Lukaw 3

Dũnnũẁ tĩɛ̃ Yuhanãẃ ba wù ɲĩɛ̃ cwaaba, nã̀ã ba wù kal-ba

(Mãtiyew 3.1-12 ; Markaw 1.1-8 ; Yuhanãw 1.19-28)

Gùú bǝ̃ǝ̃guu mãã Tibɛrẁ jáa ba Sesaarw, yuuntigǝ̃ngãw wù-lǝ wù fãngãã'n bii nũɔ̃sɔ̃ nǝ̃ gà ndiinãw nã, Pɔ̃sɩ Pilatɩẁ yáá Suude yiɛ'n kumãndãw, nǝ̃ Erodɩẃ ba Galile yiɛ'n yuugɩ nã.

Wù tiinãtii Filipɩ-lǝ wú ba Iture yiɛgu nǝ̃ Trakɔ̃nɩtidɩ yiɛ'n yuugɩ nã, nǝ̃ Lisaniyasɩẃ ba Abilɛn yiɛ'n yuugɩ nã.

2 Anãsɩba nǝ̃ Kayifɩw, bà yáá Yahudyaba puruɔntaa'n yuntaagǝ̃ngĩɛ̃ba, gùú nã-i, Dũnnũ cãwandɩ́ juo hi Jakarɩja bíɛ́ Yuhanãw jerkwaarɩ nã.

3 Wú fǝ̃ǝ̃ ǹ-suro, ǹ-ba wù waaraa liɛga nã mãã dàa lwaaguu mãã bà be-gǝ wà Surdɛ̃, gɩ̀-lǝ gɩ̀ nũɔ̃gɩ nã, ǹ-ba wù waa Dũnnũ cãwandi wù ja cwaaba wà: «Nǝ̃́nǝ̃̀ǝ̃ ɲì gaacĩɛ̃yaga nã, nǝ̃ ɲí tuu ɲí tu, nǝ̃ ɲí ce bá ɲĩɛ̃-ɲã́ã̀, Dũnnũẃ da ǹ-pyar-ga ɲì yuunã.»

4 Sulammã nã, Dũnnũ tanhiil Esayiẁ yállá-dǝ wù sɛbɛw nã nĩĩgɩ-i wà: «Curodiɛẃ nàa wùu hiil wù yalli jerkwaarɩ nã wà: Mǝ̃́garà Yitii'n hlũũgu, ɲí sũɔ̃l wù hlũmbiiga, ɲí cii-yǝ.

5 Gbǝ́ràa jɔ̃nɲã min nã, nǝ̃ ɲí hɩrǝǝ tãnũnɲã nǝ̃ tãmbiiga min nã.

Hlũnɲãã mãã ɲã̀ã nollaa, sṹɔ̃lã̀ã ɲã̀ nã, nǝ̃ ɲí mǝ̃gaa hlũnbɩblan yo.

6 Nǝ̃ Dũnnũẁ tĩ́ɛ̃lã́ gùú korɩmmã́ jo, cwaaba min bà ji da-mã.»

7 Cocindaarɩ́ ba dɩ̀ jo, wà ba juo ce wú ɲĩɛ̃-ba, Yuhanãẃ ba wù waa nǝ̃-ba wà: «Dɛbɛrtaa ɲimãã mãã nnĩĩ!

Dũnnũ hyadũũgu mãã gɩ̀ jo, halii túú nǝ̃-ɲã́ã̀, ɲí ba ɲì sɔ̃ ɲì kwar nǝ̃-gǝ?

8 Bláà ɲì ce gàá mãã cwaaba-ń da-ga, bá fǝ̃ǝ̃ wà ɲi nǝ̃nǝ̃ǝ̃ ɲì gaacĩɛ̃yaga nã nã̀ã tuu ǹ-tu.

Bláá ne wà ɲi mãã Ibramã nũɔ̃ntaaba, mǝ̃̀ tu nǝ̃-ɲã́ã̀, ɲi díɛ́ tɩntrãgaa mãã nnĩĩ, Dũnnũẁ ji gbǝ̃ǝ̃ ǹ-cin-ga tãnkuuraaba ǹ-hã Ibramãw.

