Markaw 1

Markaw

Yesu cɔ̃ndudwalɩmmãã mãã Markaẁ yállá-mã

Dũnnũẁ tĩɛ̃ Yuhanãẃ ba wù ɲĩɛ̃ cwaaba, nã̀ã ba wù kal-ba

(Mãtiyew 3.1-12 ; Lukaw 3.1-18 ; Yuhanãw 1.19-28)

Dũnnũ Bíɛ́ Yesu Kɩrsa cɔ̃ndudwalɩm'n dul-i nnĩĩ.

2 Ǹ-vaa nǝ̃ Dũnnũ tanhiil Esayiẁ yállá dìi wà: «Mǝ̃̀ ji tĩɛ̃ mǝ̃̀ tĩɛ̃tiiẃ ta ǹ yiga nã, wú kãã mǝ̃gaa hlũũgu ǹ-cii-n.

3 Curodiɛẃ^a nàa wùu hiil wù yalli jerkwaarɩ nã wà: Mǝ̃́garà Yitii'n hlũũgu, ɲí sũɔ̃l wù hlũmbiiga, ɲí cii-yǝ!»

4 Yuhanãẃ kãã jo, ǹ-juo ba wù ɲĩɛ̃ cwaaba jerkwaarɩ nã, nã̀ã ba wù waa Dũnnũ cãwandi wù ja-ba wà: «Nǝ̃́nǝ̃̀ǝ̃ ɲì gaacĩɛ̃yaga nã, nǝ̃ ɲí tuu ɲí tu, nǝ̃ ɲí ce bá ɲĩɛ̃-ɲã́ã̀, Dũnnũẃ da ǹ-pyar-ga ɲì yuunã.»

5 Suude yiɛntaaba min nǝ̃ Serusalɛm taaba min bà yáá bà kã wù nãã.

Bà yáá ba-ń ce bá juo hũɔ̃ ǹ-hiraa bà gaacĩɛ̃yaga nã gbaa cwaa'n yinɲã nã, nǝ̃ Yuhanãẃ fǝ̃ǝ̃ ǹ-ɲĩɛ̃-ba Surdɛ̃ lwaa'n hũmmã nã.

6 Kuulaa mãã Yuhanãẁ yáá wù dii-yǝ, bà yáá bàa sɔ̃-yǝ nǝ̃ ɲũgɔ̃mĩĩkwaasǝ-i.

Wu-ń ce wú dii-yǝ nã̀ã vaa-yǝ nǝ̃ cãngbaagu wù nĩɛ̃lɩ nã.

Wù wuurii yáá nǝ̃ jisɔ̃nããba nǝ̃ dafon'n salli.

7 Wù yáá waa Dũnnũ cãwandi wù ja-ba wà: «Wùú mãã wù fãngããgɩ̀ ta mǝ̃n kuugɩ nã, wú nàa wù jo.

Nǝ̃ halle mǝ̃n sáa piɛ wù mããcierw nã, nã̀ã ji wa wùú nǝ̃ wù hla.

8 Mǝ̃n-lǝ, mǝ̃̀ ɲĩɛ̃-ɲã́ã̀ nǝ̃ hũm-i, nǝ̃ wù-lǝ wù ji ɲĩɛ̃-ɲã́ã̀ nǝ̃ Dũnnũ Yuflǝ-i.»

Yesu ɲĩɛ̃mã Yuhanãw saa

(Mãtiyew 3.13–4.11 ; Lukaw 3.21-22 ; 4.1-13)

9 Gɩ̀-lǝ gɩ̀ bãnɲã nã, Yesuẃ hlǝ Nasarɛtɩ lǝri Galile yiɛgu ǹ-kã Yuhanãw nãã.

Yuhanãẃ ɲĩɛ̃-yǝ Surdɛ̃ lwaa'n hũmmã nã.

