Lukaw 5

Yesuẁ be wù duunãtaadĩɛ̃lããba

Yuudagǝ, Yesuẁ yáá wùu hiraa Senisarɛtɩ lwaakɩnkan'n nũɔ̃gɩ nã, nǝ̃ cocindɩ́ juo tǝ̃ǝ̃lǝ̃ǝ̃ wù nã, ǹ-ba bà nɔ̃ Dũnnũ cãwandi.

2 Yesuẃ da viinɲã hǝ̃ǝ̃ldaɲã bɩmblaagɩ nã, tɩtoblǝraabàa hlǝ ɲã̀ nã, ǹ-ba bà saar bà jirãnɲã.

3 Wú jãn Simɔ̃ viigǝgu kusunã, nã̀ã waa nǝ̃-yǝ: «Vã ń hal bɩmblaagɩ nã fiyãã!»

Nã̀ã fǝ̃ǝ̃ ǹ-jiraa gɩ̀ kusunã, ǹ-ba wù kal cocin díɛ̀.

4 Wù gáa wanãã ǹ-tã, wú waa nǝ̃ Simɔ̃w wà: «Vã ń kã blɩrɩ nã, nǝ̃ ɲí nǝ̃ǝ̃ jirãnɲã, ɲí nǝ̃ ǹ nãbɩgaaba, ɲí blǝ tɩtraaba!»

5 Simɔ̃ẃ siɛ-yǝ wà: «Yigantii, yi ywárrá taaga ji kaal, yi sáa gbǝ̃ǝ̃ ǹ-blǝ kuu.

Nǝ̃ ǹ mãã wà yí nǝ̃ǝ̃ jirãnɲã, yi ji nǝ̃ǝ̃-ɲã.»

6 Bà gáa nǝ̃ǝ̃-ɲã, bá blǝ tɩtocindarǝ fuwɔ bà jirãnɲã́ ba ɲã̀ caa ɲã́ jãrãã.

7 Bá hǝ̃gãã bà nãbɩgaabaa mãã bà yáá viigǝdaagɩ nã, wà bá juo pɛ bà nã.

Bá jo, ǹ-juo haal tɩtraaba, ǹ-dii viinɲã hǝ̃ǝ̃lɲã min ɲã́ yurǝǝ, ǹ-ba ɲã̀ caa ɲã́ nĩĩrǝ̃ǝ̃.

8 Simɔ̃ Piɛrẁ gáa da dɩ̀-lǝ, wú duruu ǹ-kuulǝǝ Yesu vyanɲã taara, nã̀ã waa nǝ̃-yǝ wà: «Yitii, báa kuganãã mǝ̃̀ nã, mã́ã̀, diicĩɛ̃rǝntii nǝ̃-m.»

9 Simɔ̃w, bá nǝ̃ wù nãbɩgaaba min, bà kusunɲã́ gaala nã, gbǝrsǝrɩ́ blǝ-ba dugɔ, tɩtocin díɛ̀ dɩ̀ blǝm'n cɔ̃mmã nã.

10 Simɔ̃w mãã wù ce mããcemmã nǝ̃ Sebede tãnkuuraabaa mãã, Yakubaw, bá nǝ̃ Yuhanãw, gbǝrsǝrɩ́ blǝ bàá yo.

Yesuẃ waa nǝ̃ Simɔ̃w wà: «Báa sɔ̃ cɔ̃m nã, díɛ̀dɩ furũũgɩ nã, ǹ ji ba ǹ caa cwaa-i.»

11 Gɩ̀-i, bá fǝ̃ǝ̃ ǹ-yuguraa nǝ̃ bà viinɲã bɩmblaagɩ nã, ǹ-nǝ̃nǝ̃ǝ̃ bà cɔ̃mmã min nã, nã̀ã ba bà duu Yesuw nã.

Yesuẁ buɔ sǝ̃nkũnĩĩdiɛ

(Mãtiyew 8.1-4 ; Markaw 1.40-45)

12 Yuudagǝ, Yesuẃ kãã ba lǝdarǝ nã.

Biɛdiɛẁ yáá dàa gɩ̀ lǝrɩ nã, sǝ̃nkũnsǝrìi bǝ̃ǝ̃lǝ̃ǝ̃ wù nã.

Wù gáa da Yesuw, wú juo duruu ǹ-curǝǝ, nã̀ã ba wù jiɛriɛ nǝ̃-yǝ wà: «Yitii, gɩ-ń dwal ǹ nã, ǹ ji gbǝ̃ǝ̃ ǹ-per ǹ-hiil hlɔm mã́ã̀ mǝ̃̀ nã.»

13 Yesuẃ fɩraa wù nãkruɔgɩ nã, ǹ-jĩɛ̃ wù nã, nã̀ã waa nǝ̃-yǝ wà: «Gɩ̀ dwállá mǝ̃̀ nã, mǝ̃̀ pérrá ǹ-hiil hlɔm mã́ã̀ ǹ nã!»

Gùú bǝ̃ǝ̃gɩ dɩngu dàa, sǝ̃nkũnsǝrɩ́ paa ǹ-hlǝ wù nã.