9 Dũnnũẁ túulá dajuumǝ̃ǝ̃li ǹ-tã, wù jo wù ji juu tubikuugu, gɩ̀ ɲũmǝ̃nǝ̃ǝ̃ba nã.

Tubikuu wo tubikuu, gɩ-ń ba gɩ̀ sǝ̃n ŋmǝ̃ǝ̃ biifɩnfiɛga, wù ji juu-gǝ, ǹ-dii dǝ̃ǝ̃mã nã.»

10 Cocin díɛ̀dɩ́ fǝ̃ǝ̃ ǹ-yugu Yuhanãw wà: «Gɩ̀-lǝ gɩ̀ nã, yi saa yí ce danii?»

11 Wú siɛ-ba wà: «Yíi nǝ̃n ba nǝ̃ kuulaadiibaba hǝ̃ǝ̃lba, nǝ̃ ǹ nãcuroẃ ba wù sǝ nǝ̃ kuu, hã-yǝ nǝ̃ wù dɩnw.

Yíi nǝ̃n ba nǝ̃ wuuri, kã ɲí yuɔ-dǝ nǝ̃ nũmnĩĩw.»

12 Nãnhũɔ̃rãã yo, bá jo bà ji ce Yuhanãẃ ɲĩɛ̃-ba, nã̀ã yugu-yǝ wà: «Kaltii, hãmĩĩ saa yí ce danii?»

13 Wú waa nǝ̃-ba wà: «Curow mãã wù saa wú pã gùú nũɔ̃guu mãã, bláá hũɔ̃ ɲí maa gɩ̀-lǝ.»

14 Sɩrǝǝsɩba yo, bá juo yugu-yǝ wà: «Nǝ̃ hãmĩĩ-lǝ, yí ce danii?»

Wú waa nǝ̃-ba wà: «Bláá duruu curo nã.

Bláá bǝr ɲí dii curo nã yo.

Nǝ̃ bà mãã bà pã-ɲã́ã̀ nǝ̃ gùú mãã, ɲí ya gɩ́ yu ɲì yisɩri.»

15 Cwaabá ba bà cii dɩ̀ furũũgu, nã̀ã ba bà waa nǝ̃ bà ɲĩɛ̃ wà nã́ã́ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wùú sɩga ba Yuhanã lǝ-ì?

16 Gùú nã-i, Yuhanãẃ fǝ̃ǝ̃ ǹ-waa nǝ̃ bà min wà: «Mǝ̃n-lǝ, mǝ̃̀ ɲĩɛ̃-ɲã́ã̀ nǝ̃ hũm-i, nǝ̃ wùú mãã wù fãngããgɩ̀ ta mǝ̃n kuugɩ nã, wú nàa wù jo.

Nǝ̃ halle mǝ̃n sáa piɛ wù mããcierw nã, nã̀ã ji wa wùú nǝ̃ wù hla.

Wù-lǝ wù ji ɲĩɛ̃-ɲã́ã̀ nǝ̃ Dũnnũ Yuflǝw, nǝ̃ wù dǝ̃ǝ̃m-i.

17 Wú nàa nǝ̃ wù guuciilkuugu jiraagɩ nã, wù ji ciil dũmmã ǹ-hiil biigaa kaammã nã, ǹ-dii-ga dǝbɩrw nã, nã̀ã tii kaammã dǝ̃ǝ̃mã nã mãã fɩraa.»

