Mãtiyew 1

Mãtiyew

Yesu cɔ̃ndudwalɩmmãã mãã Mãtiye yállá-mã

Yesuba honãã'n nũɔ̃gu

Yesu Kɩrsaba honãã'n nũɔ̃gɩ-i nnĩĩ: Yesu Kɩrsaẁ hlǝ́rá Dawuda huɔnbiiba nã-i, Dawudaẃ hlǝ Ibramã huɔnbiiba nã.

2 Ibramãẁ húulá Isiyagaw.

Isiyagaẃ suro ǹ-huu Yakubaw.

Yakubaẃ suro ǹ-huu Suudaw ǹ-pya wù hãmba nǝ̃ wù vũnvãnããba nã.

3 Suudaẃ suro ǹ-huu Perɛsɩw nǝ̃ Seraw.

Tãnkuuraa báàba ɲũw bà yáá bà be-yǝ Tamar.

Perɛsɩẃ suro ǹ-huu Ɛsɩrɔ̃w.

Ɛsɩrɔ̃ẃ suro ǹ-huu Aramw.

4 Aramẃ suro ǹ-huu Aminadabɩw.

Aminadabɩẃ suro ǹ-huu Naasɔ̃w.

Naasɔ̃ẃ suro ǹ-huu Salmɔ̃w.

5 Salmɔ̃ẃ suro ǹ-huu Buosɩw.

Buosɩ ɲũw, bà yáá bà be-yǝ Arhabɩw.

Buosɩẃ suro ǹ-huu Obɛdɩw.

Obɛdɩ ɲũw, bà yáá bà be-yǝ Wurǝtɩ.

Obɛdɩẃ suro ǹ-huu Sesew.

6 Seseẃ suro ǹ-huu Dawudaw mãã wù yáá Isɩrayɛl yiɛ'n yuuntiiw.

Dawudaẃ suro ǹ-huu Solmãnw, Solmãn ɲũw yáá nǝ̃ Uuri ciɛw.

7 Solmãnẃ suro ǹ-huu Orbamw.

Orbamẃ suro ǹ-huu Abiyaw.

Abiyaẃ suro ǹ-huu Asaw.

8 Asaẃ suro ǹ-huu Sosafaw.

Sosafaẃ suro ǹ-huu Soramw.

Soramẃ suro ǹ-huu Osiyasɩw.

9 Osiyasɩẃ suro ǹ-huu Sotamw.

Sotamẃ suro ǹ-huu Akasɩw.

Akasɩẃ suro ǹ-huu Esekiyasɩw.

10 Esekiyasɩẃ suro ǹ-huu Mãnãsew.

Mãnãseẃ suro ǹ-huu Amɔ̃w.

Amɔ̃ẃ suro ǹ-huu Sosiyasɩw.

11 Sosiyasɩẃ suro ǹ-huu Siekuniyaw ǹ-pya wù hãmba nǝ̃ vũnvãnããba nã.

Bà blǝ́rá Isɩrayɛl bluuba gùú bǝ̃ǝ̃gɩ-i ǹ-kã nǝ̃-ba Babilɔn lǝri.

12 Bà gáa blǝ Isɩrayɛl bluuba ǹ-kã nǝ̃-ba Babilɔn lǝri: Siekuniyaẃ suro ǹ-huu Salatiyɛlw.

Salatiyɛlẃ suro ǹ-huu Sorobabɛlw.

13 Sorobabɛlẃ suro ǹ-huu Abiyudɩw.

Abiyudɩẃ suro ǹ-huu Eliyakimw.

Eliyakimẃ suro ǹ-huu Asɔrw.

14 Asɔrẃ suro ǹ-huu Sadɔkɩw.

Sadɔkɩẃ suro ǹ-huu Akimw.

Akimẃ suro ǹ-huu Eliwudɩw.

15 Eliwudɩẃ suro ǹ-huu Elasarw.

Elasarẃ suro ǹ-huu Matãw.

Matãẃ suro ǹ-huu Yakubaw.

16 Yakubaẃ suro ǹ-huu Yisefuw.

Yisefuẃ suro ǹ-tuu ciɛ.

Wù ciɛ bà yáá bà be-yǝ Mariyam.