10 Wù gáa ba wù hlǝ hũmmã nã, gùú bǝ̃ǝ̃gɩ dɩngu dàa, wú da Dũnnũ suɔ'n fierìi ciɛl, nǝ̃ Dũnnũ Yuflǝw yà hlǝ ǹ-ba wù hɩr wù jo nã́ã́ hũɔ̃rũɔ̃-i, ǹ-juo yáà wù drɔ.

11 Yaldaarɩ́ fǝ̃ǝ̃ ǹ-hlǝ drɔkuɔlɩ nã, ǹ-ba dɩ̀ waa wà: «Yíi-i mǝ̃̀ bíɛ́ cituublɩw, yíi dwállà mǝ̃̀ nã.»

12 Gùú bǝ̃ǝ̃gɩ dɩngu dàa, Dũnnũ Yuflǝẃ fǝ̃ǝ̃ ǹ-ce wú ta jerkwaarɩ nã.

13 Bãn gwaahǝ̃ǝ̃l kusuugɩ nã, Sɩtãnẃ kãã ba wa wu dǝ̃ǝ̃ Yesuw.

Yesuẁ yáá nǝ̃ jerbɩganããba-i, nǝ̃ mɛlɛgɛbá ba bà pɛ wù nã.

Yesu duunãtaadĩɛ̃lããba

(Mãtiyew 4.12-22 ; Lukaw 4.14-15 ; 5.1-11)

14 Bà gáa dii Yuhanãw kasoduugɩ nã, gɩ̀-lǝ gɩ̀ furũũgɩ nã, Yesuẃ kãã ba wù waa Dũnnũ cɔ̃ndudwalɩmmã wù ja cwaaba Galile yiɛgu.

15 Wù yáá wù waa wà: «Dũnnũẁ yáá wùu kra gùú bǝ̃ǝ̃gɩ nã mãã, gɩ̀ jáa hi.

Dũnnũ yuuntasǝrɩ̀ píɛlá nã, nǝ̃́nǝ̃̀ǝ̃ ɲì gaacĩɛ̃yaga nã, nǝ̃ ɲí tuu ɲí tu, nǝ̃ ɲí cu cɔ̃ndudwalɩmmã nã.»

16 Yesuẁ gáa ba wù pɛ̃ Galile yiɛ'n lwaakɩnkan'n nũɔ̃gu, wú da tɩtoblǝraadaba bà nǝ̃ǝ̃ jirãnɲã.

Bà yáá cwaaba hǝ̃ǝ̃l-i: Simɔ̃ mãã bà be-yǝ wà Piɛr, bá nǝ̃ wù hǝ̃ǝ̃ Ãndrew.

17 Yesuẃ fǝ̃ǝ̃ ǹ-waa nǝ̃-ba wà: «Bláà ɲì duu mǝ̃̀ nã, mǝ̃̀ ji ce ɲí ba ɲì caa cwaa-i.»

18 Bá paa ǹ-nǝ̃nǝ̃ǝ̃ bà jirãnɲã nã nã̀ã ba bà duu wù nã.

19 Ǹ-ya bá ba bà maar, bà gáa hal fiyãã, Yesuẃ da Sebede byavũnvũɔ̃ Yakubaw, bá nǝ̃ wù hǝ̃ǝ̃ Yuhanãw, bà viigǝgu kusunã, bà mǝ̃gaa bà jirãnɲã,

20 Yesuẃ paa ǹ-be-ba.

Bá ya bà tǝẃ ba dàa viigǝgɩ nã nǝ̃ mããcieraaba, nã̀ã ba bà duu wù nã.

Yesuẁ buɔ tãntɔ̃nããtiiw

(Lukaw 4.31-37)

21 Yesuw nǝ̃ wù duunãtaabá kãã hi Kapɛrnã lǝri.

Yahudyaba fiisaa'n yuugɩ̀ gáa hi, Yesuẃ kãã ba wù kal cwaaba nǝ̃ Dũnnũ cãwandi Yahudyaba tɩgim'n duugɩ nã.

