Yuhanãw 1

Yuhanãw

Yesu cɔ̃ndudwalɩmmãã mãã Yuhanãẁ yállá-mã

Yesu wɩ̀-i cãwandii mãã dɩ̀ cíé dɩ̀ hla curow

Cuuẁ wáalá wu ji nǝ̃ǝ̃, Cãwandɩ̀ yáá dìɛ, nǝ̃ Cãwandɩ̀ yáá nǝ̃ Dũnnũw, dìí yáá Dũnnũw.

2 Cuuẁ wáalá wu ji nǝ̃ǝ̃, wùú mãã cãwandi, wùú yáá nǝ̃ Dũnnũw.

3 Dũnnũẁ cíé wɩ̀-i wú nǝ̃ǝ̃ ɲinɲã min.

Kuu'n sáa nǝ̃ǝ̃ wù furũũgɩ nã.

4 Nũmǝ̃nãsǝrɩ̀ yáá wùú nã-i.

Nǝ̃ nũmǝ̃nãsǝ díɛ̀ yáá cwaa'n gbɩgbaamã.

5 Gbɩgbaamã̀ cáaláa dudũũmã nã, nǝ̃ dudũũmã̀ sáa gbǝ̃ǝ̃ ǹ-dĩĩ-mã.

6 Bǝ̃ǝ̃daagɩ̀ jáa hi, Dũnnũẃ tĩɛ̃ biɛdiɛ, bà be-yǝ wà Yuhanã,

7 wà wú juo waa wùú mãã gbɩgbaamã, wù cɔ̃mmã, ǹ-ja cwaaba, ǹ-ce bá hũɔ̃ wù cɔ̃mmã.

8 Gɩ̀ sáa ce nã́ã́ wùú yáá gbɩgbaamã, nǝ̃ wù júó ǹ-ji waa gbɩgbaam'n cɔ̃m dɩn-i ǹ-ja cwaaba.

9 Cãwandɩ-i gbɩgbaahuhorɩmmãã mãã mã̀ júó cuuw nã ǹ-ji cugur cwaa'n yinɲã.

10 Dɩ̀ yáá dìɛ cuuw nã.

Dũnnũẁ tíɛ́ dìí nã-i ǹ-nǝ̃ǝ̃ cuuw, nǝ̃ cuu cwaabá wa ba sǝ̃n fǝ̃ǝ̃-dǝ.

11 Wùú mãã cãwandi, wù júó wù hla'n yiɛntaabaa saa, bà sáa hyar-yǝ.

12 Nǝ̃ badaabá jǝ̃ǝ̃lǝ̃ǝ̃ ǹ-hũɔ̃ wù cɔ̃mmã nãkrɔnɲã hǝ̃ǝ̃l, nã̀ã hũɔ̃ wù cɔ̃mmã.

Wù hlã gɩ̀-lǝ gùú taaba-i nǝ̃ hlũũgu, bá da ǹ-ba Dũnnũ tãnkuuraaba.

13 Dũnnũ tãnkuuraa báà, gɩ̀ sáa ce nã́ã́ wu húulá-ba curo'n blɩ'n tam nã-i, curo'n yisɩnã cɔ̃m sáa huu-ba, curo'n kusunã cɔ̃m yo mã̀ã́ sǝ, nǝ̃ Dũnnũw cíé bá ba wù tãnkuuraaba.

14 Dũnnũ cãwandii cíé dɩ̀ hla curow, ǹ-jo ǹ-ji ba yì sǝ̃ǝ̃nã.

Gùú cãwandɩ-i, Tiiyǝ'n kadiinw.

Wùú mǝ̃́garà wù ne yì yiɛgu, nã̀ã ver ǹ-ba wù sǝ̃n ya sulammã́ ba.

Yi díɛ́ wù yuuntasǝ'n gbɩgbaamã.

Yuuntasǝ'n gbɩgbaam mã́ã̀, Tiiyǝw hlã-yǝ nǝ̃-mã.

15 Yuhanãw yáá wù waa wù cɔ̃mmã wù ja cwaaba.

Wù yáá wù kaasǝ nǝ̃ wù cɔ̃mmã nǝ̃-ba wà: «Mǝ̃n yáá mǝ̃̀ waa gùú tii'n cɔ̃mmã mǝ̃́ wa wú nàa wù jo mǝ̃̀ furũũgɩ nã, wù yáá dìɛ mǝ̃̀ yiga nã, gɩ̀-i, mǝ̃́ wa wà wu ta mǝ̃n nã.»

