́ fǝ̃ǝ̃ ǹ-hlǝ wù nã.

Hlɔnĩĩẃ paa ǹ-suro, ǹ-hĩɛ̃ ǹ-hã-ba, ǹ-ce bà norsǝri.

40 Bǝ̃ǝ̃'n jãnɩmmã nã, curo wo curo mãã wù yáá nǝ̃ hlɔnĩĩw, wú tuu-yǝ, ǹ-jo nǝ̃-yǝ Yesuw nãã.

Wú piɛ wù nãkruɔgu hlɔnããba min drɔ, bá buɔraa ǹ-baal.

41 Tãntɔ̃nããbá hlǝ hlɔnããcin nã, ǹ-ba bà kaasǝraa bà waa wà: «Yíi-i Dũnnũ Bíɛ́w.»

Bà-lǝ bà mãã bà yáá bàa fǝ̃ǝ̃ wà Yesu wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wú nãlĩɛ̃ bà nã, wà bá suu bà nɔ̃nɲã nã.

Yesuẁ waa Dũnnũ cãwandi Yahudyaba yiɛgu wù waaraa

(Markaw 1.35-39)

42 Taagà gáa kaalaa, Yesuẃ hlǝ lǝrɩ nã, ǹ-ta ǹ-kãã ba jerkwaardarǝ nã.

Cocindaarɩ́ ba dɩ̀ caa-yǝ.

Bà gáa da-yǝ, bá ba bà caa bá blǝ wù nã, wu báa ji ta yiɛdagǝ.

43 Gɩ̀-lǝ gɩ̀ nã, Yesuẃ fǝ̃ǝ̃ ǹ-waa nǝ̃-ba wà: «Mǝ̃̀ saa mǝ̃́ tu Dũnnũ yuuntasǝ'n cɔ̃ndudwalɩmmã liɛ'n dɩgaliɛ yo wú nɔ̃.

Dũnnũẁ tĩ́ɛ̃lã́-m mã̀ã́ nã-i.»

44 Nã̀ã fǝ̃ǝ̃ ǹ-ba wù waa Dũnnũ cãwandi wù ja cwaaba, wù waaraa Yahudyaba tɩgim'n donɲã nã Suude yiɛgu.