Mãtiyew 2

Fǝ̃ǝ̃kuutaabà kã bà ga dǝ̃ǝ̃ Yesuw

Yesuẁ húulá Betɩlehɛm lǝ-i, Suude yiɛgu.

Wù húulá jãmãtigi Erodɩ bǝ̃ǝ̃-i.

Wù gáa huu, fǝ̃ǝ̃kuutaadaabà yáá bǝ̃ǝ̃'n pal'n yiɛgu, bá suro ǹ-jo Serusalɛmgu

2 ǹ-juo ce yugummã wà: «Yahudyaba yuuntii mãã wù húulá kuɔkuɔgu dìɛ, wú nàa haa-ì?

Nã̀ã wa yi díɛ́ wù ŋmããri bǝ̃ǝ̃'n pal'n yiɛgu, gùú cíé yí wa yi júó bũũ-yǝ.»

3 Jãmãtigi Erodɩẁ gáa nɔ̃-dǝ, dɩ́ gaala wù nã, fuwɔ ǹ-ji gaala Serusalɛm taaba min hiɛga nã.

4 Wú be ǹ-tɩgii Yahudyaba puruɔntaa'n yuntaaba min, nǝ̃ Musa hlũũ'n yuntaaba, ǹ-juo yugu-ba nǝ̃ Kɩrsa huum'n sùɔ́'n cɔ̃mmã.

5 Bá waa nǝ̃-yǝ wà: «Betɩlehɛm lǝ-i, Suude yiɛgu, nã́ã́ Dũnnũ tanhiilẁ yáá wùu yal-dǝ nĩĩguu mãã.

6 Wù yáá wùu waa wà: “Betɩlehɛm lǝntaa ɲimãã, Suude yiɛgu, yuuntiiw mãã wù ji fǝ̃ǝ̃ ǹ-cii mǝ̃̀ bluuba nã, Isɩrayɛl bluuba, wù mãã wù ji hlǝ ɲimãã nã, ɲì lǝrɩ̀ síì ba Suude yiɛ'n nũɔ̃sǝn liɛ'n furũũgɩ nã.”»

7 Gɩ̀-i, Erodɩẃ fǝ̃ǝ̃ ǹ-ce bá ŋmã ǹ-be fǝ̃ǝ̃kuutaa báà, ǹ-juo mǝ̃gaa ǹ-yugu-ba dɩ́ kaalaa ǹ-fǝ̃ǝ̃ ŋmããrɩ̀ dúú nã ǹ-ba dɩ̀ hlǝ gùú bǝ̃ǝ̃guu mãã,

8 nã̀ã tĩɛ̃-ba Betɩlehɛm lǝri wà: «Kã́ã̀ ɲi ga yugurǝǝ, ɲí fǝ̃ǝ̃ tãnkuur'n dǝllɩ́ kaalaa, ɲi-ń ga da-yǝ, ɲí jo ɲi ji waa nǝ̃-m, mã́ã yo mǝ̃́ da ǹ-kãã bũũ-yǝ.»

9 Bà gáa nɔ̃ jãmãtigi cãwanĩɛ̃ga ǹ-tã, bá fǝ̃ǝ̃ ǹ-tuu hlũũgu ǹ-ba bà maar, ǹ-ji paa ǹ-ne ǹ-da bà yáá bàa da gùú ŋmããri mãã bǝ̃ǝ̃'n pal'n yiɛgu dɩ̀-lǝ dìi ba dɩ̀ wáà bà yigagɩ nã.

Dɩ̀ gáa kãã hi tãnkuurw yà gùú sùɔ́gu, dɩ́ fǝ̃ǝ̃ ǹ-hiraa gɩ̀ yuugɩ nã.

10 Bà gáa da ŋmããri nnĩĩ nã, dudwalɩmmã́ juo car bà nã fuwɔ ǹ-ji maa gɩ̀ sùɔ́gu.

11 Bá fǝ̃ǝ̃ ǹ-jãn suɔgɩ nã, ǹ-da tãnkuurw bá nǝ̃ wù ɲũ Mariyamw.

Bá kuulǝǝ ǹ-bũũ tãnkuurw, nã̀ã fɩr bà wariɛga ǹ-hiil bà yáá bàa jo nǝ̃ gùú gbaasǝ'n ɲinɲãã mãã bà ji bũũ-yǝ nǝ̃-ɲã: sãnãw, wusunããw nǝ̃ miir nɔ̃mmã.

12 Gɩ̀ furũũgɩ nã, Dũnnũẃ juo tu nǝ̃-ba dãnsãndɩ nã wà ba báa ver ǹ-kã Erodɩw nãã.

Gɩ̀-i, bá fǝ̃ǝ̃ ǹ-tuu gɩ̀ dǝ'n hlũũ, ǹ-ta bà yiɛgu.