14 Wú fǝ̃ǝ̃ ǹ-ɲǝ̃ǝ̃-yǝ wà: «Báa ce ń waa-dǝ nǝ̃ curo, nǝ̃ ń kã Yahudyaba puruɔntaaba nãã, ba ga ne-n.

Nǝ̃ gùú mãã gɩ̀ saa gɩ́ bũũ Dũnnũw Musaẁ kárrá gɩ̀ cɔ̃mmã wù hlũũgɩ nã, ǹ-ba wù per cwaaba nã, ń kã nǝ̃-gǝ, ǹ-da ǹ-pɩgaa cwaaba wà n búɔlá.»

15 Kuugɩ́ hla nã̀ã ba gɩ̀ piɛ Yesu yir'n hlǝmmã nã.

Cohuɔgɩ́ ba gɩ̀ tɩgii gɩ̀ nɔ̃ wù cãwanĩɛ̃ga, nã̀ã ba bà ce wú ba wù buɔ bà hlɔmmã.

16 Nǝ̃ wú ba wu-ń ce wú hla, nã̀ã maar jierɩ nã nǝ̃ wù dɩn, ǹ-kãã ba wù cirǝ̃ǝ̃ Dũnnũw nã.

Yesuẁ ce wuulbiɛdiɛẃ suro ǹ-waa, nã̀ã pyar wù gaacĩɛ̃yaga wù yuunã

(Mãtiyew 9.1-8 ; Markaw 2.1-12)

17 Yuudagǝ, wù yáá wù kal cwaaba.

Farisĩɛ̃ba nǝ̃ Musa hlũũ'n yuntaa yo, bà yáá dàa.

Bà yáá bàa hlǝ Galile yiɛ'n liɛga, nǝ̃ Suude yiɛ'n liɛga nã, badaabá hlǝ Serusalɛmgu.

Gɩ̀-lǝ gɩ̀ nã, Yitii'n fãngããgɩ́ ba Yesuw nã, wú ba wù buɔ hlɔnããba.

18 Cwaadaabá juo hillaa bàa tuu wuulbiɛdiɛ, guumǝ̃rãkuugu drɔ.

Bà yáá bà caa bá jãn duugɩ nã, ǹ-kã nǝ̃-yǝ Yesuw nãã.

19 Nǝ̃ cocindɩ mãã dɩ̀ yáá dìi suu wù nã, bà sáa da bà mãã bà ji ta nĩĩgu, nã̀ã kuganãã wù nã.

Gɩ̀-i bá fǝ̃ǝ̃ ǹ-yugo bɩrduu gúɔ̀gɩ yuugɩ nã, ǹ-ya-gǝ, nã̀ã fǝ̃ǝ̃ ǹ-nũũ wù guumǝ̃rãkuugu, ǹ-hɩr-yǝ, ǹ-juo kra wù nã, cwaa'n sǝ̃ǝ̃gɩ nã, Yesu yigagɩ nã.

20 Yesuẁ gáa da bà hũɔ̃mãã, wú waa nǝ̃ hlɔnĩĩw wà: «Ǹ gaacĩɛ̃yagà pyárrá ǹ yuunã.»

21 Musa hlũũ'n yuntaaba nǝ̃ Farisĩɛ̃bá ba bà hugɔ̃nãã nǝ̃ bà ɲĩɛ̃ wà: «Halii nǝ̃ wáà-lǝ, nǝ̃ wú ba wù waa wù jãn Dũnnũw nã gɩ̀-lǝ gɩ̀ tammã?

Halii ji gbǝ̃ǝ̃ ǹ-pyar curo'n gaacĩɛ̃yaga wù yuunã, nã́ã́ Dũnnũ sǝ nǝ̃ wù dɩn?»

22 Yesuẃ paa ǹ-fǝ̃ǝ̃ dìí mãã bà kusunɲã nã, wú waa nǝ̃-ba wà: «Danii ɲí ba ɲì kãn gɩ̀-lǝ gɩ̀ tammã?

23 “Ǹ gaacĩɛ̃yagà pyárrá ǹ yuunã,” nǝ̃, “Suro ń wáà,” hadi waam dwállà nã?

24 Mǝ̃̀ caa ɲí fǝ̃ǝ̃ wà Curonbiɛw ji gbǝ̃ǝ̃ ǹ-pyar gaacĩɛ̃yaga cwaa'n yunɲã nã, cuu wáá nã.»

Nã̀ã fǝ̃ǝ̃ ǹ-waa nǝ̃ wuulw wà: «Nǝ̃ yíǹ-lǝ, suro ń tuu ǹ guumǝ̃rãkuugu, ń maar ń kũũ.»

25 Gùú bǝ̃ǝ̃gɩ dɩngu dàa, biɛẃ suro cwaaba min yinɲã nã, ǹ-tuu bà mãã bà yáá bàa mǝ̃rǝ̃ǝ̃-yǝ gùú guumǝ̃rãkuugɩ nã, ǹ-ba wù bũũ Dũnnũw wù maar wù kũũ.