Mariyam wáá húulá Yesuw mãã bà be-yǝ Kɩrsa.

17 Gɩ ba nã́ã́ ǹ-du nã Ibramãw nã ǹ-ji hi Dawudaw, tiiba nũɔ̃sɔ̃ nǝ̃ bà nnǝ̃ǝ̃ tíɛ́.

Nǝ̃ ǹ-du nã Dawudaw nã ǹ-ji hi bà blǝ́rá Isɩrayɛl bluuba ǹ-kã nǝ̃-ba Babilɔn lǝri gùú bǝ̃ǝ̃gu mãã, tiiba nũɔ̃sɔ̃ nǝ̃ bà nnǝ̃ǝ̃ tíɛ́.

Nǝ̃ ǹ-ver du nã gɩ̀-lǝ gɩ̀ bǝ̃ǝ̃gu, ǹ-ji hi Kɩrsa huumã nã, tiiba nũɔ̃sɔ̃ nǝ̃ bà nnǝ̃ǝ̃ tíɛ́ hlo bà sǝ̃ǝ̃gɩ nã.

Yesu Kɩrsa huumã

(Lukaw 2.1-7)

18 Yesu Kɩrsaẁ húulá gùú tammãã mãã, mã̀-i nnĩĩ: wù ɲũ wɩ̀-i nǝ̃ Mariyamw, Yisefuẁ yáá wùu jãn wù cɔ̃mmã nã wà wu ji dii-yǝ wù ciɛ.

Bǝ̃ǝ̃daagɩ̀ jáa hi, Dũnnũ Yuflǝẃ juo ce Mariyamẃ hiraa kúsúugɩ nã, nǝ̃ bà sáa bàa hi ǹ-fǝ̃ǝ̃ bà ɲĩɛ̃.

19 Wù bla Yisefuẁ mãã wù yáá cosũɔ̃lyǝw nǝ̃ wù sáá wù caa wù bǝ̃ǝ̃lǝ̃ǝ̃ wù yiirɩ nã cwaa'n yinɲã nã, wú blǝ-dǝ wù kusuugɩ nã wà wu ji hiil wù vyanɲã wù cɔ̃mmã nã nǝ̃ curo'n báa fǝ̃ǝ̃ dɩ̀ nã.

20 Wù gáa dii dɩ̀-lǝ wù kusuugɩ nã, gɩ̀-i, Yitii'n mɛlɛgɛẃ juo hillaa wù nã dãnsãndɩ nã, nã̀ã waa nǝ̃-yǝ wà: «Yisefu, Dawuda bíɛ́, báa sɔ̃ wù taam'n cɔ̃mmã nã, Mariyamẁ túulá gùú kúsúuguu mãã nnĩĩ, Dũnnũ Yuflǝ hlã-yǝ nǝ̃-gǝ.

21 Wù ji huu pũmpɩrblɩ.

Wù mãã wù ji kor wù yiɛntaaba ǹ-hiil-ba bà gaacĩɛ̃yaga nã, gùú cíé ǹ ji suu wù yiiri wà Yesu.»^a

22 Dɩ̀-lǝ dɩ̀ cíé ǹ-da ǹ-ce Yitiiw yáá wù ta wù tanhiilw nã, ǹ-waa dìí, dɩ́ suu.

Wù yáá wùu waa wà:

23 «Níyà, pǝǝblɩw mãã wù sǝ̃n fǝ̃ǝ̃ bibiɛ, wù ji tuu kusuugu, ǹ-huu pũmpɩrblɩ, bà ji suu-yǝ wà Imãnuwɛl», dɩ̀ yuugɩ-i wà, Dũnnũẃ nìɛ nǝ̃-yáà.

24 Yisefuẁ gáa nĩĩ, Yitii'n mɛlɛgɛẁ wáalá wú ce dìí mãã, wú ce-dǝ, nã̀ã fǝ̃ǝ̃ ǹ-tuu Mariyamw ǹ-kũũ nǝ̃-yǝ ǹ-kãã taa-yǝ.

25 Nǝ̃ wù sáa mǝ̃rǝ̃ǝ̃ nǝ̃-yǝ fuwɔ wú ji ta ǹ-ga huu pũmpɩrblɩ, wú suu-yǝ wà Yesu.