Yisefuẁ kwar wù kã nǝ̃ wù suɔntaaba Misɩra yiɛgu

13 Fǝ̃ǝ̃kuutaa báàba tal'n furũũgɩ nã, Yitii'n mɛlɛgɛẃ juo hillaa Yisefuw nã dãnsãndɩ nã ǹ-waa nǝ̃-yǝ wà: «Suro ń tuu tãnkuurw bá nǝ̃ wù ɲũw, ń kwar nǝ̃-ba n ga jiraa Misɩra yiɛgu, fuwɔ gùú bǝ̃ǝ̃guu mãã mǝ̃̀ ga wa ń jo.

Nã̀ã wa Erodɩẃ nìɛ wù caa wú ko tãnkuurw.»

14 Gùú nã-i, Yisefuẃ suro ǹ-tuu tãnkuurw bá nǝ̃ wù ɲũw yisuɔgu, ǹ-ta ǹ-kãã cĩĩ ǹ-jiraa nǝ̃-ba Misɩra yiɛgu.

15 Wú ba dàa Misɩra yiɛgu fuwɔ Erodɩw ji ta ǹ-ga ku.

Dɩ̀-lǝ dɩ̀ cíé ǹ-da ǹ-ce Yitiiẁ yáá wùu ta wù tanhiilw nã ǹ-waa dìí, dɩ́ suu.

Wù yáá wùu waa wà: «Mǝ̃̀ bíé ǹ-hiil mǝ̃̀ bíɛ́w Misɩra yiɛgɩ-i.»

Betɩlehɛm yiɛ'n pũmpɩrbii'n kolli

16 Erodɩẁ gáa fǝ̃ǝ̃ wà fǝ̃ǝ̃kuutaaba vúulá-yǝ-i, wù hiɛgá juo mǝ̃gaa ǹ-dũ, wú juo ba nã́ã́ wuupel-i, wú tĩɛ̃ wù bluubá kãã ko tãnkuurbiiba min mãã bà sáa maa biiga hǝ̃ǝ̃lgaa Betɩlehɛm lǝ'n kusuugɩ nã, nǝ̃ gɩ̀ yiɛ'n liɛga min nã.

Wù cíé-dǝ ǹ-vaa nǝ̃ wù yáá wùu ce fǝ̃ǝ̃kuutaabá pɩgaa-yǝ nǝ̃ gùú bǝ̃ǝ̃guu mãã.

17 Nĩĩgɩ-i, Dũnnũ tanhiil Seremi cãwanĩɛ̃gà súulǝ́.

Wù yáá wùu waa wà:

18 «Yaldaarɩ́ nàa dɩ̀ hlǝ Armã lǝri, kaaluugu nǝ̃ guusugǝ̃ngããgu Arsɛl-i, wù tãnkuuraabà mãã bà sáa ji ba dìɛ sǝ, wù kaal bàá kaaluu-i, wù sǝ̃n caa bá puɔr-yǝ wú ɲũɔ̃l.»

Yisefu kũũmã nǝ̃ wù suɔntaaba

19 Erodɩ kúú'n furũũgɩ nã, Yitii'n mɛlɛgɛẃ kãã hillaa Yisefuw nã dãnsãndɩ nã Misɩra yiɛgu.

20 Ǹ-waa nǝ̃-yǝ wà: «Suro, ń tuu tãnkuurw bá nǝ̃ wù ɲũw ń kã n ga jiraa Isɩrayɛl yiɛgu.

Bàá nǝ̃n yáá bà caa bá ko tãnkuurw, bà kúrǝ́ǝ.»

21 Yisefuẃ suro ǹ-tuu tãnkuurw bá nǝ̃ wù ɲũw ǹ-ta Isɩrayɛl yiɛgu.

22 Nǝ̃ Yisefuẁ gáa nɔ̃ wà Erodɩ bíɛ́ Arkelusɩ túulá wù tǝ fãngããgu nǝ̃ sùɔ́, ǹ-jiraa Sude yuugɩ nã, gbǝrsǝrɩ́ blǝ-yǝ, wù sáa siɛ ǹ-kã Suude yiɛgu.

Dũnnũẃ juo gbǝ wù nã dãnsãndɩ nã, gɩ̀-i Yisefuẃ suro ǹ-ta Galile yiɛgu.

23 Nã̀ã kãã jiraa lǝdarǝ nã bà be-dǝ Nasarɛtɩ lǝ.

Dɩ̀-lǝ dɩ̀ cíé ǹ-da ǹ-ce Dũnnũw tanhiilaa'n cãwanĩɛ̃gá suu: Bà wáalá wà: «Bà ji ba bà be-yǝ Nasarɛtɩ lǝntabiɛ^a.»