16 Wú nìɛ wù ne yì yiɛgu, ǹ-ba wù hã yì min nǝ̃ ɲinhuhorɩncin bǝ̃ǝ̃ wo bǝ̃ǝ̃, wù kusufɩnfaagɩ̀ bṹũlã́ ǹ-car.

17 Dũnnũẁ tíɛ́ Musaw nã-i ǹ-jo nǝ̃ Yahudyaba hlũũgu; nǝ̃ Yesu Kɩrsa-lǝ, wùú júó nǝ̃ sulammã, nã̀ã ver ǹ-ba wù ne yì yiɛgu.

18 Curo'n yisɩrɩ sáa da Dũnnũw ǹ-da, nǝ̃ wù Kadiinw mãã Dũnnũw nǝ̃ wù hla, wù pɩ́gará hãmĩĩ nǝ̃ wù cɔ̃mmã; wù-lǝ wɩ̀-i dàa wùu jiraa nǝ̃ Tiiyǝw.

Yuhanãẁ waa wùú sǝ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo

(Mãtiyew 3.1-12 ; Markaw 1.1-8 ; Lukaw 3.1-18)

19 Yuhanãẁ síɛlá cwaaba ǹ-kã Kortii'n cɔ̃mmã nã gùú tammã: wù yáá wù ɲĩɛ̃ cwaaba nnĩĩ nã, Yahudyaba yuntaabaa mãã bà yáá dàa Serusalɛmgu, bá tĩɛ̃ puruɔntaadaba nǝ̃ Levi nũɔ̃ntaadaba wà bá kãã yugu wù cɔ̃mmã.

Bá suro ǹ-ta ǹ-maar.

Bà gáa hi, bá waa wà: «Yíǹ-lǝ, halǝmblǝ-i nǝ̃-n?»

20 Yuhanãẁ sáa hla wà wu síì waa cɔ̃m nǝ̃-ba, wù sáa ŋmǝ̃ǝ̃rǝ̃ǝ̃ dɩ̀ dɩn nã nǝ̃-ba; wú waa wà: «Bláá ne wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wà wɩ̀-i mã́ã̀, mã́ã sǝ.»

21 Bá yugu-yǝ wà: «Yíi-i tanhiil Eli wɩ̀-ì?»

Yuhanãẃ siɛ-ba wà: «Ã-ãã, mã́ã sǝ.»

Bá waa wà: «Yíi-i tanhiildiɛ wáà wɩ̀-ì?»

Wú siɛ-ba wà: «Ã-ãã.»

22 Bá waa wà: «Ah, nǝ̃ yíi-i halii?

Yíǹ waa hadi ǹ cɔ̃mmã nã?

Pɩgaa-yáà nǝ̃ ǹ cɔ̃mmã yi ga tu nǝ̃ bàá nǝ̃n tĩ́ɛ̃lã́-yáà.»

23 Yuhanãẃ siɛ-ba nǝ̃ Dũnnũ tanhiil Esayi cãwanĩɛ̃ga wà: «Curodiɛ nàa wùu hiil wù yalli jerkwaarɩ nã wù waa wà ɲí suro ɲí mǝ̃gaa Cuutii'n hlũũgɩ́ sũɔ̃l, wù ja mã́ã-i.»

24 Bà tĩ́ɛ̃lã́ bàá mãã Yuhanãw nãã, Farisĩɛ̃bà yáá dàa bà sǝ̃ǝ̃nã nã.

25 Farisĩɛ̃ báàbá waa wà: «Ǹ wáalá wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wùú sǝ yíí, nã̀ã ver ǹ-waa wà yíí sǝ Eliw, nã̀ã ba ǹ sǝ tanhiildiɛ wáà yo, nǝ̃ n nã́ã̀ ba danii ń ba ǹ ɲĩɛ̃ cwaaba?»