22 Wù yáá wù kal cwaaba nǝ̃ fãngããgu, gùú yáá gùu ce wù cãwanĩɛ̃gá ba gà yáá gà tugulǝǝ cwaaba nã ǹ-car.

Nã̀ã wa wù sáá wù kal-ba nã́ã́ Musa hlũũ'n yuntaabà mãã bà kal-ba nĩĩguu mãã.

23 Gɩ̀-lǝ gɩ̀ Yahudyaba tɩgim'n duugɩ nã, tãntũɔ̃ẁ yáá biɛdiɛ nã, gɩ̀ biɛẃ dii ǹ-kaasǝ wà:

24 «Nasarɛtɩ lǝntaa'n Yesu, danii ń ba ǹ dii ǹ nũɔ̃gu yì cɔ̃mmã nã, dàa, ǹ júó ǹ ji bǝ̃ǝ̃lǝ̃ǝ̃ yì nã-ì?

Mǝ̃̀ fǝ̃́ǝ̃lã́ wà Dũnnũw níé ǹ-hiil yíi-i, ǹ-tĩɛ̃-n!»

25 Yesuẃ nãlĩɛ̃ tãntũɔ̃ wáá nã wà: «Suu ǹ nũɔ̃gɩ nã, nǝ̃ ń hlǝ biɛ wáá nã!»

26 Tãntũɔ̃ẃ hlǝ wù nã, nã̀ã ce wú kaasǝ dugɔ, ǹ-ba wù tãrãã.

27 Dɩ́ cu bà min kusunɲã, bá ba bà yugu bà ɲĩɛ̃ wà: «Bii kaarcɔ̃m-i nǝ̃ mã́ã̀-lǝ?

Wù kal cwaaba nǝ̃ kalɩmflãmmã nǝ̃ fãngããgu.

Wu-ń nãlĩɛ̃ tãntɔ̃nããba nã, bá ba bà nɔ̃ bà hã-yǝ!»

28 Yesu yiirɩ́ paa ǹ-hlǝ Galile yiɛ'n yiɛgɩ min nã.

Yesuẁ buɔ hlɔnããba nǝ̃ tãntɔ̃nããntaaba

(Mãtiyew 8.14-17 ; Lukaw 4.38-41)

29 Yesubà gáa ba bà hlǝ Yahudyaba tɩgim'n duugɩ nã, bá paa ǹ-ta Simɔ̃ba nǝ̃ Ãndre bà suɔgu.

Yakuba nǝ̃ Yuhanãw, bà yáá dàa bà sǝ̃ǝ̃nã.

30 Simɔ̃ ciɛ'n ɲũẁ yáá dàa mǝ̃rãmmã nã, wù cãndìi huulaa, bá paa ǹ-waa wù cɔ̃mmã ǹ-ja Yesuw.

31 Wú kuganãã wù nã ǹ-blǝ wù nãkruɔgu ǹ-suro-yǝ, cãnhuulagǝgɩ́ paa ǹ-nǝ̃nǝ̃ǝ̃ wù nã, wú suro ǹ-ba wù ce bà norsǝri.

32 Bǝ̃ǝ̃gɩ̀ gáa jãn gùú nã mãã, dɩndǝ̃mbǝ̃ǝ̃nũɔ̃gɩ nã, cwaabá ba bà jo nǝ̃ bà min mãã bà yáá hlɔnããba nǝ̃ tãntɔ̃nããntaaba wù nãã.

33 Lǝrɩ min, dɩ́ juo tɩgii duu'n dũndɔ̃llɩ nã.

34 Wú buɔ hlɔnããcin, hlɔmplǝr wo hlɔmplǝr, wù búɔlá-mã, nã̀ã ɲǝ̃ǝ̃ ǹ-hiil tãntɔ̃nããcin tãntɔ̃nããntaaba nã.

Wù sáa ya tãntɔ̃nããbá da cãwan, nã̀ã wa bà yáá bà fǝ̃ǝ̃-yǝ.

