Mãtiyew 3

Yuhanãw mãã wù ɲĩɛ̃ cwaaba, wù cãwandi

(Markaw 1.1-8 ; Lukaw 3.1-18 ; Yuhanãw 1.19-28)

Gɩ̀-lǝ gɩ̀ bãnɲã nã, Yuhanãw mãã wù ɲĩɛ̃ cwaaba wú juo suro ǹ-ba wù waa Dũnnũ cãwandi wù ja cwaaba Suude yiɛ'n jerkwaarɩ nã.

Wù yáá wù waa wà:

2 «Nǝ̃́nǝ̃̀ǝ̃ ɲì gaacĩɛ̃yaga nã nǝ̃ ɲí tuu ɲí tu, nã̀ã wa Dũnnũ yuuntasǝ'n bǝ̃ǝ̃gɩ̀ híí!»

3 Dũnnũẁ yáá wùu ta wù tanhiil Esayi nã, ǹ-juo waa Yuhanã cɔ̃mmã-i wà: «Curodiɛẃ nàa wùu hiil wù yalli jerkwaarɩ nã wà: Mǝ̃́garà Yitii'n hlũũgu, ɲí sũɔ̃l wù hlũmbiiga, ɲí cii-yǝ.»

4 Kuulaa mãã Yuhanãẁ yáá wù dii-yǝ, bà yáá bàa sɔ̃-yǝ nǝ̃ ɲũgɔ̃mĩĩkwaasǝ-i.

Wu-ń ce wú dii-yǝ nã̀ã vaa-yǝ nǝ̃ cãngbaagu wù nĩɛ̃lɩ nã.

Wù ɲããwuunɲã̀ yáá nǝ̃ jisɔ̃nããba nǝ̃ dafon'n salli.

5 Serusalɛm taaba nǝ̃ Suude yiɛntaaba min bá fǝ̃ǝ̃ ǹ-ba bà kã wù nãã, ǹ-ga ta ǹ-ga hlǝ Surdɛ̃ lwaa'n yiɛntaaba min nã.

6 Bà yáá ba-ń ce bá juo hũɔ̃ ǹ-hiraa bà gaacĩɛ̃yaga nã gbaa cwaa'n yinɲã nã nǝ̃ Yuhanãẃ fǝ̃ǝ̃ ǹ-ɲĩɛ̃-ba Surdɛ̃ lwaa'n hũmmã nã.

7 Yuhanãẁ jáa da Farisĩɛ̃ba nǝ̃ Saduusɩbaa káalà bà ɲĩɛ̃ ǹ-ba bà jo wù nãã wà wú ɲĩɛ̃-ba, wú waa nǝ̃-ba wà: «Dɛbɛrtaa ɲimãã mãã nnĩĩ!

Dũnnũ hyadũũguu mãã gɩ̀ jo, halii túú nǝ̃-ɲã́ã̀ ɲí ba ɲì sɔ̃ ɲì kwar nǝ̃-gǝ?

8 Bláà ɲì ce gàá mãã cwaaba-ń da-ga, bá fǝ̃ǝ̃ wà ɲi nǝ̃́nǝ̃́ǝ̃ ɲì gaacĩɛ̃yaga nã, nã̀ã tuu ǹ-tu.

9 Bláá ne wà ɲi mãã Ibramã nũɔ̃ntaaba, mǝ̃̀ tu nǝ̃-ɲã́ã̀: ɲi díɛ́ tɩntrãgaa mãã nnĩĩ-i?

Dũnnũẁ ji gbǝ̃ǝ̃ ǹ-cin-ga tãnkuuraaba ǹ-hã Ibramãw.

10 Dũnnũẁ túulá dajuumǝ̃ǝ̃li ǹ-tã, bà jo bà ji juu tubikuugu, gɩ̀ ɲũmǝ̃nǝ̃ǝ̃ba nã.

Tubikuu wo tubikuu, gɩ-ń ba gɩ̀ sǝ̃n ŋmǝ̃ǝ̃ biifɩnfiɛga, bà ji juu-gǝ, ǹ-dii dǝ̃ǝ̃mã nã.

11 Mǝ̃n-lǝ, mǝ̃n ɲĩɛ̃-ɲã́ã̀ nǝ̃ hũm-i, ǹ-da ǹ-pɩgaa wà ɲi nǝ̃́nǝ̃́ǝ̃ ɲì gaacĩɛ̃yaga nã, nã̀ã tuu ǹ-tu, nǝ̃ wùú mãã wù ga jo mǝ̃n furũũgɩ nã, wù-lǝ wù fãngããgɩ̀ ta mǝ̃n kuugɩ nã, wù ji ɲĩɛ̃-ɲã́ã̀ nǝ̃ Dũnnũ Yuflǝw, nǝ̃ wù dǝ̃ǝ̃m-i.

Halle mǝ̃n sáa piɛ wù mããcierw nã nã̀ã ji wa wùú nǝ̃ wù hla.

12 Wú nàa nǝ̃ wù guuciilkuugu jiraagɩ nã, wù ji ciil dũmmã ǹ-hiil biiga káàmã nã, ǹ-dii-ga dǝbɩrw nã, nã̀ã tii káàmã dǝ̃ǝ̃mã nã mãã fɩraa.»

Yesu ɲĩɛ̃mã

(Markaw 1.9-11 ; Lukaw 3.21-22)

13 Yuhanãẁ gáa ba wù ɲĩɛ̃ cwaaba gùú bǝ̃ǝ̃gu, Yesuẃ fǝ̃ǝ̃ ǹ-suro Galile yiɛgu, ǹ-kã Surdɛ̃ lwaagɩ nã, Yuhanãw nãã wà wú kãã ce wú ɲĩɛ̃-yǝ.

14 Yuhanãẃ kãã wa wú hla wà wù-lǝ wu síì ce-dǝ, nã̀ã ba wù waa nǝ̃-yǝ wà: «Mǝ̃n-lǝ mã́ã sáalà ń ɲĩɛ̃-m, nǝ̃ ń ver ǹ-ba ǹ jo mǝ̃̀ nãã wà mǝ̃ ɲĩɛ̃-n, mǝ̃n ji ɲĩɛ̃-n danii?»

15 Nǝ̃ Yesuẃ fǝ̃ǝ̃ ǹ-siɛ-yǝ wà: «Kuɔkuɔgu, ya dɩ́ ce nĩĩgɩ-i.

Nã̀ã wa gɩ̀ saa yí ce Dũnnũ kusunã cɔ̃mmã.»

Gùú sùɔ́gɩ-i, Yuhanãẃ hũɔ̃ ǹ-ɲĩɛ̃-yǝ.

16 Wù gáa yii ǹ-ɲĩɛ̃-yǝ ǹ-tã, Yesuẃ hlǝ hũmmã nã.

Gùú bǝ̃ǝ̃gɩ dɩngu dàa Dũnnũ suɔ'n fierɩ́ ciɛl, wú da Dũnnũ Yuflǝw yà hlǝ ǹ-ba wù hɩr wù jo nã́ã́ hũɔ̃rũɔ̃-i, ǹ-juo yáà wù drɔ.

17 Gɩ̀-i, yaldaarɩ́ fǝ̃ǝ̃ ǹ-hlǝ drɔkuɔlɩ nã ǹ-ba dɩ̀ waa wà: «Wáà wɩ̀-i mǝ̃̀ bíɛ́ cituublɩw; wùú dwállà mǝ̃̀ nã.»