26 Yuhanãẃ waa wà: «Mã́ã̀, mǝ̃̀ ɲĩɛ̃-ɲã́ã̀ nǝ̃ hũm dɩn-i; nǝ̃ curodiɛ nìɛ ɲì sǝ̃ǝ̃nã nã, ɲi sǝ̃n fǝ̃ǝ̃-yǝ.

27 Gùú tii nǝ̃n júó mǝ̃n furũũgɩ nã, mǝ̃n sáa piɛ wù mããcierw nã, nã̀ã ji wa wùú nǝ̃ wù hla.»

28 Cɔ̃m mã́ã̀mã min mã̀ cíé Yuhanãẁ yáá wù ɲĩɛ̃ cwaaba gùú sùɔ́guu mãã, Betani lǝrii mãã Surdɛ̃ huɔlɩmmã nã.

Yesu wɩ̀-i Dũnnũ Tũmblɩw

29 Gɩ̀ taakaalgu, Yuhanãẃ ne ǹ-da Yesuẁ jo wù nãã.

Wú waa wà: «Dũnnũ Tũmblɩw mãã wù pyar cwaa'n gaacĩɛ̃yaga bà yuunã, wùú jówà nnĩĩ.

30 Mǝ̃̀ yáá mǝ̃̀ ja wɩ̀-i, mǝ̃́ wa curodiɛ nàa wù jo mǝ̃̀ furũũgɩ nã, nǝ̃ wù yáá dìɛ mǝ̃n yiga nã, gɩ̀-i mǝ̃́ wa wu ta mǝ̃n nã.

31 Mǝ̃n sáá mǝ̃̀ fǝ̃ǝ̃-yǝ, nǝ̃ mǝ̃̀ júó ǹ-ji ba mǝ̃̀ ɲĩɛ̃ cwaaba nǝ̃ hũmmã ǹ-da ǹ-fɩrǝǝ wù cɔ̃mmã nã ǹ-ja Isɩrayɛl bluuba.»

32 Wù gáa waa dɩ̀-lǝ, wú waa wà: «Mǝ̃̀ díɛ́ Dũnnũ Yuflǝ yà hlǝ drɔgu nã́ã́ hũɔ̃rũɔ̃-i ǹ-juo yáà ǹ-ba wù drɔ.

33 Mǝ̃n sáá mǝ̃̀ ji fǝ̃ǝ̃ wà wɩ̀-i, nǝ̃ Dũnnũw mãã wù tĩ́ɛ̃lã́-m wà mǝ̃́ juo ɲĩɛ̃ cwaaba nǝ̃ hũmmã, wù wáalá nǝ̃-m, wà mǝ̃-ń ji da wù Yuflǝ wùu hɩr ǹ-ji yáà gùú tii drɔ, wà wùú ji ba wù ɲĩɛ̃ cwaaba nǝ̃ Dũnnũ Yuflǝw.

34 Mǝ̃̀ díɛ́ dɩ̀-lǝ gbaa nǝ̃ mǝ̃̀ yinɲã.

Mǝ̃̀ díɛ́ dìí mãã mǝ̃̀ waa dɩ̀-i: biɛ wáà wɩ̀-i Dũnnũ Bíɛ́w.»

Yesu cɔ̃nhũɔ̃mdĩɛ̃lãmtaaba

35 Gɩ̀ taakaalgu, Yuhanãẁ yáá nǝ̃ wù duunãtaaba hǝ̃ǝ̃ldaba sùɔ́gɩ dɩn gúɔ́ nã.

36 Wù gáa ne ǹ-da Yesuẁ ta, wú waa wà: «Níyà Dũnnũ Tũmblɩw tíyà nnĩĩ!»

37 Duunãtaa báá bà gáa nɔ̃ dɩ̀-lǝ, bá ba bà duu Yesuw nã.

38 Gɩ̀-i, Yesuẁ gáa yiil ǹ-da-ba wù furũũgɩ nã, wú yugu-ba wà: «Ɲi caa bii?»

Bá waa wà: «Arabi, ǹ hyárrá suɔ hagu nã-ì?»

(Arabi yuugɩ-i wà kaltii.)

39 Yesuẃ waa wà: «Jówà yí ta, ɲi ga fǝ̃ǝ̃-gǝ.»

Bá kã bá ta nǝ̃-yǝ ǹ-ga fǝ̃ǝ̃ wù hyárrá gùú suɔgɩ nã.

Bǝ̃ǝ̃gɩ̀ yáá gùu tɩsɩnǝ̃ǝ̃ ǹ-tã, bá paa ǹ-faal bǝ̃ǝ̃'n dɩgaliɛw nǝ̃-yǝ dàa.