Yesuẁ waa Dũnnũ cɔ̃mmã Galile yiɛgu

(Lukaw 4.42-44)

35 Gɩ̀ taakaalciibǝǝgu, taajãlũũ'n nũɔ̃gɩ nã pur, Yesuẃ suro ǹ-ta sɔkwaadagǝ nã, ǹ-kãã ba wù ce cirǝ̃mmã gɩ̀ sùɔ́gɩ nã.

36 Simɔ̃ba nǝ̃ wù nãbɩgaaba, bá suro ǹ-ba bà caa bà duu wù nã.

37 Bà gáa da-yǝ, bá waa nǝ̃-yǝ wà: «Cwaaba min, bá nǝ̃ bà caa-n.»

38 Wú siɛ-ba wà: «Jaatiɛ yiɛdagǝ yiɛ, tãngbǝrǝ̃sǝ'n liɛbiiga nã, mǝ̃ ga da ǹ-waa Dũnnũ cãwandi ǹ-ja cwaaba gùú yo gɩ̀ sɔnɲã nã.

Nã̀ã wa mǝ̃̀ hlǝ́rá dɩ̀-lǝ dìí yuunã-i.»

39 Nã̀ã fǝ̃ǝ̃ ǹ-ba wù waaraa wù waa Dũnnũ cãwandi wù ja cwaaba Galile yiɛ'n yiɛgɩ min nã Yahudyaba tɩgim'n donɲã nã, nã̀ã ba wù ɲǝ̃ǝ̃ wù hiil tãntɔ̃nããba tãntɔ̃nããntaaba nã.

Yesuẁ buɔ sǝ̃nkũnĩĩdiɛ

(Mãtiyew 8.1-4 ; Lukaw 5.12-16)

40 Sǝ̃nkũnĩĩdiɛẃ juo kuulǝǝ Yesu yigagɩ nã ǹ-ba wù jiɛriɛ nǝ̃-yǝ wà: «Gɩ-ń dwal ǹ nã, ǹ ji gbǝ̃ǝ̃ ǹ-per ǹ-hiil hlɔm mã́ã̀ mǝ̃̀ nã.»

41 Wù hujãndɩ́ blǝ Yesuw ǹ-car, wú fɩraa wù nãkruɔgɩ nã ǹ-jĩɛ̃ wù nã, nã̀ã waa wà: «Gɩ̀ dwállá mǝ̃̀ nã, mǝ̃̀ pérrá ǹ-hiil hlɔm mã́ã̀ ǹ nã!»

42 Gùú bǝ̃ǝ̃gɩ dɩngu dàa, sǝ̃nkũnsǝrɩ́ hlǝ wù nã, wú ba yalla.

43 Yesuẃ paa ǹ-waa nǝ̃-yǝ wà wú maar nã̀ã waa dɩ́ gbǝ̃ǝ̃ nǝ̃-yǝ wà:

44 «Blǝ ǹ hla nã, báa ce ń waa-dǝ nǝ̃ curo, nǝ̃ kã Yahudyaba puruɔntaaba nãã, ba ga ne-n.

Nǝ̃ gùú mãã gɩ̀ saa gɩ́ bũũ Dũnnũw Musaẁ kárrá gɩ̀ cɔ̃mmã wù hlũũgɩ nã, ǹ-ba wù per cwaaba nã, ń kã nǝ̃-gǝ, ǹ-da ǹ-pɩgaa cwaaba wà n búɔlá.»

45 Nǝ̃ biɛẁ gáa yii ǹ-ta, wú kãã ba wù waa-mã wù ja cwaaba, wù pisɩrĩɛ̃ cãwandɩ nã, fuwɔ ǹ-ce Yesuẃ ba wù síì gbǝ̃ǝ̃ ǹ-jãn lǝ nã gbaa.

Wù yáá wù ba lǝ'n tãngbǝrǝ̃ǝ̃gu, sɔkwaadagǝ nã.

Nǝ̃ dɩ̀-lǝ dɩ̀ min drɔ, cwaabá ba bà hlǝ yanɲã min nã bà jo wù nãã.