18 Yuhanãẃ waa cãwanĩɛ̃cin nǝ̃ cwaaba, ǹ-ba wù dii dɔ̃mmã bà nã, nã̀ã ja-ba nǝ̃ cɔ̃ndudwalɩmmã.

19 Galile yiɛ'n yuuntii Erodɩẃ kãã tuu wù tiinãtii'n ciɛ mãã bà be-yǝ wà Erodiyadɩ, ǹ-ce-yǝ nǝ̃ ciɛ, nã̀ã ce gaabɩbliɛcindaga hlo.

Yuhanãẃ kãã waa nǝ̃-yǝ wà wu píé ǹ-ce.

20 Erodɩẃ fǝ̃ǝ̃ ǹ-ce bá blǝ-yǝ, ǹ-dii-yǝ kasoduugɩ nã, ǹ-pya nã hlo.

Yuhanãẁ ɲĩɛ̃ Yesuw

(Mãtiyew 3.13-17 ; Markaw 1.9-11)

21 Gùú bǝ̃ǝ̃guu mãã Yuhanãẁ yáá wù ɲĩɛ̃ cwaaba min, Yesu yo, wú juo ce wú ɲĩɛ̃-yǝ.

Yesuẁ gáa ba wù cirǝ̃ǝ̃ Dũnnũw nã, Dũnnũ suɔ'n fierɩ́ ciɛl.

22 Dũnnũ Yuflǝẃ fǝ̃ǝ̃ ǹ-hlǝ drɔgu nã́ã́ hũɔ̃rũɔ̃-i, ǹ-juo yáà wù drɔ.

Yaldaarɩ́ fǝ̃ǝ̃ ǹ-hlǝ drɔkuɔlɩ nã, ǹ-ba dɩ̀ waa wà: «Yíi-i mǝ̃̀ bíɛ́ cituublɩw, yíi dwállà mǝ̃̀ nã.»

Yesu bà nũɔ̃ntaaba

(Mãtiyew 1.1-17)

23 Yesuẁ yáá wù du wù mããcemmã nã gùú nã mãã, wù bìigà yáá nã́ã́ gá nǝ̃ gur nǝ̃ nũɔ̃sɔ̃-i.

Cwaabà yáá bà blǝ-yǝ wà Heli bíɛ́ Yisefu tãnkuur-i.

24 Yisefuẁ nũɔ̃ntaaba-i nnĩĩ: Heliw, Mataw, Leviw, Mɛlkɩw, Sanãyiw, Yisefudiɛ,

25 Matatiyasɩw, Amɔsɩw, Nahumw, Esɩliw, Nagayiw,

26 Maatɩw, Matatiyasɩdiɛ, Semɛ̃nɩw, Yosɛw, Sodaw,

27 Suwanãw, Eresaw, Sorobabɛlw, Salatiyɛlw, Neriw,

28 Mɛlkɩw, Adiiw, Kɔsamɩw, Elemãdamw, Ɛrw,

29 Yesudiɛ, Eliyesɛrw, Sorimw, Matadiɛ hlo, nǝ̃ Levidiɛ.

30 Simeyɔ̃w, Suudaw, Yisefudiɛ hlo, Sonãmw, Eliyakimw,

31 Meleyaw, Menãw, Matataw, Natãw, Dawudaw

32 Sesew, Obɛdɩw, Buosɩw, Salmɔ̃w, Naasɔ̃w,

33 Aminadabɩw, Adɩmɛ̃w, Arɩniiw, Ɛsɩrɔ̃w, Perɛsɩw, nǝ̃ Suudadiɛ.

34 Yakubaw, Isiyagaw, Ibramãw, Teraw, Nahɔrw,

35 Seruguw, Erehuw, Pɛlɛgɩw, Ebɛrw, Selaw,

36 Kenamw, Arfasadɩw, Sɛmw, Nũhũw, Lemɛkɩw,

37 Matusalɛmw, Enɔkɩw, Sarɛdɩw, Malelilw, Kenamw.

38 Enɔsɩw, Sɛtɩw, fuwɔ ǹ-ga hi Adɩmãw mãã Dũnnũẁ nǝ̃́ǝ̃lã́-yǝ.