40 Duunãtaaba hǝ̃ǝ̃l báá nã, bà yáá bà be wudiɛw Ãndre.

Simɔ̃ Piɛr hǝ̃ǝ̃ yáá nǝ̃ wù-lǝ.

41 Ãndreẃ ta ǹ-kã wù vũnvũɔ̃w nãã haasǝ ǹ-ga waa nǝ̃-yǝ wà: «Yi díɛ́ Kɩrsaw.»

(Kɩrsa yuugɩ-i, wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.)

42 Nã̀ã kã nǝ̃ Simɔ̃w Yesuw nãã.

Yesuẃ ne-yǝ nã̀ã waa wà: «Yuhanã bíɛ́, ǹ wa ba be-n Simɔ̃-i wa?

Yi ji ba yì be-n kuɔkuɔgu Sɩfasɩ.»

(Sɩfasɩ yuugɩ-i wà Tɩntãn.)

Filipɩba nǝ̃ Natanayɛlw, bà duu Yesuw nã

43 Gɩ̀ taakaalgu, Yesuẃ wa wu kã Galile yiɛgu, nã̀ã hlǝ ǹ-kãã da biɛdiɛ bà be-yǝ wà Filipɩ.

Wú waa nǝ̃-yǝ wà: «Ba ǹ duu mǝ̃̀ nã!»

44 Filipɩẁ yáá wù hlǝ Besayida lǝ-i.

Bà yáá bà hlǝ lǝrɩ dɩn-i nǝ̃ Ãndrew nǝ̃ Piɛrw bà min.

45 Gɩ̀ furũũgɩ nã, Filipɩẃ kã ǹ-kãã da Natanayɛlw; wú waa nǝ̃-yǝ wà: «Musaẁ yállá gùú biɛ'n cɔ̃mmã wù hlũũgɩ nã, nǝ̃ Dũnnũ tanhiilaabá yal wù cɔ̃mmã bà sɛbɛba nã, yi díɛ́-yǝ: bà be-yǝ wà Yesu, Nasarɛtɩ lǝntaa'n Yisefu bíɛ́w.»

46 Natanayɛlẃ waa wà: «Ǹ híí ǹ-nɔ̃ wà kufɩnfaagɩ hlǝ́rá Nasarɛtɩ lǝri ǹ-da-ì?»

Filipɩẃ waa wà: «Ji ta n ga da-yǝ nǝ̃ ǹ yisɩri.»

47 Yesuẁ jáa ne ǹ-da Natanayɛlẁ jo, wú waa wà: «Isɩrayɛl yiɛntabyahuhoryǝ wɩ̀-i nnĩĩ nã, wù sǝ̃n hũɔ̃ cɔ̃ncĩɛ̃mã.»

48 Natanayɛlẃ yugu-yǝ wà: «Ǹ fǝ̃́ǝ̃lã́-m danii tam-ì?»

Yesuẃ siɛ-yǝ wà: «Filipɩẁ wáalá wu ji kãã be-n, mǝ̃n yáá mã̀ã da-n figie tuu'n taaragu ǹ-tã do!»

49 Wù jáa waa dɩ̀-lǝ, Natanayɛlẃ waa wà: «Kaltii, yíi-i Dũnnũ Bíɛ́w!

Yíi-i Isɩrayɛl bluu'n yuuntiiw!»

50 Yesuẃ waa wà: «Mǝ̃n mãã mǝ̃̀ wáalá mǝ̃ díɛ́-n figie tuu'n taaragu ǹ-da, gùú cíé ń hũɔ̃ mǝ̃̀ cɔ̃mmã-ì?

Yuugɩ́ nàa yuu nã, ǹ mãã ǹ ji da mã̀ã́ mãã mã̀ máalá mã́ã̀.»

51 Nã̀ã waa wà: «Yáalà mǝ̃́ waa sulammã nǝ̃-ɲã́ã̀, yuugɩ́ nàa yuu nã, ɲi ji da drɔkuɔlìi ciɛl nǝ̃ Dũnnũ mɛlɛgɛbá ba bà hlǝ drɔgu bà yugo Curonbiɛ drɔ bà hiirǝǝ, nã̀ã ba bà ver bà yuguraa.»