26 Dɩ́ tugulǝǝ bà min nã.

Bá ba bà bũũ Dũnnũw nǝ̃ gbǝrsǝrɩ min, nã̀ã ba bà waa wà: «Yi díɛ́ cɔ̃nnurom jimããgu!»

Yesuẁ be Leviẃ ba wù duu wù nã

(Mãtiyew 9.9-13 ; Markaw 2.13-17)

27 Gɩ̀ furũũgɩ nã, Yesuẃ hlǝ taasǝ̃ǝ̃nǝ̃ǝ̃gu ǹ-kãã da nãnhũɔ̃rdiɛ, bà be-yǝ wà Levi, yà jiraa nãnhũɔ̃suɔgɩ nã.

Yesuẃ waa nǝ̃-yǝ wà: «Duu mǝ̃̀ nã!»

28 Leviẃ suro ǹ-nǝ̃nǝ̃ǝ̃ wù cɔ̃mmã min nã, nã̀ã ba wù duu wù nã.

29 Nã̀ã fǝ̃ǝ̃ ǹ-kãã hĩɛ̃ wuuri piyɛ̃ wù suɔgu ǹ-hã Yesuw.

Nãnhũɔ̃rãã'n huɔdaagɩ̀ yáá nǝ̃-ba ǹ-pya cwaadaba nã juwuukaagɩ nã.

30 Gɩ̀ sáa dwal Farisĩɛ̃ba, nǝ̃ Musa hlũũ'n Yuntaaba nã.

Bá ba bà hugɔ̃nãã, nã̀ã waa nǝ̃ Yesu duunãtaaba wà: «Danii ɲí ba ɲì wuu, nã̀ã ba ɲì ɲũɔ̃ nǝ̃ nãnhũɔ̃rããba nǝ̃ diicĩɛ̃rǝntaabaa ɲì min?»

31 Yesuẃ siɛ-ba wà: «Bàá mãã hihinǝ̃mntaaba, bà-lǝ bà sǝ̃n caa tãntaaba.

Hlɔnãã cáalà-ba.

32 Bàá mãã bà sṹɔ̃lã́, mǝ̃̀ sáa jo mǝ̃̀ ji be bàá sǝ, nǝ̃ mǝ̃̀ júó diicĩɛ̃rǝntaa'n cɔ̃m nã-i, bá da ǹ-nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu.»

Farisĩɛ̃bà yugu Yesuw nǝ̃ sũũ cɔ̃mmã

(Mãtiyew 9.14-17 ; Markaw 2.18-22)

33 Farisĩɛ̃bá waa nǝ̃ Yesuw wà: «Yuhanã duunãtaaba, nǝ̃ hãmĩĩ yo yì bɩgaabà dii sũũẁ bà gbãlãã, nã̀ã ba bà cirǝ̃ǝ̃ Dũnnũw nã, nǝ̃ yíǹ bɩgaa-lǝ, bá ba bà wuu ɲinɲã, nã̀ã ba bà ɲũɔ̃ ɲããɲũɔ̃nɲã.»

34 Yesuẃ siɛ-ba wà: «Blanĩĩw, ba-ń ba bà min nǝ̃ wù taaraaba cataayuugu, halii ji gbǝ̃ǝ̃ ǹ-ce bá dii sũũw?

Curo'n síì gbǝ̃ǝ̃ ǹ-ce dɩ̀-lǝ!

35 Nǝ̃ bǝ̃ǝ̃daagɩ́ nàa gɩ̀ jo, bà ji hiil blanĩĩẁ bà sǝ̃ǝ̃nã, gɩ̀-lǝ gɩ̀ bãnɲã nã, bà ji ba bà dii sũũw.»

36 Nã̀ã fǝ̃ǝ̃ ǹ-waa cãwaadũũmdamã nǝ̃-ba wà: «Bà sǝ̃n taal kuulaaflãmw ǹ-ɲǝ̃gãr kuulaacũncurɔw nǝ̃ gɩ̀ yiɛgu.

Nǝ̃-ń ce-dǝ yo, ǹ-ji taal wuuflãmw nǝ̃ wù yiɛgɩ̀ sɩga tuu gɩ̀ ɲĩɛ̃ nǝ̃ wuucũncurɔw.

37 Nǝ̃ curo'n sǝ̃n dii ɛrsɛ̃ kwãnsɩrãmmã hũndiibarcũncurɔw nã.

Nǝ̃-ń dii-mã, mã̀ taal barw-i, ɛrsɛ̃ kwãmmã́ tũnũũ, bar yo, wú bǝ̃ǝ̃lǝ̃ǝ̃.

38 Ɛrsɛ̃ kwãnsɩrãmmã̀ saa mã́ dii hũndiibarflãm nã-i!

39 Gùú cíé, curow-ń mĩɛ̃ nǝ̃ ɛrsɛ̃ kwãnvũnvǝ̃ǝ̃mã, wù sǝ̃n caa mããsɩrãmmã hlo, wù waa wà mããvũnvǝ̃ǝ̃m dwállà nã.»